Read kumam Números 17 Bible Online

Números 17 - kumam bible

Números 17

¹Tzaj yolin Qman tuk'il Moisés ex tma:

²Q'manxa kye aj Israel: Il ti'j tu'n ttzaj kyi'n teyle junjun nejenel kye junjun k'loj kyiyjil jun ky'aqo'ch, ex qa tu'n tul kyi'n kab'laj ky'aqo'ch tu'n tkyaqil, ex tz'ib'an oka tb'i teyle junjun nejenel ti'j tky'aqo'ch.

³Tz'ib'an oka tb'i Aarón ti'j tky'aqo'ch tiyjil Leví, porke tzul kyi'n jun ky'aqo'chb'aj te junjun nejenel kye junjun k'loj kyiyjil aj Israel.

⁴Atzun che b'el tq'o'na tuj ja xb'alun te mojb'ab'l tib'il, twitz kax k'ub'l nleye jatum in kub' nyek'un wib'e twitza.

⁵Kb'antel wu'ne tu'n ttzaj t-xul tky'aqo'ch aju xinaq kjawil nsk'o'ne, tu'ntzun mi'n kukx kyyolin aj Israel mya b'a'n kyi'je nwitze, chi Dios.

⁶Xi tma'n Moisés tkyaqil jlu kye aj Israel, ex teyle junjun nejenel kye junjun k'loj kyiyjil xi tq'o'n tky'aqo'ch te Moisés. Kab'laj ky'aqo'ch b'ant tu'n tkyaqil ex tuk'ix tky'aqo'ch Aarón ok te tajlal kyxol.

⁷E kub'tzun tq'o'n Moisés qe ky'aqo'ch lu twitz Qman tuj ja xb'alun te mojb'ab'l tib'il.

⁸Tuj juntl q'ij, tej tokx Moisés tuj ja xb'alun te mojb'ab'l tib'il, o til aju tky'aqo'ch Aarón kyi'j qe tiyjil Leví, otoq tzaj t-xul, otoq tz'ok t-xmakal ex attoq twitz almendro otoq q'anix ti'j.

⁹Etztzun ti'n Moisés kykyaqil ky'aqo'ch twitz Qman ex xi tyek'un kye aj Israel. Tb'ajlenxitzun kyke'yin, teyle junjun xi ti'n ju tky'aqo'ch.

¹⁰Tzajtzun tma'n Qman te Moisés: Q'o'n okxa juntl maj tky'aqo'ch Aarón twitz kax k'ub'l nleye, ex axtzun k'u'n kyaja te jun techal kye tnam xjal lu mib'an che b'in. Kyja'tzun kmayetel tu'na, tu'n mi'n kyyolintl mya b'a'n wi'je, tu'ntzun mi'n kykyim.

¹¹Tb'inchatzun Moisés tkyaqil ik tza'nx otoq tzaj tma'n Qman te,

¹²atzun kye aj Israel xi kyma'n te Moisés: Ma qo najxe. Qkyaqile qo kymele.

¹³Kykyaqil qeju in che pon laq'e' ti'j ja xb'alun te mojb'ab'l tib'il b'i'x in che kyim. ¿Maj qo najeltzune qkyaqile? Che chi xjal.