Read kumam Números 10 Bible Online

Números 10 - kumam bible

Números 10

¹Tzaj yolin Qman tuk'il Moisés ex tma:

²B'inchan b'aja kab'e chun saq pwaq kytx'otx'il, tx'ino'n tu'n martiy, tu'n tajb'en te chmob'l xjal, ex k'okel q'ajtzet te jun techal tu'n kyik' laq'e' xjal.

³Ok kyok q'ajtzet kykab'il chun, kykyaqil xjal k'okel kychmon kyib' twitza ttzi ja xb'alun te mojb'ab'l tib'il.

⁴Qatzun junx chun ma tz'ok q'ajtzet, o'kxtzun kye nejenel kye junjun k'loj kyiyjil aj Israel k'okel kychmon kyib' tuk'ila.

⁵Oktzun kyok q'ajtzet tnejel maj chun ch'in kyxol tq'ajq'ajel, kb'eltzun b'e kyu'n xjal kykub' tuj tumlal tjawitz q'ij,

⁶ex ok kyok q'ajtza'n tkab'in maj chun, kb'eltzun b'e kyu'n qeju kykub' tuj tumlal tnayaj q'ij. Ok kyok q'ajtzet chun ch'in kyxol tq'ajq'ajel, atzun techal tu'n tkub' b'e kyu'n xjal.

⁷Atzun ok kyok q'ajtzet chun ma' kyxol tq'ajq'ajel, atzun techal tu'n tok kychmon kyib' kykyaqil xjal.

⁸Tuj kykwent pal, aqeju tky'ajal Aarón, tu'n kyok q'ajtzet chun. Aju ley lu kyjel ten kyuk'ile te jumajx ex wiqinwiq kyjel kyma'ne kye kyk'wa'le.

⁹Ex qa ma che ul aj q'oj q'ojlel kyi'je tuj kytanmiye, k'okel kyq'ajtza'ne chun ex che jawil sch'i'ne nim, tu'n kyexe q'ojlel kyuk'il, tu'ntzun kytzaj nna'ne, aqine kymane ex Kydiose; ex che kletele wu'ne kywitz aj q'oj kyi'je.

¹⁰Ex kyq'ajtza'n oke chun kyuj q'ij te tzalajb'il, kyuj ninq'ij, ex kyuj q'ij ok kytzaj ke'yin ak'aj xjaw, ex ok t-xi kyq'o'ne kyoyaje patun in kub' ex ju chojb'il te mojb'ab'l tib'il, tu'ntzun kytzaj nna'ne. Aqine Kymane ex Kydiose, chi Qman te Moisés.

¹¹Tuj winqin tajlal tkab'in xjaw te tkab'in ab'q'i, jaw laq'e' muj tib'aj ja xb'alun jatum k'u'n tley Dios,

¹²ex kub'tzun b'e kyu'n aj Israel. E ik' tuj tzqij tx'otx' Sinaí ex atzun o we' muj tuj tzqij tx'otx' Parán.

¹³Atzun tnejel maj e b'et ik tza'nx otoq tzaj tma'n Qman te Moisés:

¹⁴Tnejelxix nejni qe soldad aj Judá tuk'il kybander q'i'n; aju nejenel kyxol soldad lu, atzun Naasón aju tky'ajal Aminadab,

¹⁵atzun nejenel kyxol soldad tiyjil Isacar, atzun Natanael aju tky'ajal Zuar,

¹⁶ex aju nejenel kyxol soldad tiyjil Zabulón, atzun Eliab aju tky'ajal Helón.

¹⁷Tejtzun tb'aj kyko'pin ja xb'alun te mojb'ab'l tib'il, aqe tiyjil Gersón ex tiyjil Merari e je'x iqante te ex kub' b'e kyu'n.

¹⁸Lepchix e je'x soldad tiyjil Rubén, tuk'ix kybander q'i'n, ex aju nejenel kyxol, atzun Elisur aju tky'ajal Sedeur;

¹⁹aju nejenel kyxol soldad tiyjil Simeón, atzun Selumiel aju tky'ajal Zurisadai,

²⁰ex aju nejenel kyxol soldad tiyjil Gad, atzun Eliasaf aju tky'ajal Deuel.

²¹Lepchix e je'x qe tiyjil Coat, q'i'n qe makb'il xjan kyu'n. Ok in che pon tuj jun lugar, ya otoq jaw b'incha'n ja xb'alun te mojb'ab'l tib'il.

²²Ex aqeju lepchix kyi'j, atzun qe soldad tiyjil Efraín, tuk'ix kybander q'i'n, ex aju nejenel kyxol, atzun Elisama aju tky'ajal Amiud;

²³aju nejenel kyxol soldad tiyjil Manasés, atzun Gamaliel aju tky'ajal Pedasur,

²⁴ex aju nejenel kyxol soldad tiyjil Benjamín, atzun Abidán aju tky'ajal Gedeoni.

²⁵Te mankb'ilxitzun e je'x lpe' qe soldad tiyjil Dan, tuk'ix kybander q'i'n, ex aju nejenel kyxol, atzun Ahiezer aju tky'ajal Amisadai;

²⁶aju nejenel kyxol soldad tiyjil Azer, atzun Pagiel aju tky'ajal Ocrán,

²⁷ex aju nejenel kyxol soldad tiyjil Neftalí, atzun Ahira aju tky'ajal Enán.

²⁸Kyja'tzun e tenb'a qe soldad aj Israel tej kyb'et.

²⁹At jun q'ij xi tma'n Moisés te Hobab aju tb'alk, aju tky'ajal Reuel, aju aj Madián ex tji' Moisés, ex chi kyja': —Ma qo'x qeye tuj tx'otx' o tzaj ttziyan Qman tu'n ttzaj tq'o'n qeye. Qo' quk'ile ex b'a'n ktela qu'ne, porke ma tzaj ttziyan Qman tu'n tb'inchante b'a'n kye aj Israel.

³⁰Atzunte Hobab xi ttzaq'we'n: —Mlay chinxe kyuk'ile, noq o'kx chin ajel meltz'aje tuj ntx'otx'e jatum ate' qe xjal at nxilene kyuk'il.

³¹Atzunte Moisés xi tma'n te: —Mi'n tz'aja, ojtzqi'n qe lugar tu'na jatum b'a'n tu'n qkub' ten tuj tzqij tx'otx', ex jaku tz'ajb'ena yek'ul b'e qeye.

³²Qa ma txi'ya quk'ile, jaku tz'oka te tajlal qu'ne ti'j tkyaqilju b'a'n tzul tq'o'n Qman qeye.

³³Kyja'tzun tten e ik' t-xe witz te Qman ex e b'et ox q'ij. Aju kax k'ub'l tley Dios nejnitoq kywitz, in jyon ti'j jun lugar jatum tu'n kyojlan.

³⁴Te q'ijl, ok ttzyet kyb'e, in b'et muj te Qman kyib'aj.

³⁵Ex oktzun tik' kyi'n kax, in xi tma'n Moisés kyja': We'ktza Nman. E kyel sputj qe aj q'oj ti'ja, ex e kyel oq qeju in che ik'un teya.

³⁶Ex ok tpon kax jatum tu'n tkub' ten, in xi tma'n Moisés kyja': Tajtza ja'lo Nman kyuk'il kykyaqil k'loj aj Israel mib'an kyajlanjtz.