Read kumam Números 6 Bible Online

Números 6 - kumam bible

Números 6

¹Tzaj yolin Qman tuk'il Moisés ex tma:

²Q'manxa jlu kye aj Israel: Qa at jun xinaq ex qa jun xu'j ktzajel ttziyan jun yol weye tu'n t-xjansante tib', tu'n tok te nazareo tu'n tajb'en te weye,

³mi'n txi tk'a'n vin, mi q'e'n, mi vinagr b'animaj ti'j vin mi ti'j q'e'n, ex mi'n txi tk'a'n ta'l twitz uva; ax ikx mi'n txi tlo'n twitz uva ktzajelx twi tqan ex mi twitz uva otoq tzqij.

⁴Tuj tkyaqil tyemp noq jte' q'ij otoq tzaj ttziyan tu'n tok te nazareo, mi'n txi tlo'n tkyaqil aju in tzaj tq'o'n tqan uva, mi aju iyaj at tuj, mi ttxk'omal.

⁵Ax ikx mi'n tz'el tmatzo'n ttzmal twi', noq o'kx kyjel tq'o'n tu'n tch'iy; maxi k'elel tmatzo'n okxi tjapun b'aj aju q'ij b'animaj ti'j ju yol otoq tzaj ttziyan, tu'nju at tu'n t-xjansante tib' nwitze.

⁶Ex tuj enter tyemp lu mi'n tz'ok laq'e' ti'j jun kyimni,

⁷maske qa a tman ex qa a ttxu' otoq kyim, ex qa jun terman ex qa jun tanb', mi'n txi laq'e' ti'j tu'ntzun mi'n ttz'ilix, porke aju ttzmal twi', atzun jun techal qa xjansamaj te weye.

⁸Tuj tkyaqil tyemp noq jte' q'ij otoq tzaj ttziyan tu'n tok te nazareo, ktel aju xjal lu xjansamajtl nwitze.

⁹Qatzun minab'enku in kyim jun xjal ttxlaj, ex tu'n jlu ktz'ilixtel ttzmal twi' aju xjansamaj tu'n te weye, iltzun ti'j tu'n t-saqsante tib' juntl maj ex tu'n tel matzet ttzmal twi' tb'ajlenxi wuq q'ij.

¹⁰Tuj twajxaqin q'ij ktzajel ti'n kab'e ẍpo'q ex qa kab'e tal paloma te pal, ttzi ja xb'alun te mojb'ab'l tib'il.

¹¹Kxel tq'o'n pal jun te chojb'il til xjal, atzun juntl kxel tq'o'n te jun oyaj patun in kub' tu'ntzun tchjet til, tu'nju kyim jun xjal ttxlaj. Tex q'ij lu kb'ajel t-xjansa'n juntl maj ttzmal twi' te weye,

¹²Ktzajel ti'n jun tal tman ẍne'l te jun ab'q'i te chojb'il til, ex tzajx ktzyetel juntl maj aju xjansab'l tib' wuk'ile. Aju tyemp otoq b'aj mlayx tz'ok te tajlal, tu'nju otoq tz'ilix aju ttzmal twi' xjansamajtoq te weye nej.

¹³Atzun ley lu te xjal nazareo ok tjapun b'aj aju q'ij te xjansab'l te: Tzul ttzi ja xb'alun te mojb'ab'l tib'il,

¹⁴ex ktzajel tq'o'n weye jun tal tman ẍne'l te jun ab'q'i ex minti' tpaltil, te jun oyaj tu'n tkub' patit; ex jun tal ttxu ẍne'l te jun ab'q'i ex minti' tpaltil kxel tq'o'n te chojb'il til, ex jun tman ẍne'l minti' tpaltil te oyaj te mojb'ab'l tib'il.

¹⁵Ax ikx ktzajel ti'n jun tal chi'l pan arin kytx'otx'il, minti' t-samel kyuj tu'n tjaw mal kyk'u'j ex xyoq'imaj tuk'il aseyt, tuk'ix jun wiq tal pan xaxj su'maj aseyt kyi'j ex minti' t-samel tu'n tjaw mal kyk'u'j, junx kyuk'il qe txqantl oyaj ti'j twitz awal tuk'ix ta'l twitz uva.

¹⁶Ktzajel tq'o'n pal tkyaqil jlu weye tuk'ix chojb'il te il ex aju oyaj patun in kub',

¹⁷ex kxel tq'o'n tman ẍne'l te jun chojb'il te mojb'ab'l tib'il, junx tuk'il tal chi'l pan minti' t-samel kyuj tu'n tjaw mal kyk'u'j ex qe oyaj ti'j twitz awal ex ta'l twitz uva.

¹⁸Atzunte xjal nazareo k'elel matzo'n ttzmal twi' ttzi ja xb'alun te mojb'ab'l tib'il, ktzajel ti'n ttzmal twi' xjansamaj ex k'okex tq'o'n tuj q'aq' aju in k'ant tjaq' oyaj te mojb'ab'l tib'il.

¹⁹Ktzajel ttzyu'n pal jun tq'ab' tman ẍne'l aju otoq tzq'aj, tuk'ix jun pan minti' t-samel tuj tu'n tjaw mal tk'u'j, aju tku'x tuj tal chi'l, ex jun tal pan xaxj minti' t-samel tuj tu'n tjaw mal tk'u'j, ex kxel tq'o'n tkyaqil jlu tuj tq'ab' xjal nazareo otoqxi tz'el matzo'n ttzmal twi'.

²⁰Kb'ajel tyukun pal jlu nwitze te jun oyaj te weye, xjansamaj tu'n tajb'en te pal, junx tuk'il t-xu'k tman ẍne'l ex tkux ktzajel q'o'n te jun oyaj weye. Tb'ajlenxi tkyaqil jlu, b'a'n tu'n tk'an xjal nazareo ti'j ta'l twitz uva.

²¹Atzun ley lu te te xjal in tzaj ttziyan jun yol tu'n t-xjansante tib' nwitze tu'n tok te nazareo, ex atzun qe oyaj tu'n ttzaj tq'o'n, ex mya tok te tajlal txqantl oyaj jaku tzaj tq'o'n qa at tumel. At tu'n tjapun tu'n aju ktzajel ttziyan, ik tza'nx in tman ley tu'n tb'ant.

²²O yolin Qman tuk'il Moisés kyja':

²³Q'manxa te Aarón ex kye tky'ajal: Ok tkub' kyky'iwla'ne qe aj Israel, kyja'tzun ktelb'a kyu'ne:

²⁴Awt Qman ky'iwlante teya ex kwentinte teya;

²⁵Awt Qman tzaj ke'yinte teya tu'n tzalajb'il, ex awt tzaj q'onte t-xtalb'il teya,

²⁶awt Qman tzaj ke'yinte teya tu'n tk'ujlalil, ex tenwta tuj txub'txaj tu'n, che chikuye.

²⁷Kyja'tzun tten tzul kyna'n qe pal nb'iye ok kykub' ky'iwla'n qe aj Israel kyu'n, ex aqine chin b'el ky'iwlante kye.