Read kumam Números 21 Bible Online

Números 21 - kumam bible

Números 21

¹Tej tb'inte ju rey aj Canaán, aju najltoq tuj Néguev ex rey te tnam Arad, qa kyja' kyxi' aj Israel tuj b'e te Atarim, etz q'ojlel kyi'j ex e jaw ttzyu'n junjun xjal tuj q'oj tu'n kyxi ti'n pres.

²Xitzun kytziyan aj Israel jun yol te Qman kyja': Qa ma tz'onina qi'je tu'n tkub' ti'j nintz tnam lu, kb'eltzun qxitune kykyaqil tnam ate' tjaq' kykawb'il.

³Tb'inchatzun Qman kye aj Israel ik tza'nx otoq txi kyqanin, ex onin Qman kyi'j tu'n tkub' kyi'j aj Canaán. Kub'tzun kyi'j aj Canaán kyu'n aj Israel, ax ikx e tenb'a qe txqantl tnam ate' tjaq' kykawb'il; tiltzun ok q'o'n tb'i lugar lu Horma.[2]

⁴E ik'tzun aj Israel twi witz Hor, e b'et tumlal mar Kyaq Ke'yin, tu'n kykuman ti'j kytx'otx' aj Edom. B'ajtzun kypasens xjal tuj b'e,

⁵ex e ok ten yolil mya b'a'n ti'j Dios ex ti'j Moisés, in kyma'ntoq: —¿Tiqu'n xqo etz kyi'ne tuj Egipto noq tu'n qb'aj kyime tuj tzqij tx'otx'? Minti' qk'a a' ex minti' qwa. Ma b'aj qgane tu'n qwa'ne ti'j wab'j lu mya tb'anil.

⁶E jawtzun jlet qe lob'aj tu'n Qman, aqeju in che kyim xjal kyu'n, tu'ntzun kyok tx'a'n aj Israel, ex nim aj Israel e b'aj kyim kyu'n lob'aj.

⁷E pontzun aj Israel tuk'il Moisés ex xi kyma'n te: —Ma qo b'inchane il tu'nju ma qo yoline mya b'a'n ti'j Dios ex ti'ja. Kub'sana twitz Qman tu'n kyel tlaq'b'a'n qe lob'aj qi'je. Oktzun ten Moisés kub'sal twitz Qman tu'n tkub' tnajsa'n kyil aj Israel.

⁸Tzajtzun tma'n Qman te: —B'inchan kub'a jun tilb'ilal lob'aj q'an k'uxb'il ttx'otx'il, ex q'o'n jaxa ti'j jun tze'. Oktzun tok tx'a'n jun xjal tu'n lob'aj, qa ma txi tke'yin ti'j tilb'ilal lob'aj tok ti'j tze', k'anq'il, mlay kyim.

⁹Kub'tzun tb'incha'n Moisés jun tilb'ilal lob'aj q'an k'uxb'il ttx'otx'il, ex jax tq'o'n twi' jun tze'. Oktzun tok tx'a'n jun xjal tu'n lob'aj, o'kx ok t-xi tke'yin ti'j tilb'ilal lob'aj q'an k'uxb'il ttx'otx'il, minti'tzun in kyim.

¹⁰Kub' b'e kyu'n aj Israel ex atzun e kub' ten tuj lugar Obot.

¹¹Kyexlenxi tuj Obot, xi kyi'ntl kyb'e ex atzun e kub' tentl tuj lugar Ije-abarim tuj tzqij tx'otx', tumlal tjawitz q'ij te kytx'otx' aj Moab.

¹²Kyexlenxi tuj lugar lu, xi kyi'ntl kyb'e ex atzun e kub' tentl ttzi tq'ab' xaq Zered.

¹³Kyexlenxi tuj lugar lu, xi kyi'ntl kyb'e ex atzun e kub' tentl jlajxi nima Arnón. Aju nima lu, atzun ta' tuj tzqij tx'otx', tzajnix max tuj kytx'otx' aj Amorreo, ex atzun nima lu tok te tmojonil kytx'otx' aj Moab kyuk'il aj Amorreo.

¹⁴Atzun t-xilen aju in tma'n tuj u'j jatum in yolin kyi'j qe q'oj e ok tu'n Qman, chi kyja': O ik'e tuj Vaheb tuj tx'otx' Sufá, kyuj qe tq'ab' xaq ex tuj nima Arnón,

¹⁵kytzi'yile qe tq'ab' xaq, aqeju tzajnix qe' max tuj tx'otx' te Ar ex ponin b'aj max tmojonil Moab.

¹⁶Kyik'lenxi jatum ta' nima Arnón, xi kyi'n kyb'e tu'n kypon max Beer. Atzun ta' xoch jatum xi tma'n Qman te Moisés kyja': Chmon oka tnam xjal ex kxel nq'o'ne a' kye.

¹⁷Atzun q'ij xi kyb'itzan aj Israel jun b'itz kyja': Aya a' tjatz tilja tuj xoch. Kyb'itzanxe b'itz ti'j xoch.

¹⁸Ku'x kylaku'n qe nejenel aju xoch lu kyu'n kyvar te kykawb'il; qe xjal ma' kyoklen tuj tnam ku'x kylaku'n kyu'n kyky'aqo'ch. Kyexlenxi aj Israel tuj tzqij tx'otx', xi kyi'ntl kyb'e ex e pon max tuj lugar Matana;

¹⁹kyexlenxi tuj Matana e pon tuj Nahaliel, kyexlenxi tuj Nahaliel, e pon tuj Bamot,

²⁰ex kyexlenxi tuj Bamot, e pon tuj chq'ajlaj tkub' tuj kytx'otx' aj Moab, tumlal twi witz Pisga, jatum q'ancha'lin lugar tzqij tx'otx'.

²¹Xi kysama'n aj Israel junjun xjal tu'n kypon tuk'il Sehón aju rey kye aj Amorreo, q'malte te kyja':

²²Qajb'ile tu'n qik'x b'ete tuj ttx'otx'a. Mlay qo okxe kyuj qe kojb'il at awal kyuj, mi kyxol qe tqan uva, ex mi'n qo k'ane ti'j a' at kyuj qe t-xocha. Qo elexe tuj ttx'otx'a, ex kyja' qo xe'le tuj ninb'e, che chi.

²³Atzunte Sehón minti' xi tq'o'n amb'il tu'n kyik'x b'et aj Israel tuj ttx'otx', noq o'kx ok tchmo'n kykyaqil t-xjalil, xi'tzun tuj tzqij tx'otx' tuj lugar Jahaza tb'i, ex atzun ok tzoqpaj tu'n tq'ojin kyi'j aj Israel.

²⁴O kub' ti'j rey Sehón kyu'n aj Israel, o tzyet ttx'otx' kyu'n, tzajx qe' ttzi nima Arnón ex pon b'aj ttzi nima Jaboc, ex qa tuk'il tmojonil kytx'otx' aj Amón, aju xq'uqin wen kyu'n soldad.

²⁵Kyja'tzun tten e tzyet kykyaqil tnam kye aj Amorreo kyu'n aj Israel, tuk'ix nintz tnam Hesbón, kyuk'ix txqantl tnam, ex axtzun e kyaj ten najal kyuj.

²⁶Tuj tnam Hesbón atzun najltoq Sehón aju rey kye aj Amorreo. Ate Sehón otoq q'ojin tuk'il rey aju toktoq nej te rey kye aj Moab, ex otoq tz'el ti'n tkyaqil ttx'otx' aju ponin b'aj max ttzi nima Arnón.

²⁷Kyja'tzun, aqeju b'a'n che b'itzan in kyma'n kyja': Kytzaje tuj Hesbón aju nintz tnam te rey Sehón. Kyb'inchan jawe juntl maj, kyq'onke muro ti'j juntl maj.

²⁸O tz'etz q'aq' tuj tnam Hesbón ex o jaw tqan q'aq' tuj nintz tnam te rey Sehón. O naj nintz tnam Ar aju te Moab, kyuk'ix qe kyajaw witz ate' ttzi nima Arnón.

²⁹B'ek'b'il kywitze aqeye aj Moab. Ma che naje aqeye in che k'ulune twitz dios Quemós, aju ma txi q'onte amb'il tu'n kyel oq qe xinaq ate' tuj tkwent, ex qe xu'j ate' tuj tkwent tu'n kykub' tz'aq tuj tq'ab' Sehón aju kyrey aj Amorreo.

³⁰Ma naj tipumal tnam Hesbón, tzajnix qe' tuj tnam Dibón ex ma pon b'aj tuj tnam Nofa; tkyaqil ma b'aj naj ex max pon kanun q'aq' tuj tnam Medeba.

³¹Kyja'tzun e kub' ten aj Israel tuj kytx'otx' aj Amorreo.

³²Ax ikx e je'x t-sama'n Moisés junjun xinaq ke'yilte tnam Jazer, ex o kub' kyi'j tnam kyvesin kyib' tuk'il kyu'n aj Israel, ex e je'x kylajo'n qe aj Amorreo najl kyuj.

³³Te tib'ajxi tzyet kyb'et tumlal tx'otx' Basán, atzunte Og aju rey te Basán etz kyuk'ix kykyaqil qe t-soldad, q'ojlel kyi'j aj Israel tuj tnam Edrei.

³⁴Tzajtzun tma'n Qman te Moisés kyja': Mi'n tzaj t-xob'ila twitz, kxel nq'o'ne tuj tq'ab'a junx kyuk'il kykyaqil t-soldad ex tuk'ix ttanmi. Ikx kb'antel tu'na ti'j, ik tza'n o tb'inchaya ti'j Sehón aju rey kye aj Amorreo, aju najltoq tuj tnam Hesbón, chi Qman.

³⁵Kyja'tzun tten kub' kyb'yo'n aj Israel aju rey Og, kyuk'ix qe tky'ajal ex kykyaqil t-soldad. Mi jun kyaj anq'in kyu'n, ex tzyet ttx'otx' kyu'n.