Read kumam Números 1 Bible Online

Números 1 - kumam bible

Números 1

¹Tuj tnejel q'ij te tkab'in xjaw tuj tkab'in ab'q'i kyetzlen aj Israel tuj Egipto, tzaj yolin Qman tuk'il Moisés tuj ja xb'alun te mojb'ab'l tib'il, tuj tzqij tx'otx' t-xe witz Sinaí, chi kyja':

²Q'i'n jawa kyajlal kykyaqil aj Israel, teylex junjun tk'loj ex tiyjil ex tz'ib'ankuya kyb'i kykyaqil xinaq.

³Kxelx qe' kyi'j qeju ma che japun twi' winqin ab'q'i, aqeju ma b'ant tu'n kyxi' tuj q'oj. Aya tuk'ix Aarón kyq'o'nke tuj k'lojin ik tza'nx in che tenb'a soldad, ex jun nejenel te junjun k'loj kyiyjil aj Israel tu'n t-onin ti'ja.

⁵Aju kyb'i qe nejenel che onil, atzun jlu: Kyxol tiyjil Rubén: Atzun Elisur aju tky'ajal Sedeur.

⁶Kyxol tiyjil Simeón: Atzun Selumiel aju tky'ajal Zurisadai.

⁷Kyxol tiyjil Judá: Atzun Naasón aju tky'ajal Aminadab.

⁸Kyxol tiyjil Isacar: Atzun Natanael aju tky'ajal Zuar.

⁹Kyxol tiyjil Zabulón: Atzun Eliab aju tky'ajal Helón.

¹⁰Kyxol kyiyjil qeju kab'e tky'ajal José: kyxol tiyjil Efraín: Atzun Elisama aju tky'ajal Amiud, atzun kyxol tiyjil Manasés: Atzun Gamaliel aju tky'ajal Pedasur.

¹¹Kyxol tiyjil Benjamín: Atzun Abidán aju tky'ajal Gedeoni.

¹²Kyxol tiyjil Dan: Atzun Ahiezer aju tky'ajal Amisadai.

¹³Kyxol tiyjil Aser: Atzun Pagiel aju tky'ajal Ocrán.

¹⁴Kyxol tiyjil Gad: Atzun Eliasaf aju tky'ajal Deuel.

¹⁵Kyxol tiyjil Neftalí: Atzun Ahira aju tky'ajal Enán, chi Qman te Moisés.

¹⁶Atzun qe nejenel jlu e jaw sk'o'n kyxol kykyaqil aj Israel, nejenel qe kyxol junjun k'loj kyiyjil ex nejenel qe kyxol ela' milchaq aj Israel.

¹⁷Tuj tnejel q'ij te tkab'in xjaw ok kychmo'n Moisés ex Aarón qe xinaq lu, aqeju otoq che jaw t-sk'o'n Dios, kyuk'ix kykyaqil xjal, ex jaw kyi'n jun kyajlal kykyaqil aj Israel; kub' kytz'ib'an kyb'i teylex junjun tuj ttxolil ex tuj k'lojin, ik tza'nx kyiyjil, xi qe' kyu'n kyi'j qeju otoq che japun twi' winqin ab'q'i,

¹⁹ik tza'nx otoq tzaj tma'n Qman te Moisés. Aju tajlal lu jaw tuj tzqij tx'otx' t-xe witz Sinaí.

²⁰Tej tb'ant tajlal ti'j teylex junjun k'loj ik tza'nx tiyjil, ex tej tkub' tz'ib'et kyb'i teylex junjun, aju kyajlal qe xinaq otoq japun winqin ab'q'i kyu'n, atzun jlu: Kyxol tiyjil Rubén aju nej tky'ajal Israel, japun jun tajlal te 46,500 xinaq at kynab'l tu'n kyxi' tuj q'oj.

²²Kyxol tiyjil Simeón japun jun tajlal te 59,300 xinaq.

²⁴Kyxol tiyjil Gad japun jun tajlal te 45,650 xinaq.

²⁶Kyxol tiyjil Judá japun jun tajlal te 74,600 xinaq.

²⁸Kyxol tiyjil Isacar japun jun tajlal te 54,400 xinaq.

³⁰Kyxol tiyjil Zabulón japun jun tajlal te 57,400 xinaq.

³²Kyxol kab'e tiyjil José japun jun tajlal te 40,500 xinaq ti'j tiyjil Efraín ex ti'j tiyjil Manasés japun jun tajlal te 32,200 xinaq.

³⁶Kyxol tiyjil Benjamín japun jun tajlal te 35,400 xinaq.

³⁸Kyxol tiyjil Dan japun jun tajlal te 62,700 xinaq.

⁴⁰Kyxol tiyjil Aser japun jun tajlal te 41,500 xinaq.

⁴²Kyxol tiyjil Neftalí japun jun tajlal te 53,400 xinaq.

⁴⁴Atzun kyajlal o japun jlu tej tjaw kyajlal tu'n Moisés, tuk'ix Aarón ex kyuk'ix kab'laj nejenel kyxol aj Israel, jun kyxol junjun k'loj kyiyjil.

⁴⁵Aju kyajlal aj Israel xi'x qe' kyi'j qeju otoq japun winqin ab'q'i kyu'n ex at kynab'l tu'n kyxi' tuj q'oj.

⁴⁶Tu'n tkyaqilx japun jun tajlal te 603,550 xinaq.

⁴⁷Ex minti' e ok aj Leví te tajlal kyxol qe xinaq aj Israel,

⁴⁸tu'nju otoq txi tma'n Qman te Moisés kyja':

⁴⁹Ok tjaw kyajlal aj Israel tu'na, mi'n che ok tq'o'na qe tiyjil Leví te tajlal kyxol,

⁵⁰noq o'kx che okel tq'o'na qe tu'n tkyaj ten ja xb'alun te mojb'ab'l tib'il tuj kykwent, kyuk'ix qe makb'il ex tkyaqilju at tuj. Aqe che ik'el laq'b'ante ja xb'alun te mojb'ab'l tib'il, kyuk'ix kykyaqil makb'il in che ajb'en tuj, ax ikx aqe che ajb'el tuj ja xb'alun te mojb'ab'l tib'il, ex niqayin che b'el ten ti'jele.

⁵¹Ok tik' laq'b'et ja xb'alun te mojb'ab'l tib'il tu'n t-xi' tuj juntl part, aqe at kyoklen ti'j tu'n tb'aj kyko'pin, ex kyu'nx kjawil kyb'incha'n juntl maj jatum che b'el ten. Ex alkye jun xjal mya aj Leví ma pon laq'e' ti'j, b'i'x kb'el b'yet.

⁵²Atzun qe txqantl aj Israel che b'el ten tuj k'lojin, teyle junjun tu'n tten tuj tex tcampament ex tjaq' tex tbander.

⁵³Atzun kye aj Leví che b'el ten ti'jele ja xb'alun te mojb'ab'l tib'il tu'ntzun mi'n ttzaj tq'oj Qman kyi'j aj Israel. Tuj kykwent aj Leví kyjel ten ja xb'alun te mojb'ab'l tib'il, chi Qman te Moisés.

⁵⁴O kyb'incha aj Israel tkyaqil ik tza'nx otoq tzaj tma'n Qman te Moisés.