Read kumam Números 22 Bible Online

Números 22 - kumam bible

Números 22

¹Xi kylajo'ntl kyb'e aj Israel, ex e ten tuj tchq'ajlajil tx'otx' Moab tkub' ttzi nima Jordán tuj tjawitz q'ij, ex twitz tnam Jericó.

²Atzunte Balac aju tky'ajal Zipor o til tkyaqilju otoq kyb'incha aj Israel kyi'j aj Amorreo.

³Ax ikx tzaj nimxix kyxob'il qe xjal aj Moab tej kylonte nimxix kyb'et aj Israel, ex tzaj b'aj kyk'u'j tu'n kylaj aj Israel.

⁴Kymatzun qe aj Moab kye qe tij xjal te Madián: —Kb'ajel naj qtx'otx' kyu'n kykyaqil xjal lu ik tza'n in b'aj twa'n wakẍ k'ul tuj kojb'il, che chi. Tuj tq'ijlalil lu toktoq Balac te rey tuj Moab.

⁵E je'x t-sama'n Balac qe t-sanjel txkolte Balaam aju tky'ajal Beor; atzun ta'toq Balaam tuj Petor niqayin ttzi nima Éufrates tuj tx'otx' Amav. Xi tma'n Balac tu'n t-xi kyma'n te Balaam kyja': At jun tnam ma tzaj tuj Egipto, ma txi t-sipan tib' twitz tx'otx', ex ja'lo ma che kub' ten niqayin nwitze.

⁶B'inchama xtalb'il, tzaja wuk'ile ja'lo, qaninxa mya b'a'n kyib'aj qe xjal lu, ex mas at kyipun qwitze. Qapelo jaku kub' kyi'j wu'ne ikju tu'n kyex nlajo'ne tuj ntanmiye. B'a'n wu'ne aqeju in che kub' tky'iwla'na, in kyk'mo'n ky'iwb'il, ex aqeju in xi tqanina mya b'a'n kyib'aj, in tzaj mya b'a'n kyib'aj, chi Balac, che chikuye.

⁷E je'xtzun qe tij xjal te Moab, ax ikx qe tij xjal te Madián, tuk'ix pwaq xi kyi'n tu'ntzun tchjet Balaam tu'n t-xi tqanin mya b'a'n kyib'aj aj Israel. Tejtzun kypon jatum ta'toq Balaam, xi kyma'n aju yol otoq tma Balac.

⁸Atzunte Balaam xi tma'n kye: —Ax che tene tuj aq'b'il lu, nchi'jxitzun txi ntzaq'we'ne aju kyqanb'etze ik tza'nx ktzajel tma'n Qman weye, chi Balaam. Axtzun e kyaj ten qe tij xjal tuk'il Balaam, aqeju nejenel kye aj Moab.

⁹Kub' tyek'un tib' Dios twitz Balaam ex tzaj tqanin te: —¿Alkye qe xinaq lu ate' tuk'ila?

¹⁰Xi ttzaq'we'n Balaam: —Qe xinaq lu sama'n qe tu'n Balac aju tky'ajal Zipor ex rey te Moab, ma che ul q'malte weye:

¹¹At txqan xjal ma che etz tuj Egipto ex ma b'aj kysipan kyib' twitz tx'otx'. Ttzaj naja, chi Balac, tu'n t-xi tqanina mya b'a'n kyib'aj qe xjal lu. Qapelo jaku kub' kyi'j wu'ne ex tu'n kyex nlajo'ne, chi Balac, che chi qe xjal weye.

¹²Xitzun tma'n Dios te Balaam: —Mi'n txi'ya kyuk'il ex mi'n txi tqanina mya b'a'n kyib'aj xjal lu, ex ky'iwla'n qe wu'ne.

¹³Tejtzun tjaw we' Balaam tuj juntl q'ij, xi tma'n kye kytijil xjal aqeju otoq che tzaj t-sama'n Balac: —Kyaj meltz'aje tuj kytanmiye. Mi'n taj Dios tu'n nxi'ye kyuk'ile.

¹⁴E ajtzun qe nejenel te Moab, e pon tuk'il Balac ex xi kyma'n te: —Minti' ma tkuya Balaam tu'n ttzaj quk'ile.

¹⁵Atzunte Balac xi t-sama'n txqantl nejenel, mas nim kyb'et ex mas ma' ch'intl kyoklen kywitz qeju e je'x nej.

¹⁶E je'xtzun tuk'il Balaam ex xi kyma'n te: —At jun yol ma tzaj q'ma'n teya tu'n Balac aju tky'ajal Zipor, chi kyja': Chin kub'sale twitza, mi'n kub' t-xk'ayin tib'a tu'n ttzaja wuk'ile.

¹⁷Jaku jaw nnimsa'na ex jaku b'ant wu'ne tkyaqilju ktzajel tqanina weye; tzaja ex b'inchama xtalb'il weye tu'n t-xi tqanina mya b'a'n kyib'aj xjal lu, chi Balac.

¹⁸Xi ttzaq'we'n Balaam: —Maske tzaj tq'o'n Balac tkyaqil q'an pwaq ex saq pwaq at tuj tja, mlay chin ik'e tib'aj ju yol ktzajel tma'n Dios weye, tu'n tb'ant jun ti'xti wu'ne qa matij ex qa ch'in.

¹⁹Ja'lotzun ax ikx kyeye ax che tenkje wuk'ile te ju aq'b'il lu, ex jakutzun wile ti ktzajel tma'ntl Dios weye, chi Balaam kye.

²⁰Tuj aq'b'il lu kub' tyek'un tib' Dios twitz Balaam ex tma: —Qa txkol teya ma che ul qe xinaq lu, we'ktza ex txi'ya kyuk'il, ex o'kx kb'antel tu'na aju kxel nma'ne teya.

²¹Tej tjaw we' Balaam tuj juntl q'ij, ok tq'o'n t-siy tbur ex xi' kyuk'il qe nejenel kye aj Moab;

²²tjaxtoq Balaam tib'aj tbur, kyuk'ix kab'e tmajen e je'x tuk'il. Tzajtzun ttx'u'jil Dios ti'j Balaam tu'nju otoq txi' kyuk'il nejenel, ex kub' ten t-anjel Dios tuj b'e tu'n tmaqet tb'e.

²³Tejtzun tlonte bur aju t-anjel Dios tkub'toq tuj tb'e q'i'ntoq jun spad tu'n, ik'x ttxlaj b'e; atzunte Balaam ok tjato'n tbur tu'n asyal tu'ntzun tmeltz'aj juntl maj tuj tb'e.

²⁴Kub' we' juntl maj t-anjel Dios tuj b'e t-xol tqan uva, xi'ynitoq tapya xaq ttxlaj kykab'il pak' b'e.

²⁵Tejtzun tilwaj t-anjel Dios tu'n bur, ok tb'etz'an tib' twitz tapya, tuk'ix tqan Balaam ok b'etz'aj. Atzunte Balaam ok ten juntl maj jatol asyal ti'j tbur.

²⁶Ik' nej t-anjel Dios kywitz, ex kub' we' juntl maj tuj b'e mas ch'in tuj, ex minti' jatum tu'n qex ttxlaj b'e.

²⁷Tej tlonte bur t-anjel Dios, kub' b'une' twitz tx'otx'. Tzajtzun tq'oj Balaam ex b'aj tpeq'an tbur tu'n ttze'.

²⁸B'ant tyolin bur tu'n Dios ex xi tma'n te Balaam: —¿Ti ma nb'inchaye ti'ja? Atzun toxmaji'n chin b'aj tasyalina.

²⁹Xitzun ttzaq'we'n Balaam te tbur: —In xmayina wi'je. Noqwit at jun spad tuj nq'ab'e, ja'lo kub' nb'yo'na.

³⁰Xi ttzaq'we'n bur te: —¿Myapetzun aqine tburra? Aqine in chin iqante teya tkyaqil maj atxix tej npone tuk'ila. ¿Ope nb'inchaye jun maj ti'ja ik tza'n jlu? —Minti', chi Balaam.

³¹Jaqettzun twitz Balaam tu'n Qman, ex o ilwaj t-anjel Qman tu'n, wa'l tkub'toq tuj b'e ex q'i'n jun spad tuj tq'ab'. Kub'tzun ẍmeje' Balaam ex pon takl tib'aj twitz max twitz tx'otx'.

³²Atzunte t-anjel Qman xi tma'n te: —¿Tiqu'n ma b'aj tasyalina ox maj tburra? Aqine ma chin ule maqolte tb'eya, porke aju tb'eya q'i'n mya b'a'n tuj nwitze.

³³Ox maj ma chin ilwaje tu'n tburra ex ma tz'el tkumin tib' wi'je. Noqwit minti' sel tkumin tib' wi'je, mawtlo kyima wu'ne atzunte tburra minti'wtlo xkyim.

³⁴Xi ttzaq'we'n Balaam te t-anjel Qman: —Ma chin b'inchane il, minti'toq b'a'n wu'ne qa aya otoq kub' ten tuj b'e maqolte weye. Qa mya b'a'n ma tz'ela tuj twitza aju nb'eye lu, jaku chin aj meltz'aje, chi Balaam.

³⁵Xi ttzaq'we'n t-anjel Qman: —B'a'n tu'n t-xi'ya kyuk'il xjal lu, ex o'kx q'manxa aju kxel nma'ne teya, chi t-anjel Qman. Xi'tzun Balaam kyuk'il qe nejenel otoq che tzaj t-sama'n Balac.

³⁶Tej tb'inte Balac qa kyja'toq ttzaj Balaam, etz kanul ti'j tuj jun tnam tuj tx'otx' Moab ttxlaj nima Arnón, tujx tmojonil ttx'otx',

³⁷ex xi tma'n te: —Ma ntxoka kab' maj. ¿Tiqu'n pen ma tzaja? ¿Qapelo ma ximana ti'j qa mlay jaw nnimsa'na?

³⁸Xi ttzaq'we'n Balaam: —Lu qine lu ma chin ule tuk'ila. Minti' woklene tu'n nyoline tuj wexe nnab'le; noq o'kx chin yolile ti'j yol tzul tma'n Dios weye.

³⁹Xi'tzun Balaam tuk'il Balac tuj Quiriat-huzot,

⁴⁰atzun xi tma'n Balac tu'n kykub' b'yet wakẍ ex ẍne'l ex tu'n t-xi q'o'n ch'in te Balaam ex kye nejenel uk'intoq tu'n.

⁴¹Te prim te juntl q'ij ik' uk'in Balaam tu'n Balac tu'n kyjax twi witz Baamot-baal tb'i, jatum q'ancha'ltoq ttxa'nile kycampament aj Israel.