Read kumam Números 32 Bible Online

Números 32 - kumam bible

Números 32

¹Qe tiyjil Rubén ex qe tiyjil Gad attoq nimxix kyalun. Tej kyke'yinte aju tx'otx' Jazer tuk'ix tx'otx' Galaad puro tb'anilxix qe lugar lu te almib'il alumaj,

²e je'xtzun tuk'il Moisés, tuk'il pal Eleazar ex kyuk'il qe nejenel kye tnam xjal ex xi kyma'n kye kyja':

³—Aqeju tx'otx' Atarot, Dibón, Jazer, Nimra, Hesbón, Eleale, Sebam, Nebo ex Beón,

⁴aqeju ma kub' kyi'j tu'n Qman tu'n kyok te kye aj Israel, b'a'n qe tx'otx' lu te kywab'l alumaj. Ik tza'n qeye, aqo'ye ajb'el teya, at qalune.

⁵Qa b'a'n tuj twitza, q'ontza tx'otx' lu te qeye, ex mi'n qo ik'x ti'na jlajxi nima Jordán.

⁶Atzunte Moisés xi ttzaq'we'n: —¿Maj kyajtzun kyeye tu'n kykyaj tene tzalu ex atzun kye txqantl kyermaniye che xe'l tuj q'oj?

⁷¿Tiqu'n kyajb'ile tu'n ttzaj b'aj kyk'u'j aj Israel tu'n mi'n kyik'x tuj tx'otx' o tzaj tq'o'n Qman kye?

⁸Axtzun jlu kyb'incha kymane tej kytzaj nsama'ne ke'yilte tx'otx' max tuj Cades-barnea.

⁹E pon max ttzi tq'ab' xaq Escol ex b'aj kyke'yin tx'otx', ex te tib'ajxi e ok ten xob'tzal kyk'u'j aj Israel tu'ntzun mi'n kyokx tuj tx'otx' otoq tzaj tq'o'n Qman kye.

¹⁰Kyja'tzun tzaj tq'oj Qman kyi'j tu'n jlu ex tzaj tma'n jun yol axix tok kyja':

¹¹Kykyaqil xinaq otoq japun winqin ab'q'i kyu'n tej kyetz tuj Egipto, mlay kyil aju tx'otx' xi ntziyane te Abraham, te Isaac ex te Jacob, porke minti' e ok lpe' wi'je tu'n tkyaqil kyanmi.

¹²O'kx te Caleb aju tky'ajal Jefone aju aj Ceneseo, tuk'ix Josué aju tky'ajal Nun, e ok lpe' ti'j Qman tu'n tkyaqil kyanmi.

¹³Kyja'tzun tzaj tq'oj Qman kyi'j aj Israel ex tb'incha noq tu'n kyb'etje' 40 ab'q'i tuj lugar tzqij tx'otx', tejxi kyb'aj kyim kykyaqil qeju otoq kyb'incha mya b'a'n twitz.

¹⁴Atzun ja'lo aqeye kyky'ajal qe mamb'aj aj il qe, aqeye ma che kyaj tene te t-xel kymane kyajb'ile tu'n ttzaj juntl maj tq'oj Qman kyi'j aj Israel.

¹⁵Qatzun mi'n kyajb'ile tu'n kyok lpe'ye ti'j Qman, che kyjel koline juntl maj tu'n tuj tzqij tx'otx', ex aqeye at kyile kyi'j ok kynaj, chi Moisés xi tma'n.

¹⁶E pon laq'e'tl twitz Moisés ex xi kyma'n te: —Aju qeye qajb'il, tu'n tjaw qb'incha'ne kype'n qẍne'le ex kype'n qwakẍe ex qe tnam te kye qxu'jile ex qk'wa'le.

¹⁷Te tib'ajxi jlu qo xe'le tuk'il qmakb'ile in che ajb'en tuj q'oj, tu'n qkub' neje kywitz txqantl aj Israel, max okxi kyokx qq'o'ne tuj kytx'otx'. Atzun qe qxu'jile ex qk'wa'le che kyjel ten kyuj qe tnam toksa'n muro kyi'j, ex jaku che klet kywitz qeju najl tuj tx'otx' lu.

¹⁸Mlay qo ajtz meltz'aje qjaye qa na'nxtoq kyk'monte kykyaqil aj Israel kytx'otx'.

¹⁹Porke aju tx'otx' k'okel te qeye, atzun aju ta' jlajtzi tumlal tjawitz q'ij te nima Jordán, ex mlay txi qqanintle txqantl tx'otx' taj jlajxi nima, che chi.

²⁰Xitzun ttzaq'we'n Moisés: —Qa ax tok ma japun kyyole, ex qa ma txi kyi'ne kymakb'ile tu'n kyxi'ye tuj q'oj ik tza'nx tajb'il Qman,

²¹ex qa kykyaqile che ik'xe tuj nima Jordán b'anin kytene tu'n kyq'ojine ik tza'nx tajb'il Qman, ex ax tu'n kykyaj tene ma chixin okxi kyex tlajo'n Qman qe aj q'oje kyi'je,

²²okxi tkamb'et tx'otx' tu'n Qman, b'a'n tu'n kyajtz meltz'aje, ex tzoqpi'ntltzun qeye ti'j ju ma kymaye twitz Qman ex kywitz aj Israel; ex aju tx'otx' lu k'okel te kyeye noq tu'n Qman.

²³Qatzun mi'n ma kyb'inchaye ikju, tu'n jlu che b'inchale il twitz Qman, ex axix tok kpol jun q'ij ktzajel kycastiwoye ti'j il lu.

²⁴Kyb'inchan jawe tnam tu'n kykyaj ten kyxu'jile ex kyk'wa'le kyuj, ex kyb'inchan jawe kype'n kyẍne'le, ex japunx kyu'ne aju ma txi kytziyane, chi Moisés.

²⁵Atzun kye tiyjil Gad ex tiyjil Rubén xi kytzaq'we'n: —Kb'antel qu'ne aju ma tmaya qeye, aqo'ye ajb'el teya.

²⁶Qe qxu'jile ex qe qk'wa'le, kyuk'ix qwakẍe ex kykyaqil qalune, ax che kyjel ten tzalu kyuj qe tnam te Galaad,

²⁷atzun qeye, aqo'ye ajb'el teya, kb'antel qtene tu'n qxi'ye tuj q'oj ik tza'nx tajb'il Qman, ex ik tza'nx ma tzaj tma'na qeye, che chi te Moisés.

²⁸Atzunte Moisés kyaj tma'n te pal Eleazar, te Josué aju tky'ajal Nun, ex kye qe nejenel kye kykyaqil k'loj kyiyjil aj Israel, alkye tu'n kyb'inchante kyi'j tiyjil Gad ex kyi'j tiyjil Rubén,

²⁹ex tma kyja': —Qa kykyaqil xinaq tiyjil Gad ex tiyjil Rubén che ik'x kyuk'ile tuj nima Jordán, b'anin kyten tu'n kyq'ojin ik tza'nx tajb'il Qman, okxi ttzyet tx'otx' kyu'ne, b'a'ntzun tu'n t-xi kyq'o'ne tx'otx' Galaad tu'n tok te kyetzb'il.

³⁰Qatzun mi'n ma che ik'x b'anin kyten tu'n kyq'ojin, axtzun k'elel kytx'otx' ti'j kyeye tuj tx'otx' Canaán, chi Moisés.

³¹Atzun kye tiyjil Gad ex tiyjil Rubén xi kytzaq'we'n: —Kb'antel qu'ne aju ma tma Qman qeye, aqo'ye ajb'el teya.

³²Qo ik'xe b'anin qtene tu'n qq'ojine tuj tx'otx' Canaán ik tza'nx tajb'il Qman, ex aju tx'otx' tkub'sa'n tuj tjawitz q'ij te nima Jordán k'okel te qetzb'ile, che chi.

³³Kyja'tzun tten xi tq'o'n Moisés aju ttx'otx' Sehón, aju otoq ten te rey kye aj Amorreo, te kye tiyjil Gad ex kye tiyjil Rubén, tuk'ix kye mij tiyjil Manasés aju tky'ajal José. Ax ikx xi tq'o'n ttx'otx' Og kye, aju otoq ten te rey kye aj Basán, kyuk'ix qe tnam ate'toq kyuj ex qe kojb'il ate'toq kyi'jele.

³⁴Jawtzun kyb'incha'n juntl maj tiyjil Gad qe tnam lu: Dibón, Atarot, Aroer,

³⁵Atarot-sofán, Jazer, Jogbeha,

³⁶Bet-nimra ex Bet-arán, ex ok kyq'o'n muro kyi'jele; ax ikx b'aj kyb'incha'n kype'n kyẍne'l.

³⁷Atzun qe tiyjil Rubén jaw kyb'incha'n juntl maj qe tnam Hesbón, Eleale, Quiriataim,

³⁸Nebo ex Baal-meón; b'aj kych'expu'n kyb'i tnam lu ex ok kyq'o'n kyb'i ak'aj; ax ikx jaw kyb'incha'n juntl maj tnam Sibma.

³⁹Qe tiyjil Maquir aju tky'ajal Manasés, e je'x tuj tx'otx' Galaad, tzyet kyu'n ex e je'x kylajo'n qe aj Amorreo ate'toq tuj.

⁴⁰Xitzun tq'o'n Moisés tx'otx' Galaad kye qe tiyjil Maquir aju tky'ajal Manasés, ex axtzun e kub' ten najal tuj.

⁴¹Ax ikx te Jair aju tiyjil Manasés, tzyet ela' aldey kye aj Amorreo tu'n, ex ok tq'o'n kyb'i Havot-jair.

⁴²Atzunte Noba, tzyet tnam Kenat tu'n kyuk'ix qe aldey ate' ti'jele, ex ok tq'o'n tb'i tnam lu Noba ik tza'nx te tb'i.