Read kumam Números 13 Bible Online

Números 13 - kumam bible

Números 13

¹Tzaj yolin Qman tuk'il Moisés ex tma:

²Samanxa junjun xinaq ke'yilte tx'otx' Canaán aju kxel nq'o'ne kye aj Israel. Samanxa junjun xinaq ma' kyoklen, jun kyxol teyle junjun k'loj aj Israel.

³E je'xtzun t-sama'n Moisés tej ate'toq tuj tzqij tx'otx' Parán, ik tza'nx otoq tma Qman. Kykyaqil qe xinaq e je'x sama'n, nejenel qe kyxol aj Israel,

⁴ex atzun qe jlu: Kyxol tiyjil Rubén, a Samúa xi', aju tky'ajal Zacur;

⁵kyxol tiyjil Simeón, a Safat xi', aju tky'ajal Hori;

⁶kyxol tiyjil Judá, a Caleb xi', aju tky'ajal Jefone;

⁷kyxol tiyjil Isacar, a Igal xi', aju tky'ajal José;

⁸kyxol tiyjil Efraín, a Oseas xi', aju tky'ajal Nun;

⁹kyxol tiyjil Benjamín, a Palti xi', aju tky'ajal Rafú;

¹⁰kyxol tiyjil Zabulón, a Gadiel xi', aju tky'ajal Sodi;

¹¹kyxol tiyjil José, ti'j tiyjil Manasés, a Gadi xi', aju tky'ajal Susi;

¹²kyxol tiyjil Dan, a Amiel xi', aju tky'ajal Gemali;

¹³kyxol tiyjil Aser, a Setur xi', aju tky'ajal Micael;

¹⁴kyxol tiyjil Neftalí, a Nahbi xi', aju tky'ajal Vapsi;

¹⁵kyxol tiyjil Gad, a Geuel xi', aju tky'ajal Maqui.

¹⁶Atzun kyb'i qe xinaq e je'x t-sama'n Moisés ke'yilte tx'otx'. B'aj tch'expu'n Moisés tb'i Oseas aju tky'ajal Nun, ex Josué tb'i ok tq'o'n.

¹⁷E je'xtzun t-sama'n Moisés qe xinaq lu ke'yilte tx'otx' Canaán ex xi tma'n kye: —Kyja' kyjaxe tuj lugar Néguev ex kyjaxe tuj tiwitz tx'otx'.

¹⁸Kyke'yin b'aje tx'otx' tza'n tten, ax ikx qe xjal najl tuj, qa at nim kyipun ex qa minti' kyipun, qa nim kyb'aj ex qa nik'xi kyb'aj.

¹⁹Kyke'yin b'aje qe tnam, qa at muro tok kyi'j ex qa minti', ex aju tx'otx' jatum najl qe xjal, qa b'a'n ex qa mya b'a'n,

²⁰qa b'a'n ttzaj awal tuj tx'otx' ex qa mi'n, ex qa at tze' tuj ex qa minti'. Kyuwx kyk'u'je, kyi'ntze junjun twitz awal at tuj tx'otx', chi Moisés kye. Aku tq'ijlalil tu'n tjaw chmet tnejel twitz uva.

²¹E je'xtzun qe xinaq ex b'aj kyke'yin tx'otx', xi'x qe' kyu'n tuj tzqij tx'otx' Zin tuj tumlal tnayaj q'ij, ex e japun b'aj max tuj Lugar Rehob ttxa'n tnam Hamat tuj tumlal tb'anq'ab' q'ij.

²²E ik' tuj tx'otx' Néguev ex e pon max tuj tnam Hebrón. Atzun najltoq Ahimán tuk'ix Sesai ex Talmai, aqe jlu tiyjil Anac qe. Otoq b'ant wuq ab'q'i tb'antlen tnam Hebrón tej tb'ant tnam Zoán tuj Egipto.

²³E pon max jatum ta' tq'ab' xaq Escol, ex atzun el kytx'emin jun tq'ab' uva nim twitz tok ti'j, oktzun kyyob'in ti'j jun tze' ex kab'e xjal tzaj q'inte te. Ax ikx tzaj kyi'n karnad ẍoq' tuk'ix higo.

²⁴Escol tb'i tq'ab' xaq ok kyq'o'n, tu'nju atzun el kytx'emin aj Israel aju rasim uva lu.

²⁵Tuj 40 q'ij b'aj kyke'yin tx'otx', ex tb'ajlenxi jlu e ajtztzun meltz'aj

²⁶tu'n kyul tuj lugar Cades tuj tzqij tx'otx' Parán. Atzun ate'toq Moisés tuk'ix Aarón ex kykyaqil aj Israel. Xi kytx'olb'a'n kye aju otoq kyil ti'j tx'otx' ex xi kyyek'un kye aju twitz awal in tzaj tuj tx'otx'.

²⁷Ax ikx xi kyma'n te Moisés: —Ma qox aje tuj tx'otx' jatum o'x t-sama'na. Axix tok aju tx'otx' lu q'inun tx'otx' ex tb'anilxix, ex atzun qe twitz awal in tq'o'n tx'otx' jlu,

²⁸ex qe xjal najl ma chixin at nim kyipun ex qe tnam nimaqxix qe ex at muro tok kyi'j. Ex mya o'kx jlu, ax ikx ma qile qe xjal ma' kywa'l tiyjil Anac qe.

²⁹Tuj Néguev, atzun najl qe aj Amalec, ex tuj tiwitz tx'otx', atzun najl qe aj Heteo, qe aj Jebuseo ex qe aj Amorreo, atzun niqayin ttzi mar ex ttzi nima Jordán, atzun najl qe aj Canaán.

³⁰Atzunte Caleb xi tma'n tu'n mi'n kyq'ajt tnam xjal ate' twitz Moisés ex tma: —Qo'qe tu'n tkamb'et tx'otx' lu qu'n. Jaku kamb'et qu'n.

³¹Atzun qeju e je'x aj tuk'il ke'yilte tx'otx' tzaj kytzaq'we'n: —Mi'n, mlay qo xkye' kyi'j xjal lu, ex mas at kyipun qwitz.

³²Ex e ok ten q'malte kye aj Israel qa aju tx'otx' otoq che'x aj ke'yilte jumajx mya b'a'n te, ex xi kyma'n: —Aju tx'otx' o'x aje ke'yilte, jumajx xob'ajil, ex kykyaqil xinaq o qile ma chixin ma' kywa'l.

³³Ax ikx o qile qe xjal ma' kywa'l aqeju tiyjil Anac. Tej qkub' tene kytxlaj o qna'ye mer ik tza'n ẍplon qo'ye, ax ikxlo o e'laye tuj kywitz tej kyke'yinte qo'ye.