Read kumam Números 12 Bible Online

Números 12 - kumam bible

Números 12

¹E ok ten María ex Aarón yolil mya b'a'n ti'j Moisés tu'nju otoq jaw moje' Moisés tuk'il jun xu'j aj Etiopía.

²Ax ikx o kyma: Mya noq o'kx tuk'il Moisés in yolin Qman, ax ikx in yolin quk'il. Ex o tb'i Qman kyyol.

³Ax tok ate Moisés mansxix, mas mans kywitz txqantl xjal twitz tx'otx'.

⁴Jurattzun xi tma'n Qman te Moisés, te Aarón ex te María kyja': Kyxi'ye kyoxile twitz ja xb'alun te mojb'ab'l tib'il. E je'xtzun kyoxil.

⁵Ku'tztzun Qman tuj muj, kub' ten ttzi ja xb'alun te mojb'ab'l tib'il ex xi ttxko'n Aarón tuk'ix María. Tejtzun kykanun twitz,

⁶tzaj tma'n kye: Kyb'intze aju kxel nma'ne kyeye: Qa at jun nsanjele kyxole, in chin yoline tuk'il mer ik tza'n tuj witzik', ex qa tuj twitzik',

⁷atzun tuk'il nmajene Moisés minti' in b'ant wu'ne ikju. Ate Moisés mas in japun tu'n kywitz kykyaqil nmajene.

⁸In chin yoline tuk'il Moisés nwitzeleye tuk'il jun yol chik'lxix, ex mya tuj techal, ex in chin ilwaje tu'n. ¿Tza'ntzun tten minti' ma tzaj kyxob'ile tu'n kyyoline mya b'a'n ti'j nmajene Moisés?

⁹Tzaj nimxix tq'oj Qman kyi'j kykab'il ex ajtzun.

¹⁰Tejtzun tjaw laq'e' muj tib'aj ja xb'alun te mojb'ab'l tib'il, lu María otoq jawil tx'a'k ti'j, aju minti' q'anb'il ti'j, ex saq ok ke'yin tkyaqil t-ximlal tu'n tx'a'k. Tejtzun t-xi tke'yin Aarón ti'j María otoq jawil tx'a'k ti'j aju minti' q'anb'il ti'j,

¹¹xi tma'n te Moisés: B'inchama xtalb'il tat, mi'n kub' tq'o'na qcastiwoye ti'j ju il ma qb'inchaye tu'n qchkyinib'ile.

¹²Mi'n taq'a amb'il tu'n tok María ik tza'n jun k'wa'l otoq kyim na'nxtoq tul itz'j ex ok tul itz'j otoq b'aj q'ay mij t-ximlal.

¹³Oktzun ten Moisés kub'sal twitz Qman ex tma: Nman Dios, in chin kub'sane twitza tu'n tb'anix María tu'na.

¹⁴Tzaj ttzaq'we'n Qman te Moisés: Noqwit a tman ma tz'okx tzub'ante tuj twitz, mawtlo kyaj ten wuq q'ij tuj tch'ixwi. E tex tu'n tten wuq q'ij ti'jxi campament, ex te tib'ajxi b'a'n tu'n tul meltz'aj juntl maj.

¹⁵Kyja'tzun tten, ex q'i'n María wuq q'ij ti'jxi campament, atzun kye tnam xjal ax e kub' ten ayol ti'j.

¹⁶Tejtzun tul meltz'aj María juntl maj kyuk'il, kub'tzun b'e kyu'n, e ik' tuj lugar Hazerot ex atzun e kub' tentl tuj lugar tzqij tx'otx' Parán.