Read kumam Números 31 Bible Online

Números 31 - kumam bible

Números 31

²Q'on aja t-xel kyi'j aj Madián ti'j ju ma kyb'incha kyi'j aj Israel, ex te tib'ajxi jlu kymela.

³Xitzun tma'n Moisés kye tnam xjal kyja': Kyi'ntz kymakb'ile junjun kyeye, aqeju in che ajb'en tuj q'oj, kyxi'ye ex e kyok tzoqpaje kyi'j aj Madián, tu'ntzun t-xelin kyi'j tu'n Qman.

⁴Teyle junjun k'loj kyiyjil aj Israel b'a'n tu'n t-xi t-sama'n jun mil xinaq tuj q'oj, chi Moisés.

⁵Kyja'tzun e jaw sk'et jun mil soldad kyxol teyle junjun k'loj kyiyjil aj Israel; japun kab'laj mil kyb'et, ex q'i'mlex kymakb'il tu'n kyxi' tuj q'oj.

⁶E je'xtzun sama'n tu'n Moisés tu'n kyxi' tuj q'oj junx tuk'il Finees aju tky'ajal pal Eleazar, ex atzunte xi q'inte qe makb'il xjan, kyuk'ix qe chun, tu'ntzun kyok q'ajtzet ok ttzyet q'oj.

⁷E oktzun ten q'ojlel kyi'j aj Madián ik tza'n otoq tma Qman te Moisés, ex e kub' kyb'yo'n kykyaqil xinaq aj Madián.

⁸Ax ikx kub' kyb'yo'n aj Israel jwe' rey kye aj Madián, ex atzun qe jlu: Evi, Requem, Zur, Hur ex Reba. Ax ikx kub' b'yo'n Balaam kyu'n, aju tky'ajal Beor.

⁹E tzajtzun q'i'n qe xu'j aj Madián kyu'n aj Israel, kyuk'ix qe tal k'wa'l, ex qe kyẍne'l, qe kywakẍ ex tkyaqil kyq'inumab'l.

¹⁰Ax ikx kub' kypatun kykyaqil kytanmi aj Madián ex kykyaqil aldey.

¹¹Ex tkyaqilju otoq tz'el kyi'n, tza'nx qe xjal ex qe alumaj,

¹²xi kyi'n tuk'il Moisés, tuk'il pal Eleazar ex kyuk'il tnam xjal aj Israel, tuj campament tuj tchq'ajlajil tx'otx' Moab ttzi nima Jordán, tumlal twitz tnam Jericó.

¹³Atzunte Moisés tuk'ix pal Eleazar ex kykyaqil nejenel kye tnam xjal, e je'tz kanul kyi'j ti'jxi campament.

¹⁴Ex tzaj tq'oj Moisés kyi'j qe nejenel kye jun milchaq ex jun syentchaq soldad otoq che'x aj tuj q'oj,

¹⁵ex xi tma'n kye kyja': —¿Tiqu'n minti' ma kub' kyb'yo'ne qe xu'j?

¹⁶Kyu'nlpe qe xu'j lu jaw kyi'n kyib' aj Israel ti'j Qman ex e k'ulun twitz tilb'ilal Baal-peor, noq tu'n tconsej Balaam. Kyja'tzun tzaj t-sama'n Qman tx'u'j yab'il tib'aj tnam etzan tu'n.

¹⁷Ja'lo kyb'yon kub'e kykyaqil tal q'a ex kykyaqil xu'j o kyilxi xinaq.

¹⁸Atzun qe txin na'nx kylonte xinaq, b'a'n tu'n kykyaj anq'in ex tu'n kykyaj ten kyuk'ile.

¹⁹Ex kykyaqil qeju ma che kub' b'yonte jun xjal ex qa ma tz'ok tmako'n t-ximlal jun kyimni, il ti'j tu'n kykyaj ten wuq q'ij ti'jxi campament. Tuj toxin q'ij ex tuj twuqin, kysaqsan b'aj kyib'e, tza'nxix aqeye ax ikx qeju ma che tzaj kyi'ne pres.

²⁰Ax ikx kysaqsan b'aje kykyaqil xb'alun, kykyaqil makb'il tz'u'm, kykyaqil xb'alun ttzmal chip ex qe makb'il tze', chi Moisés kye.

²¹Atzunte pal Eleazar xi tma'n kye kykyaqil soldad otoq che'x aj tuj q'oj: —Atzun ley lu tzaj tma'n Qman te Moisés:

²²Qe makb'il q'an pwaq, saq pwaq, q'an k'uxb'il, k'uxb'il, k'uxb'il estaño ex plom,

²³kykyaqil qeju mlay che naj tu'n q'aq', il ti'j tu'n kysaqset tu'n q'aq', ex te tib'ajxi tu'n kyb'aj tx'jet tu'n a' te saqsab'l; atzun qeju in che naj tu'n q'aq', b'a'n tu'n kysaqset o'kx tu'n a'.

²⁴Tujtzun twuqin q'ij il ti'j tu'n tb'aj kytx'jo'ne kyxb'alune, ex che saqseteltzune. Te tib'ajxi, b'a'ntzun tu'n kyokxe tuj campament.

²⁵Tzaj tma'n Qman te Moisés:

²⁶Aya tuk'ix pal Eleazar ex qe nejenel kye junjun k'loj kyiyjil aj Israel, kyajlan kub'e jte' xjal ex jte' alumaj ma tz'el kyi'n soldad tuj q'oj;

²⁷te kab'e tz'el tu'na, ex sipanxa mij kye soldad ma che'x aj tuj q'oj, ex atzun mijtl sipanxa kyxol tnam xjal minti' ma che'x aj tuj q'oj.

²⁸Ti'j mij kb'el t-sipana kyxol soldad, q'i'n ela ch'in weye, tza'nx kyi'j xjal ax ikx kyi'j wakẍ, bur ex ẍne'l. Jun k'elel ti'na ti'j jwe' syentchaq,

²⁹ex kxel tq'o'na te pal Eleazar ik tza'n jun oyaj te weye.

³⁰Ax ikx kyi'j mijtl kb'el t-sipana kyxol txqantl aj Israel, tza'nx kyi'j xjal ax ikx kyi'j wakẍ, bur ex ẍne'l, ex qa kyi'j kykyaqil alumaj, q'i'n ela ch'in kyi'j, jun kyi'j sincuentchaq, ex kxel tq'o'na kye aj Leví, aqeju in che kwentin ti'j njaye, chi Qman.

³¹Atzunte Moisés ex Eleazar o kyb'incha ik tza'nx otoq tma Qman te Moisés.

³²Tkyaqilju otoq tz'el q'i'n kye aj q'oj ex minti' e ok te tajlal aju kye soldad otoq b'aj kyu'n, japun tajlal te 675,000 ẍne'l,

³³ex 72,000 wakẍ,

³⁴ex 61,000 bur,

³⁵ex 32,000 q'apoj na'nxtoq tkyil xinaq.

³⁶Aju mij xi q'o'n kye soldad, japun jun tajlal te 337,500 ẍne'l,

³⁷ex aju xi q'ot te Qman, japun jun tajlal te 675 ẍne'l,

³⁸ex ti'j 36,000 wakẍ, xi q'ot 72 te Qman,

³⁹ex ti'j 30,500 bur, xi q'ot 61 te Qman,

⁴⁰ex ti'j 16,000 q'apoj, xi q'ot 32 te Qman.

⁴¹Aju xi q'ot te Qman, xi tq'o'n Moisés te pal Eleazar ik tza'nx otoq tma Qman te Moisés.

⁴²Atzun mijtl el tpa'n Moisés ti'j ju xi tq'o'n kye soldad otoq che'x aj tuj q'oj, xi tq'o'n kye txqantl aj Israel,

⁴³ex ax tajlal o japun kyja': 337,500 ẍne'l,

⁴⁴ex 36,000 wakẍ,

⁴⁵ex 30,500 bur,

⁴⁶ex 16,000 q'apoj na'nxtoq tkyil xinaq.

⁴⁷Ti'jtzun mij lu el ti'n Moisés jun ti'j sincuentchaq, tza'nx kyi'j xjal ax ikx qe alumaj, ex xi tq'o'n kye aj Leví, aqeju in che ajb'entoq tuj tja Qman, ik tza'nx otoq tma Qman te.

⁴⁸Atzun kye nejenel kye jun milchaq ex jun syentchaq soldad e pon tuk'il Moisés,

⁴⁹ex xi kyma'n te: Ma jaw jun tajlal qu'ne, aqo'ye ajb'el teya, kyi'j qe soldad e ten tuj qkwente, ex minti' jun atx taj.

⁵⁰Kyja'tzun ma tzaj qi'ne qe ti'xti q'an pwaq ma che knet qu'ne: Lu qe tqul q'ab'aj, qe caden in che kub' ten tqul q'ab'aj, qe xmulq'ab'aj, qe tuj ẍkyinb'aj, ex txqantl adorn, ma tzaj qi'ne te oyaj te Qman, tu'ntzun tkub' tnajsa'n qpaltile, che chi qe nejenel kye soldad.

⁵¹Atzunte Moisés tuk'ix pal Eleazar xi kyk'mo'n tkyaqil ti'xti q'an pwaq lu tok tilb'ilal kyi'j.

⁵²Aju q'an pwaq xi q'o'n te oyaj te Qman kyu'n qe nejenel kye jun milchaq ex jun syentchaq soldad, mas te kyaje quintal el talil.

⁵³Teyle junjun soldad otoq tzaj ti'n ch'in ti'xti kyi'j aj q'oj tu'n tajb'en te kye.

⁵⁴Xitzun kyk'mo'n Moisés ex pal Eleazar aju q'an pwaq pon kyi'n qe nejenel kye soldad, ex xi kyi'n tuj ja xb'alun te mojb'ab'l tib'il tu'ntzun kytzaj na'n aj Israel tu'n Qman.