Read kumam Números 34 Bible Online

Números 34 - kumam bible

Números 34

¹Tzaj yolin Qman tuk'il Moisés ex tma:

²Q'manxa kye aj Israel kyja': Ok kypone tuj tx'otx' Canaán aju tx'otx' k'okel te kyetzb'ile, atzun qe tmojonil jlu:

³Aju tmojonil tuj tumlal tnayaj q'ij, atzun kmojonil tib' tuk'il tzqij tx'otx' Zin ex tuk'il tx'otx' Edom. Atzun ktzajel qe' tmojonil tuj tnayaj q'ij ttxa'npun mar at Nim Atz'an Tuj, tumlal tjawitz q'ij,

⁴k'elex tuj tnayaj q'ij tu'n tex tk'u'j witz Acrabim, tu'n tex tuj lugar tzqij tx'otx' Zin ex tu'n tpon max Cades-barnea, tu'n tik'tl tu'n tpon Hasar-adar, tu'n tpon tuj Asmón,

⁵tu'n tik'tl tuj Asmón, tu'n tpon max ttzi tq'ab' xaq tmojonil Egipto ex atzun kpol b'aj ttzi Nintz mar.

⁶Aju tmojonil tuj tumlal telex q'ij, atzun Nintz mar.

⁷Aju tmojonil tuj tumlal tb'anq'ab' q'ij, atzun jlu: Ktzajel qe' max ttzi Nintz mar tu'n tjapun twi witz Hor,

⁸ex k'oketz twi witz Hor tu'n tpon ttzi tnam Hamat, ex tu'n tik'tl tu'n tpon tuj Zedad.

⁹Ktzajelx tuj lugar Zedad tu'n tpontl max tuj Zifrón ex atzun kpol b'aj tuj lugar Hazar-enán. Ex atzun tmojonil tx'otx' lu tuj tumlal tb'anq'ab' q'ij.

¹⁰Aju tmojonil tuj tumlal tjawitz q'ij ktzajel qe' tuj lugar Hazar-enán, tu'n tpon max tuj lugar Sefam,

¹¹tu'n tik'tl tuj lugar Sefam, tu'n tpontl tuj tnam Ribla, tuj tumlal tjawitz q'ij te lugar Aín; ex atzun kb'eletz tu'n tku'pun tuj tumlal tjawitz q'ij te lagun Cineret,

¹²kb'eletz ttzi'yile nima Jordán ex atzun kpol b'aj ttzi mar at Nim Atz'an Tuj. Atzun qe lugar lu tmojonil kytx'otx'e, chi Qman te Moisés.

¹³Xitzun tma'n Moisés kye aj Israel kyja': —Atzun tx'otx' lu kb'ajel kysipane tu'n swert; aju o tma Qman tu'n t-xi q'ot kye b'elaj k'loj tuk' mijtl kyiyjil aj Israel,

¹⁴porke aqeju tiyjil Rubén, kyuk'ix tiyjil Gad ex mij tiyjil Manasés ma kyk'am kyetzb'il ik tza'nx junjun k'loj kyiyjil.

¹⁵Aqeju kab'e k'loj tuk' mij kyiyjil aj Israel lu ma kyk'am kyetzb'il tuj tumlal tjawitz q'ij te nima Jordán, aju tx'otx' tkub'sa'n tumlal twitz Jericó.

¹⁶Tzaj yolin Qman tuk'il Moisés ex tma:

¹⁷Aqeju che b'el sipante tx'otx' kyxole, atzun qe jlu: Pal Eleazar ex Josué aju tky'ajal Nun.

¹⁸Ax ikx k'okel kyq'o'ne jun nejenel kye teyle junjun k'loj kyiyjil aj Israel, tu'n tkub' sipet tx'otx',

¹⁹ex atzun kyb'i qe xinaq lu: Ti'j tiyjil Judá: Atzun Caleb aju tky'ajal Jefone.

²⁰Ti'j tiyjil Simeón: Atzun Semuel aju tky'ajal Amiud.

²¹Ti'j tiyjil Benjamín: Atzun Elidad aju tky'ajal Quislón.

²²Ti'j tiyjil Dan: Atzun Buqui, aju tok te nejenel, aju tky'ajal Jogli.

²³Kyi'j qe kyiyjil kab'e tky'ajal José: Atzun Haniel aju tky'ajal Efod tok te nejenel kye tiyjil Manasés;

²⁴atzunte Kemuel aju tky'ajal Siftán tok te nejenel kye tiyjil Efraín.

²⁵Ti'j tiyjil Zabulón: Atzun Elizafán tok te nejenel aju tky'ajal Parnac.

²⁶Ti'j tiyjil Isacar: Atzun Paltiel tok te nejenel aju tky'ajal Azán.

²⁷Ti'j tiyjil Aser: Atzun Ahiud tok te nejenel aju tky'ajal Selomi.

²⁸Ti'j tiyjil Neftalí: Atzun Pedael tok te nejenel aju tky'ajal Amiud.

²⁹Kyetzun qe jlu xi tma'n Qman tu'n tkub' sipet tx'otx' Canaán kyxol aj Israel.