Read kumam Números 16 Bible Online

Números 16 - kumam bible

Números 16

¹Attoq jun aj Leví, tiyjil Coat, Coré tb'i, tky'ajal Izhar, tuk'ix oxetl xinaq tiyjil Rubén, Datán tb'i jun ex Abiram tb'i juntl, tky'ajal Eliab qe, tuk'ix On aju tky'ajal Pelet,

²jaw kyi'n kyib' ti'j Moisés. Ex kyi'jtzun qe jlu ok kymojb'antl kyib' 250 xinaq aj Israel, nejenel qe kye tnam xjal, ex ajun qe kyok te tajlal kyxol qeju in che q'onte kyconsej xjal, ex b'a'n yolb'il kye.

³Kykyaqiltzun qe xinaq lu ok kychmon kyib', e jaw tilj ti'j Moisés ex ti'j Aarón ex xi kyma'n kye: —Akux tu'n kykawine qib'aje, ex kykyaqil tnam xjal xjan qe ex at Qman quk'il qkyaqil. ¿Tiqu'ntzun nno'k kyq'on kyib'e te kawil ma'xix kyoklene kyib'aj tnam xjal etzan tu'n Qman? Che chi.

⁴Tejtzun tb'inte Moisés jlu, kub' mutzq'aj ex pon takl tib'aj twitz max twitz tx'otx',

⁵ex xi tma'n te Coré ex kye qeju otoq moje' kyyol tuk'il: —Nchi'jxi prim ktzajel tyek'un Qman alkye aju axix tok te Qman ex alkye aju axix tok xjan, ex ax te Qman kjawil sk'onte alkyeju xjal tajb'il Qman tu'n tpon laq'e' twitz.

⁶Aya Coré, kyuk'ix qe tuk'ila, kyb'inchame jlu: B'ix tzaj kyi'ne ẍla'k patb'il storak,

⁷b'ix ku'x kyq'o'ne xq'a'l kyuj, tuk'ix storak, ex kyq'o'n kub'tzune twitz Qman nchi'j. Aju xinaq kjawil t-sk'o'n Qman, atzunte xjansamaj. Akuxtzun tjaw kyi'n kyib'e wi'je, aqeye aj Leví.

⁸Ax ikx xi tma'ntl Moisés te Coré: —Chin kyb'intze, aqeye aj Leví:

⁹¿Maj ch'intzun t-xilen tuj kywitze tu'nju ma che jaw sk'o'ne tu'n Dios kyxol tnam xjal aj Israel tu'n kytene niqayin twitz, tu'n kyajb'ene tuj tja Dios ex tu'n kyajb'ene kyxol tnam xjal?

¹⁰Ate Qman jaw sk'onte teya ex kye txqantl aj Leví, aqeju at t-xilena kyuk'il, tu'n kytene niqayin twitz, atzun ja'lo ¿kyajb'ile tu'n kyoke te pal?

¹¹Kyja'tzun aya kyuk'ix qe tuk'ila ma jaw kyi'n kyib'e ti'j Qman, ex ¿ti t-xilen Aarón tu'nju in che yoline mya b'a'n ti'j?

¹²E je'xtzun txokb'aj Datán tuk'ix Abiram aqeju tky'ajal Eliab, tu'n Moisés, atzun kye tzaj kytzaq'we'n: —Mlay qo'xe.

¹³¿Ch'inpetzun t-xilen tuj twitza tu'nju ma qo etz ti'na tuj Egipto, tuj jun tx'otx' tb'anilxix ex q'inun tx'otx', tu'n qkyime tu'na tuj tzqij tx'otx' lu, ax ikx taja tu'n toka te jun nejenel ma'xix toklen qib'aje?

¹⁴Na'nx qxi ti'na tuj tx'otx' tb'anilxix ex q'inun tx'otx' ex na'nx ttzaj tq'o'na qkojb'ile ex qe tqan q-uvaye. ¿Che xelpe ti'na kykyaqil xjal ik tza'n moẍ qe? Mi'n, mlayx qo'xe, che chi.

¹⁵Tzajtzun nimxix tq'oj Moisés ex xi tma'n te Qman: —Mi'n txi tk'mo'na kyoyaj xjal lu. Misikyer jun kybur ma tz'el wi'ne ex b'ajx nb'inchaye jun mya b'a'n kyi'j.

¹⁶Te tib'ajxi jlu xi tma'n Moisés te Coré: —Aya kyuk'ix qe tuk'ila, b'ix che pone nchi'j twitz Qman ex tuk'ix Aarón ktel ma chixin.

¹⁷Teyle te junjun tu'n t-xi ti'n t-ẍla'k tku'x storak tuj. Ax ikx teya tuk'ix Aarón kxel kyi'ne kyẍla'ke, ex kb'el kyq'o'ne twitz Qman junx tuk'il kyẍla'k 250 xinaq.

¹⁸Teylex te junjun tzaj ti'n t-ẍla'k, ex ku'x tq'o'n xq'a'l tuj tuk'ix storak, ex e kub'tzun ten twitz ja xb'alun te mojb'ab'l tib'il, junx tuk'il Moisés ex Aarón.

¹⁹Otoq che b'aj tchmo'n Coré kykyaqil tnam xjal twitz ja xb'alun te mojb'ab'l tib'il tu'n tjaw kyi'n kyib' ti'j Moisés ex ti'j Aarón. Kub'tzun ten tajwalil Qman kywitz kykyaqil tnam xjal,

²⁰ex tzaj tma'n Qman te Moisés ex te Aarón:

²¹—Kypa'mil kyib'e kyi'j tnam xjal lu, porke noq minab'en che najel wu'ne ja'lo.

²²Atzun kye e kub' mutzq'aj ex pon takl tib'aj kywitz max twitz tx'otx', ex kyma: —Qman Dios, tu'na in tzaj tq'o'na kychwinqlal kykyaqil xjal, ¿Maj ktzajeltzun tq'oja kyi'j kykyaqil tnam xjal noq tu'n tlaj til jun xjal?

²³Atzunte Qman tzaj ttzaq'we'n te Moisés ex tma:

²⁴—Q'manxa kye kykyaqil aj Israel tu'n kyel laq'e' kyi'j qe ja xb'alun jatum kyokxsa'n Coré, Datán ex Abiram.

²⁵Jawtzun we' Moisés ex xi' jatum ate'toq Datán ex Abiram ex e ok lpe' qe kytijil xjal aj Israel ti'j.

²⁶Xitzun tma'n Moisés kye tnam xjal kyja': —Kyel laq'e'ye kyi'j kyja xjal jumajx mya b'a'n qe, ex mi'n tz'ok kymako'ne jun ti'xti at kye, tu'ntzun mya ajun qeye tu'n kynaje tu'n tlaj kyil.

²⁷E je'ltzun laq'e' tnam xjal kyi'j kyja Coré, Datán ex Abiram. Atzunte Datán ex Abiram e je'tz ex e kub' ten ttzi kyja, xb'alun ja, kyuk'ix qe kyxu'jil ex qe kyk'wa'l.

²⁸Ex tmatl Moisés: —Ja'lo k'elel kynik'e ti'j qa ate Qman ma tzaj samante weye tu'n tb'ant tkyaqil jlu wu'ne, ex mya tu'n wexe nnik' in b'ant jlu.

²⁹Qatzun ma che kyim xjal lu ik tza'nx in che kyim kykyaqil xjal, myatzun a Qman ma tzaj samante weye;

³⁰ex qa ma tb'incha Qman jun ak'aj tb'inchb'en; qa ma tz'el k'ab'chaj tx'otx' ex qa ma che'x tz'aq xjal lu tuj tuk'ix tkyaqilju at kye, ex itz'x qe ok kyku'pun tz'aq max tuj kynajb'il kyimni, k'eleltzun kynik'e ti'j qa aqe xjal lu ma che el ik'unte Qman.

³¹Tejtzun tb'aj yolin Moisés, el k'ab'chaj tx'otx' jatum kykub'sa'ntoq

³²ex e je'x tz'aq qe xjal tuj, aqeju otoq moje' kyyol tuk'il Coré, kyuk'ix qeju ate' tuj kyja ex tkyaqilju at kye.

³³Itz'x qe tej kyku'pun tz'aq tuj kynajb'il kyimni tuk'ix tkyaqilju at kye, ex oktzun tmojb'an tib' tpa'xil tx'otx' juntl maj. Kyja'tzun tten e kyim ex b'i'x e kub' naj kyxol aj Israel.

³⁴Tejtzun kyb'inte aj Israel, aqeju ate'toq kyi'jele, in che sch'intoq xjal lu, e je'l oq ex kyma: Noq qo'x tz'aq tuj tpa'xil tx'otx'.

³⁵Ax ikx tzaj t-sama'n Qman jun q'aq', ex tu'n jlu e b'aj tz'e'y qeju 250 xinaq, aqeju e kub' patunte storak.

³⁶Tzajtzun yolin Qman tuk'il Moisés ex tma:

³⁷Q'manxa te Eleazar aju tky'ajal pal Aarón tu'n kyetz ti'n tuj q'aq' qe ẍla'k patb'il storak, ex tu'n tex tqo'n najchaq wen aju xq'a'l at kyuj, porke xjansamaj qe ẍla'k lu.

³⁸Qe kyẍla'k qe xjal ma che naj tu'n tlaj kyil, xjansamaj qe, porke o che ajb'en tu'n tkub' q'o'n storak nwitze. E kyb'aj tx'ino'n qe ẍla'k lu, tu'n kyb'ant lámina kyi'j, tu'n kyok lo'tzit ti'j altar, tu'ntzun tajb'en te jun techal kye aj Israel, chi Dios.

³⁹Jawtzun tchmo'n pal Eleazar qe ẍla'k q'an k'uxb'il kytx'otx'il, aqeju otoq tzul kyi'n qe xjal otoq che kyim tu'n q'aq', ex xi tma'n tu'n kyb'aj b'incha'n qe lámina kyi'j, tu'n kyok lo'tzit ti'j altar.

⁴⁰A jlu ajb'en te jun techal kye aj Israel, qa mi jun jaku pon laq'e' ti'j altar tu'n tkub' tpatun storak twitz Qman qa mya tiyjil Aarón. Qatzun at jun ma tb'incha ikju, ax kb'ajel ti'j ik tza'n o b'aj ti'j Coré ex kyi'j qe tuk'il. Tb'inchatzun Eleazar tkyaqil ik tza'nx otoq tma Qman te Moisés.

⁴¹Tuj juntl q'ij kykyaqil tnam xjal aj Israel e ok ten yolil mya b'a'n ti'j Moisés ex ti'j Aarón ex kyma: —Aqeye ma che kub' b'yonte kye tnam xjal etzan tu'n Qman.

⁴²Tzaj kyq'oj xjal, ex tej tok kychmon kyib' kyi'jele Moisés ex Aarón xi kyke'yin ti'j ja xb'alun te mojb'ab'l tib'il, lu otoq kub' ten txqan muj tib'aj ex kub' tyek'un tib' tajwalil Qman.

⁴³Atzunte Moisés tuk'ix Aarón e je'x twitz ja xb'alun te mojb'ab'l tib'il,

⁴⁴ex tzaj tma'n Qman te Moisés kyja':

⁴⁵—Kypa'mil kyib'e kyi'j xjal lu, porke noq minab'en che najel wu'ne ja'lo. Atzunte Moisés tuk'ix Aarón e kub' mutzq'aj ex pon takl tib'aj kywitz max twitz tx'otx'.

⁴⁶Xitzun tma'n Moisés te Aarón: —Q'intza t-ẍla'ka, q'on ku'xa xq'a'l tuj, aju tkub' tib'aj altar, q'o'n ku'xa storak tuj, txi'ya jurat naj jatum ate' tnam xjal, patun kub'a storak ex qaninxa te Dios tu'n tnajset kyil, porke ma tzaj nimxix tq'oj Qman kyi'j ex ya ma tzyet tu'n kykyim xjal, chi Moisés.

⁴⁷B'anttzun tu'n Aarón aju xi tma'n Moisés te, ex xi qelan jatum ate' tnam xjal. Otoq tzyet tu'n kykyim tnam xjal tu'n k'ixb'isab'l otoq tzaj t-sama'n Qman. Atzunte Aarón kub' tpatun storak ex xi tqanin te Dios tu'n tnajset kyil tnam xjal.

⁴⁸Kub'tzun ten Aarón kyxol qeju otoq che kyim kyuk'il qeju itz'x qe, ex we'tzun tu'n kykyim xjal.

⁴⁹Aqeju xjal e kyim tu'nju k'ixb'isab'l lu, japun jun tajlal te 14,700, ex part qeju otoq che kyim noq tu'n tlaj til Coré.

⁵⁰Tejtzun twe' tu'n kykyim xjal, ajtzun meltz'aj Aarón ttzi ja xb'alun te mojb'ab'l tib'il jatum ta'toq Moisés.