Read kumam Números 20 Bible Online

Números 20 - kumam bible

Números 20

¹E pon kykyaqil aj Israel tuj tzqij tx'otx' Zin tuj tnejel xjaw te ab'q'i, ex ax e kub' ten mya nim q'ij tuj Cades. Atzun kyim María ex ax ku'x maqu'n.

²Tuj lugar lu minti' knet kyk'a xjal a', e ok kychmon kyib' kykyaqil tu'nju at kyq'oj ti'j Moisés ex ti'j Aarón,

³ex tzaj kyyol ti'j Moisés: —Maswitlo b'a'n noqwit b'i'x o kyime junx kyuk'il qe qtzan qermaniye e kyim tu'n Qman.

⁴¿Ti til e tzaj ti'na qe xjal etzan tu'n Qman tu'n kyul tuj tzqij tx'otx' lu? ¿Maj tajtzuna tu'n qkyime kyuk'ix qe qalune?

⁵¿Tiqu'n o jetz ti'na tuj Egipto tu'n qul ti'na tuj lugar lu puro xob'ajil? Minti' ch'in qawal b'a'n tu'n tku'x qawa'n tuj; minti' tqan higo, minti' tqan uva, minti' tqan karnad ẍoq'; minti'lpe a' te qk'a, che chi.

⁶Atzunte Moisés tuk'ix Aarón el kypa'n kyib' kyi'j xjal, e je'x ttzi ja xb'alun te mojb'ab'l tib'il, e kub' mutzq'aj ex pon takl tib'aj kywitz twitz tx'otx'. Kub' tyek'un tib' t-spik'umal Qman kywitz,

⁷ex tzaj tma'n Qman te Moisés:

⁸—Chmon oka tnam xjal, aya tuk'ix ttzika Aarón, tzyuma aju var ex q'manxa te pik, kywitzx kykyaqil tnam xjal, tu'n tetz a' tuj, ex k'eletztzun a' tuj pik tu'n kyk'an tnam xjal kyuk'ix kyalun.

⁹Jawtzun ttzyu'n Moisés aju var tkub' twitz Qman ik tza'nx otoq tma Qman te.

¹⁰B'aj kychmo'n Moisés tuk'ix Aarón tnam xjal t-xe pik ex tma Moisés kye: —Kyb'inxe, aqeye xjal mib'an che b'in: ¿K'eletzpe a' qu'ne tuj pik lu te kyk'a'ye?

¹¹Jaw ti'n Moisés tq'ab' ex ok tpeq'an kab' maj aju pik tu'nju var, ex etz nimxix a' tuj pik. E oktzun ten xjal k'al a' kyuk'ix kyalun.

¹²Atzunte Qman tma te Moisés ex te Aarón: —Tu'nju minti' xqe' kyk'u'je wi'je ex minti' ẍin jaw kynimsa'ne kywitz aj Israel, mlay che okx kyi'ne qe xjal tuj tx'otx' tziyimaj wu'ne kye, chi Dios.

¹³Atzun tb'i twi a' lu Meriba,[1] jatum e jaw yolin aj Israel ti'j Qman, ex atzun tzaj tyek'un Qman kye qa xjan te.

¹⁴Matoq ate' tuj Cades e je'x t-sama'n Moisés junjun t-sanjel tu'n kypon tuk'il rey te Edom ex tu'n t-xi kyma'n te: Qe termaniya aj Israel ma tzaj kyma'n teya kyja': B'a'n tu'na aju yajb'il ma tzik'x qu'ne.

¹⁵Qe qtzan qxe'chele e je'x tuj Egipto ex nim tyemp o qo tene ma chixin, o qo yajlanjtze kyu'n aj Egipto ik tza'nx yajb'il kye qtzan qxe'chele,

¹⁶o kub'sane twitz Qman, o tzaj tb'i'n tq'ajq'ajel qwi'ye, tzaj t-sama'n jun anjel, ex o etz q'i'ne tu'n tuj Egipto. Atzun ja'lo lu qo'ye ato'ye tuj tnam Cades aju tmojonin tib' tuk'il ttanmiya.

¹⁷In qo kub'sane twitza tu'n ttzaj tq'o'na amb'il qeye tu'n qik'x b'ete tuj ttx'otx'a. Mi'n qo ik'x b'ete tuj tx'otx' at awal tuj, mi tuj tqan uva, ex mi'n qo k'ane ti'j a' kyuj qe t-xocha. Tuj ninb'e qo b'etele, ex mi'n txi qi'ne juntl b'e okxi qexe ti'jxi ttx'otx'a, che chi.

¹⁸Tzaj ttzaq'we'n rey te Edom: —Mi'n che ik'x b'ete tuj ntx'otx'e, ex qatzun ma che ik'x b'ete, chin elexe kyuk'il qe nsoldadiye q'ojlel kyi'je.

¹⁹Xi kytx'olb'a'n juntl maj qe aj Israel: —O'kx tuj ninb'e qo ik'x b'ete. Aqo'ye ex qe qwakẍe, qa ma qo k'ane ti'j a' kyuj t-xocha jaku qchoje teya. O'kx qeye qajb'ile, tu'n qik'x b'ete tuj ttx'otx'a.

²⁰Tzaj ttzaq'we'n rey te Edom: —Mlay che ik'x b'ete. Etztzun rey te Edom q'ojlel kyi'j aj Israel kyuk'ix nimku t-soldad, q'i'mlex kymakb'il te q'ojb'il,

²¹ex minti' o taq' rey te Edom amb'il kye aj Israel tu'n kyik'x b'et tuj ttx'otx'. Tu'n jlu xi kyi'n aj Israel juntl b'e.

²²Kub' b'e kyu'n kykyaqil aj Israel, e je'tz tuj Cades ex e pon t-xe witz Hor.

²³Atzun tuj tmojonil tx'otx' Edom tuk'ix witz Hor o tma Qman te Moisés ex te Aarón:

²⁴Kymel Aarón ex mlay pon tuj tx'otx' o txi ntziyane kye aj Israel, tu'nju e ik'e tib'aj nyole tuj Meriba jatum etz twi a'.

²⁵Aya Moisés, q'inxa Aarón tuk'ix Eleazar aju tky'ajal, ex q'i'n jaxa qe twi witz Hor,

²⁶atzun k'elel ti'na t-xb'alun Aarón, aju t-xb'alun pal, ex k'okel tq'o'na ti'j Eleazar, ex axtzun kymel Aarón ex kpol kyuk'il qe qtzan t-xe'chel.

²⁷Tb'inchatzun Moisés ik tza'nx otoq tma Qman te, ex o kyil kykyaqil xjal tej kyjax twi witz.

²⁸Atzun el ti'n Moisés t-xb'alun Aarón, aju t-xb'alun pal, ex ok tq'o'n ti'j Eleazar aju tky'ajal Aarón. Axtzun kyim Aarón twi witz Hor; atzunte Moisés tuk'ix Eleazar e ku'tz twi witz.

²⁹Tejtzun kyb'inte kykyaqil aj Israel qa otoq kyim Aarón, e ok ten oq'el 30 q'ij ti'j.