Read kumam Números 11 Bible Online

Números 11 - kumam bible

Números 11

¹At jun q'ij e ok ten aj Israel yolil mya b'a'n ti'j Qman tu'n tlaj ju in b'aj kyi'j. Tej kyb'injtz tu'n Qman, tzaj nim tq'oj kyi'j ex tzaj t-sama'n q'aq' tib'aj jun piẍ ttxa'n campament.

²E jawtzun sch'in tnam xjal ex e ok ten qanil onb'il te Moisés. O kub'san Moisés twitz Qman kyi'j ex kub' yupj q'aq'.

³Kyja'tzun ok q'o'n tb'i lugar lu Tabera, ex atzun o k'ant q'aq' tu'n Qman kyi'j.

⁴Otoq tz'ok kysmon kyib' ela' txkaj xjal kyuk'il aj Israel, ex aqe jlu o'kx in che ximan ti'j kychi'; ax ikx kye aj Israel el kykano'n kyi'j e ok ten oq'el ex kyma: Ay, noqwit at jun b'a'n ttzaj q'onte qchi' chib'j.

⁵Kukx tul ti'j qk'u'j qkotz kyiẍ ok tb'aj qu'n tuj Egipto, tuk'ix pepin, melón, jun wiq seboy puerro tb'i, seboy ex anjs.

⁶Atzun ja'lo ma b'aj qgan ti'j maná, porke o'kx maná in b'aj qu'n, che chi.

⁷Aju maná mer ik ke'yin ik tza'n iyaj culantr, ẍq'anyin ke'yin ik tza'n tq'olil tzaj.

⁸In che ex xjal chmolte te ex ok tjaw kyche'n ex qa ok tb'aj kytx'ino'n, in jax kytzq'ajsa'n tuj k'il ex qa in kub' kyb'incha'n ik tza'n wab'j, ex aju tk'ok'jal nno'k ik tza'n pan xi'yni aseyt tuj.

⁹Ok tkub' tq'ab' che'w te qonik'an tuj campament ax ikx in kub' aju wab'j maná.

¹⁰O tb'i Moisés in che oq'toq kykyaqil aj Israel ttzi'yile kyja xb'alun. Tzajtzun nim tq'oj Qman kyi'j, ax ikx te Moisés mya b'a'n ela tuj twitz,

¹¹ex xi tma'n te Qman: —¿Tiqu'n in tb'incha'na mya b'a'n wi'je, aqine tmajena? ¿Titzun tq'oja wi'je, tu'nju ma che kyaj tq'o'na qe xjal lu tuj nkwente ex ma che ok te weye ik tza'n jun iqtz alxix?

¹²Baqa aqine kyman xjal lu ex baqa aqine kytxu', tu'n ttzaj tma'na weye tu'n kyxi npalo'ne ik tza'n ne', ex tu'n kypon wi'ne max tuj tx'otx' xi ttziyana kye kyxe'chel.

¹³¿Jatum ktzajel wi'ne chib'j tu'n t-xi q'ot te kychi' kykyaqil xjal lu? In che oq' ex in che ul q'malte wuk'ile: Q'ontza chib'j te qchi'ye, che chi.

¹⁴Mlayx chin xkye'ye tu'n kyxi wi'ne kykyaqil xjal lu njunalxe; jun iqtz jlu alxix te weye.

¹⁵Qa a jlu kb'antel tu'na wi'je, mejor chin tb'yonkuya. Qa axix tok in chin tk'ujla'na, mi'n taq'a amb'il tu'n ntentle tuj yajb'il weye, chi Moisés.

¹⁶Atzunte Qman xi ttzaq'we'n: —Che chmon oka 70 tij xjal kyxol aj Israel, aqeju ojtzqi'n tu'na at kyoklen kyxol xjal; q'intza qe tuj ja xb'alun te mojb'ab'l tib'il ex ax e kyayon tuk'ila.

¹⁷Chin b'eletze ex chin yolile tuk'ila; k'elel wi'ne ch'in toklena aju tk'ama tu'n Xewb'aj Xjan, ex kxel nq'o'ne kye, tu'ntzun kyonin tuk'ila tu'n kyok kwentit qe xjal lu, tu'ntzun mi'n kyten xjal o'kx tuj teya tkwent.

¹⁸Q'manxa kye xjal tu'n tb'aj kyxjansan kyib' te nchi'j ex che chyo'l chib'j, porke o nb'iye in che oq' ex in kyma'n: Noqwit at jun b'a'n ttzaj q'onte qchi' chib'j; mas b'a'ntoq qten tuj Egipto, che chi. Ax b'a'n, kxel nq'o'ne kychi' chib'j,

¹⁹ex mya o'kx te jun q'ij, mi te kab'e q'ij, mi te jwe', mi te laj mi te winqin. Mi'n.

²⁰Che chyo'l chib'j tuj enter jun xjaw, okxi tjawil noj tuj kyqul tu'n ttzaj xab' kyk'u'j, porke ma chin el ik'une kyu'n, aqine Kyman atine kyxol. Ma che oq' ex ma kyma nwitze: ¿Tza'n tten xqo etz tuj Egipto?

²¹Atzunte Moisés xi ttzaq'we'n: —At qaq syent mil soldad wuk'ile, ex atzun teya in tma'na qa tu'n ttzaj tq'o'na qchi'ye chib'j tuj enter jun xjaw.

²²¿Jatum at nim ẍne'l ex wakẍ tu'n kykub' b'yet ex tu'n tkanun te kychi' kykyaqil xjal lu? Maske tzaj tq'o'na kykyaqil kyiẍ at tuj mar te kychi', mlaylo kanun kye, chi Moisés.

²³Atzunte Qman tzaj ttzaq'we'n: —¿Noqpe ch'in wipumale tuj twitza? Ja'lo k'okel tke'yina qa kjapunel ex qa mi'n aju ma txi nma'ne teya.

²⁴Etztzun Moisés ex xi ttx'olb'a'n kye xjal aju otoq tma Qman. Te tib'ajxi ok tchmo'n Moisés 70 tij xjal kyxol aj Israel ex e kub' ttxolb'a'n ti'jele ja xb'alun te mojb'ab'l tib'il.

²⁵Ku'tztzun Qman tuj muj ex o yolin tuk'il Moisés; eltzun ti'n Qman ch'in toklen Moisés, aju otoq tk'am tu'n Xewb'aj Xjan, ex xi tq'o'n kye 70 tij xjal. Tej tkub' ten Xewb'aj Xjan kyib'aj, e oktzun ten yolil ik tza'n t-sanjel Dios, ex minti'tl e yolin juntl maj ikju.

²⁶At kab'e xinaq, jun Eldad tb'i, atzun juntl Medad tb'i. Aqeju kab'e xinaq lu, ajun qe kyok te tajlal kyxol 70 tij xjal ex minti' e je'x tuj ja xb'alun te mojb'ab'l tib'il, noq o'kx ax e kyaj ten tuj campament. Ax ikx ul Xewb'aj Xjan kyuk'il ex e ok ten yolil ik tza'n t-sanjel Dios.

²⁷Tu'ntzunju tzaj qelan jun ku'xun q'malte te Moisés kyja': —Ate Eldad ex Medad in che yolin kyxol xjal mer ik tza'n t-sanjel Dios qe, chi ku'xun.

²⁸Atzunte Josué aju tky'ajal Nun, aju matoq ku'xunx tej tok te onil te Moisés, tma: —Tat Moisés, q'manxa kye tu'n mi'n kyyolin ikju.

²⁹Xi ttzaq'we'n Moisés: —¿Apetzun taja o'kx weye tu'n tten woklene? Noqwit b'a'n t-xi tq'o'n Qman T-xew kye kykyaqil tnam xjal etzan tu'n, ex tu'n kyok kykyaqil te t-sanjel Dios.

³⁰Ajtzun meltz'aj Moisés kyuk'ix kytijil xjal kyxol aj Israel tu'n kypon tuj campament.

³¹Tzaj txqan kyq'iq' tuj mar tu'n Qman, tzaj ti'n kyq'iq' txqan tz'uchin ex e kub' tz'aq ti'jele campament, ex b'alo te jun q'ij tb'etj jatum ponin b'aj kytxa'n ti'jele campament. In che lipan niqayin twitz tx'otx', b'alo te jun var kyjaw tib'aj tx'otx'.

³²Tuj enter q'ij ex enter qonik'an ex tuj enter juntl q'ij e chmon xjal kyi'j tz'uchin. Aju xjal nik'xi tz'uchin chmet tu'n, noq laj b'yuj chmet tu'n, ex kub' kytzqijsa'n ti'jele campament.

³³Matoqtzun nno'kx kyq'o'n kychi' tz'uchin tuj kytzi', na'nxtoq tb'aj kykok'sa'n, tzaj tq'oj Qman kyi'j, tzaj tq'o'n kycastiw ex e kyim nimku xjal.

³⁴Kyja'tzun ok kyq'o'n tb'i lugar lu Kibrot-hataava, ex atzun lugar jatum e ku'x maqu'n qe xjal o'kx tok kyk'u'j ti'j kychi'.

³⁵Tuj lugar Kibrot-hataava kub' b'e kyu'n tnam xjal tu'n kypon tuj lugar Hazerot ex atzun e kub' ten.