Read kumam Amós 8 Bible Online

Amós 8 - kumam bible

Amós 8

¹Tzaj tyek'un Qman Dios juntl techal weye mer ik tza'n tuj witzik': Attoq jun chi'l twitz awal b'a'n tlo'njtz otoq q'anix,

²ex tzaj tqanin Qman weye: —¿Ti ma tila, Amós? —Ma wile jun chi'l twitz awal b'a'n tlo'njtz ma q'anix, nchiye. Tzajtzun tma'n Qman weye: —Aqe aj Israel ik kyten ik tza'n twitz awal b'a'n tlo'njtz ma q'anix, mlayx kub' nnajsa'ntle kyil.

³Tuj q'ij lu, aqeju b'itzal tuj tja rey mlay che b'itzantl, noq o'kx che okel ten ayil. Nimku xjal che kymel tuj tkyaqil lugar ex mi jun kq'ajtel ok kyetz xo'n. A Qman in q'mante jlu.

⁴Kyb'intze aju yol lu, aqeye in che yajlane kyi'j qe tal yaj xjal ex in che b'aj kyk'ixb'isa'ne qe meb'a xjal tuj kytanmiye.

⁵In kyma'ne: ¿Jtoj b'an tb'aj ninq'ij ak'aj xjaw tu'ntzun qk'ayin triw? ¿Jnik' b'an tex ju q'ij te ojlab'l tu'n t-xi qk'ayin twitz awal ex tu'n tajb'en qmalb'il ch'in tuj, ex qmark mya cabal talil, ex tu'n qk'ayin car twi'?

⁶Che b'ajel qyajla'n qe meb'a xjal okxi ttzaj kyk'ayin kyib' te majen tu'n tchjet kyk'as, maske noq o'kx twi' jun moj xjab' kyk'as; ax ikx kxel qk'ayin tb'uchil triw minti' tajb'en, che chiye.

⁷Ate Qman aju in jaw kynimsa'n aj Israel, xi ttziyan jun yol axix tok tu'nx tib', chi tma: Mlayx tzik' tna'l wu'ne aju mya b'a'n o kyb'incha.

⁸¿Mi'npelo tzaj lu'lun tx'otx' tu'n tlaj tkyaqil jlu? ¿Mi'npelo txi kyoq'je'n kykyaqil xjal najl twitz? Aju tx'otx' kjawil ch'iy ex kb'el laq'e', ik tza'n ok in ch'iy nima Nilo ex in kub' ti'j.

⁹Chi Qman Dios in tma'n: Tuj tq'ijlalil tzul, mer te chilkuq'ij k'elex q'ij wu'ne ex k'okel yupj twitz tx'otx'.

¹⁰Aju kyninq'ije te tzalajb'il k'okel nq'o'ne te oq'el, ex ju kyb'itze kch'expetel wu'ne tu'n tok te oq'el ik tza'n in che oq' xjal ti'j kyimni, ex ok nb'incha'ye tu'n tok kyq'o'ne kyxb'alune ch'i'x twitz ex tu'n tel b'aj kymatzo'n ttzmal kywi'ye te jun techal ti'j kyb'ise. Che oq'ele ik tza'n otoq kyim o'kxku jun kyk'wa'le, ex tkyaqil kpol b'aj tuj k'ixk'oj ex b'is.

¹¹Chi Qman Dios: Tzul tq'ijlalil tu'n ttzaj nsama'ne we'yaj twitz tx'otx', pero mya we'yaj tu'n tlaj minti' wab'j ex mya txqetle'n tu'n tlaj minti' k'ab'j, noq o'kx we'yaj tu'n kyb'inte xjal tyol Dios, pero mi jun xjal ktzajel q'mante tyol Dios kye.

¹²Che b'etjeb'il xjal in che jyon ti'j tyol Dios; che xe'l jyolte tuj tkyaqil part ttzi mar, che xe'l jyolte tuj tb'anq'ab' q'ij ex che pol b'aj max tuj tjawitz q'ij, pero mlayx knet kyu'n.

¹³Tuj q'ij lu, qe q'apoj tb'anilxix che ke'yin ex qe ku'xun che b'el numj tu'n txqetle'n.

¹⁴Aqeju in tzaj kyna'n kyb'i qe tilb'ilal ate' tuj Samaria tu'n t-xi kyma'n jun kyyol ex in tzaj kyna'n tb'i kydios aj Dan ex aj Beerseba ti'j jun yol in xi kytziyan, che b'el tz'aq ex mlay che jaw we' juntl maj.