Read kumam Jonás 3 Bible Online

Jonás 3 - kumam bible

Jonás 3

¹Tzaj yolin Qman tkab'inmaji'n tuk'il Jonás ex tma:

²Chux q'onku b'eya, txi'ya tuj nintz tnam Nínive ex q'manxa aju kxel nma'ne teya, chi Qman.

³Kub'tzun b'e tu'n Jonás ex xi' tuj tnam Nínive ik tza'nx otoq tma Qman te. Ma tijxix aju tnam Nínive, oxe q'ij in xi ti'n tu'n tb'aj qb'etin tuj.

⁴Okxtzun Jonás tuj tnam ex jun q'ij o b'et in tma'n kyuwxix wen: —Tuj 40 q'ij ja'lo kb'ajel xitj tnam Nínive.

⁵Qe xjal aj Nínive e okslan ti'j Dios, etz jun tqanil kyu'n tu'n tkub' kyyo'n we'yaj, ex kykyaqil, tza'nx qe tij xjal ax ikx qe k'wa'l, ok kyq'o'n kyxb'alun ch'i'x twitz te jun techal qa otoq tz'ajtz ti'j kyanmi.

⁶Tejtzun tpon tqanil tuk'il rey te tnam Nínive, ax ikx te jaw we' tuj tq'uqb'il jatum in kawin, el ti'n t-xb'alun tb'anil, ok tq'o'n t-xb'alun ch'i'x twitz, ex kub' qe' tuj tza'j.

⁷Ex ate rey kyuk'ix qe xjal ma' kyoklen ate' ttxlaj, ex kyq'o'n tqanil tuj tkyaqil tnam ti'j jun ley in tma'n kyja': Mi jun xjal kwa'l, mi qe alumaj, qa ẍne'l ex qa wakẍ. Mi'n che wa'n ex mi'n che k'an a'.

⁸Noq o'kx kyq'o'n oke kyxb'alune ch'i'x twitz kyi'je tuk'ix kyi'j alumaj, ex che kub'sane twitz Dios tu'n tkyaqil kyipune, ex teyle junjun tu'n tkyaj tkolin tmod mya b'a'n ex ju mya b'a'n in kyb'incha'n kyi'j txqantl ma b'et-xi q'ij ex kukx ja'lo;

⁹qape jaku tzaj chewix tk'u'j Dios ex qape jaku tzaj q'aq'an tk'u'j qi'j tu'n mi'n qkyim, che chi.

¹⁰Tej ttil Dios aju kyb'incha xjal tuj Nínive, tza'n tten ok tilil kyu'n tu'n tkyaj kykolin kyb'inchb'en mya b'a'n, kub' t-ximan Dios tu'n mi'n tb'inchante mya b'a'n kyi'j, ex minti' tzaj tq'o'n castiw kyib'aj, aju otoq tma nej.