Read kumam Números 14 Bible Online

Números 14 - kumam bible

Números 14

¹Tzyettzun kysch'in aj Israel tu'n kyxob'il; ex aq'b'il kyu'n in che oq' wen.

²Ex kykyaqil e ok ten yolil mya b'a'n ti'j Moisés ex ti'j Aarón, in kyma'n: Mas b'a'nwtlo noqwit max xqo kyim tuj Egipto ex qa tzalu tuj tzqij tx'otx'.

³¿Tiqu'n xqo tzaj ti'n Qman tu'n qpon tuj tx'otx' ma chixin? Ex qo kymel tuj q'oj ex qe qxu'jil ex qe qk'wa'l che tzyetel kyu'n aj q'oj ex che xel kyi'n. Maslo b'a'n tu'n qaj tuj Egipto.

⁴Ex in kyma'n kyxolx: E tok qq'o'n jun nejenel qxol ex e qaj meltz'aj tuj Egipto.

⁵Atzunte Moisés ex Aarón e kub' mutzq'aj ex pon takl tib'aj kywitz max twitz tx'otx' kywitz kykyaqil tnam xjal.

⁶Atzunte Josué aju tky'ajal Nun, tuk'ix Caleb aju tky'ajal Jefone, aqeju otoq che'x aj ke'yilte tx'otx' Canaán, el kysb'it'un kyxb'alun kyi'j tu'n kyb'is,

⁷ex xi kyma'n kye kykyaqil aj Israel: —Aju tx'otx' o'x aje ke'yilte, puro tb'anilxix.

⁸Qa ma tzalaj Qman qi'j, ax te k'onil qe tu'n qkanun tuj tx'otx' ex ktzajel tq'o'n qe. Aju tx'otx' lu q'inun tx'otx' ex tb'anilxix.

⁹Ex mi'n jaw kyi'n kyib'e ti'j Qman, ex mi'n che xob'e kywitz xjal ate' ma chixin, porke qe xjal lu jurat naj kb'el kyi'j qu'n; mi a'l kolol kyi'j, atzun qe, at Qman quk'il. Mi'n che xob'e kywitz, che chi, xi kyma'n.

¹⁰Atzun kye xjal o kyajb'e tu'n tok kyxo'n ab'j kyi'j. Kub'tzun tyek'un tib' t-spik'umal Qman kywitz kykyaqil aj Israel tib'aj ja xb'alun te mojb'ab'l tib'il,

¹¹ex tzaj tma'n Qman te Moisés: —¿Jtoj b'an txi kykolin xjal tu'n kyik'un wi'je? ¿Jtoj b'an txi kykolin tu'n mi'n tqe' kyk'u'j wi'je, ex o b'ant nimku techal wu'ne kyxol?

¹²Tzul nsama'ne tx'u'j yab'il kyi'j tu'n kykyim ex tu'n mi'n kyetzan ti'j tx'otx' Canaán; ex ti'ja k'elel jun tnam ma'xix wu'ne ex mas tipun ik tza'n kye, chi Dios te Moisés.

¹³Atzunte Moisés xi ttzaq'we'n te Qman: —Oklo kyb'i aj Egipto, jatum e etz ti'na tnam xjal lu tu'n tipumala,

¹⁴ex kxel-lo kyma'n kye tnam xjal najl tuj Canaán. Ax ikx kye aj Canaán o kyb'i qa aya Nman Dios tkub'a kyxol tnam xjal lu, ex twitzelaya in kub' tyek'un tib'a kywitz, ex aju muj jatum tokxa tuj, tkub' kyib'aj; nejliya kywitz te q'ijl tuj txqan muj ex te qonik'an tuj txqan q'aq'.

¹⁵Qa ma che kub' tb'yo'na tnam xjal lu, qe nmaq tnam o kyb'i tqanil ti'ja ok kyma:

¹⁶Mix ma b'ant tu'n Kydios tnam xjal aj Israel tu'n kypon tuj tx'otx' Canaán, aju xi ttziyan tu'n t-xi tq'o'n kye, ex kyja'tzun ma che kub' tb'yo'n tuj tzqij tx'otx'.

¹⁷Tiltzun Nman Dios, yek'untza nimxix tipumala ja'lo, ik tza'nx o tzaj ttziyana, porke o tmaya

¹⁸qa minti' in jaw q'ojl naja, ma'xix tk'ujlalila ex in kub' tnajsa'na mya b'a'n ex ttx'u'jil wib'aj, maske minti' nnik'x ti'j tu'na tu'n mi'n tkub' tcastiw jun xjal at til, noq o'kx in kub' tq'o'na kycastiw k'wa'lb'aj tu'n tlaj mya b'a'n kyb'inchb'en kyman, kyuk'ix qe tal chmamb'aj ex qe ttxk'a chmamb'aj.

¹⁹Tu'nju tk'ujlalila ma'xix najsankuya aju mya b'a'n ma b'ant kyu'n tnam xjal lu, ik tza'n ma ten tpasensa kyi'j tej maxtoq ate' tuj Egipto ax ikx ja'lo.

²⁰Atzunte Qman tzaj ttzaq'we'n: —B'a'n, ma kub' nnajsa'ne kyil ik tza'nx ma tmaya weye,

²¹ex kxel nma'ne teya jun yol axix tok wu'nx wib'e, ex axix tok nojni tkyaqil twitz tx'otx' tu'n wajwalile:

²²Kykyaqil qeju o kyil nspik'umale ex qe techal e b'ant wu'ne tuj Egipto ex tuj tzqij tx'otx', ex ma chin ok q'o'ne kyu'n tuj nimku joyb'il wi'je ex minti' in chinx kyniman,

²³ax tok, mi jun kye ok kyila' aju tx'otx' xi ntziyane kye qtzan kyxe'chel. Mi jun kye qeju ma che el ik'unte weye ok kyila' aju tx'otx'.

²⁴Atzunte nmajene Caleb, tu'nju ma ten junxitl t-ximb'etz ex ma chinx tniman tuj tkyaqil, kxel nq'o'ne amb'il te tu'n tpon tuj tx'otx' xi aj ke'yilte, ex aqe tiyjil che najal tuj.

²⁵Qe aj Amalec ex qe aj Canaán, atzun najlqe tuj chq'ajlaj. Atzun kyeye, kyaj meltz'aje nchi'j ex kyxi'ye tuj b'e in xi' tuj tzqij tx'otx' tumlal mar Kyaq Ke'yin.

²⁶Ex tzaj tma'ntl Qman te Moisés ex te Aarón kyja':

²⁷—¿Kukxpe k'ik'elex ta'w kyyol aj Israel wu'ne, aqe jumajx mya b'a'n qe? Ma nb'iye in che yolin mya b'a'n wi'je.

²⁸Q'manxa kye kyja': Aqine Dios kxel nma'ne jun yol axix tok wu'nx wib'e: Ik tza'n kyyole ma nb'iye, ikxtzun kb'antel kyi'je wu'ne.

²⁹Kykyaqil qeju o japun winqin ab'q'i kyu'n, ik tza'nx in tma'n tuj kyajlal xjal o jaw, ex ma che yolin mya b'a'n wi'je, che kymel, ex aju kyximlal kyjel pale' tuj tzqij tx'otx' lu.

³⁰Mi jun kye kpol tuj tx'otx' xi ntziyane aju tu'n kypon najal tuj, noq o'kx Caleb aju tky'ajal Jefone, tuk'ix Josué aju tky'ajal Nun, che pol tuj tx'otx' lu.

³¹Atzun kye kyk'wa'le, aqeju o kymaye qa tu'n kykub' tz'aq tuj kyq'ab' aj q'oj kyi'je, che xel wi'ne tu'n kypon najal tuj tx'otx' aju ma tz'el kyik'une.

³²Atzun kyeye, che kyjel pale'ye kyimni qeye tuj tzqij tx'otx' lu.

³³Atzun qe kyk'wa'le ax che pastoril kyalun 40 ab'q'i tuj tzqij tx'otx' lu. Nim k'ik'elex kyu'n tu'n tlaj mya b'a'n ma b'ant kyu'ne, okxi kyb'aj kyime tzalu tuj tzqij tx'otx'.

³⁴Aqeju e je'x aj ke'yilte tx'otx', e ten 40 q'ij tu'n tik' kywitz ti'j, ax ikxtzun 40 ab'q'i kchjetel kyile; jun ab'q'i ti'j jun q'ij. Atzun k'elel kynik'e ti'j alkye in tzaj tu'nju in chin q'ojine kyi'je.

³⁵Aqine Dios in xi nma'ne jlu: Atzun kb'antel wu'ne kyi'j tnam xjal lu, aqeju jawni kywitz ex ma jaw kyi'n kyib' wi'je. Tujx tzqij tx'otx' lu che b'ajel kyim.

³⁶Aqeju xinaq e je'x t-sama'n Moisés ke'yilte tx'otx', ex tej kyul meltz'aj o kyma tqanil mya b'a'n ti'j tx'otx', ex tu'n kyyol xjal lu e ok ten kykyaqil tnam xjal yolil mya b'a'n ti'j Moisés,

³⁷aqeju xinaq lu tzaj jun k'ixb'isab'l kyib'aj ex e kyim tu'n Qman.

³⁸Kyxol kykyaqil qeju e je'x aj ke'yilte tx'otx', o'kx te Caleb aju tky'ajal Jefone, tuk'ix Josué aju tky'ajal Nun e kyaj ten ex minti' e kyim.

³⁹Tejtzun t-xi ttx'olb'a'n Moisés kye aj Israel aju otoq tma Qman te, kykyaqil aj Israel e b'isun nimxix wen,

⁴⁰ex te juntl q'ij te prim e jaw we', e jax twi witz ex kyma: —Ax tok ma qo b'inchan il, atzun ja'lo qo' tuj lugar o tzaj ttziyan Qman qe.

⁴¹Atzunte Moisés xi tma'n kye: —¿Tiqu'n ma che ik'e tib'aj tyol Qman? Mya b'a'n k'elel te kyeye.

⁴²Tiltzun mi'n che jaxe, ex mi a'l Qman kyuk'ile ex kb'el kyi'je kyu'n aj q'oj kyi'je,

⁴³ex lu qe aj Amalec ex qe aj Canaán in che ayon kyi'je tu'n kyq'ojin kyuk'ile ex tu'n kykub' b'yo'ne kyu'n. Tu'nju ma tz'el kypa'n kyib'e ti'j Qman, kyja'tzun mi a'l Qman kyuk'ile, chi Moisés kye.

⁴⁴Atzun kye minti' xi kyb'i'n tu'n mi'n kyjax twi witz ex e jax o'kx kye. Atzunte Moisés tuk'ix kax k'ub'l tley Dios ax e kyaj ten tuj campament.

⁴⁵E etztzun qe aj Amalec kyuk'ix qe aj Canaán, aqeju najlqe tuj lugar lu, e ok ten q'ojlel kyi'j aj Israel, kub' kyi'j kyu'n ex e je'x lpe' kyi'j tejxi kypon tuj lugar Horma.