Read kumam Miqueas 1 Bible Online

Miqueas 1 - kumam bible

Miqueas 1

¹Atzun yol lu tzaj tma'n Qman te Miqueas, aju aj Moreset, tuj tq'ijlalil tej tkawin Jotam, tuj tq'ijlalil tej tkawin Acaz ex tuj tq'ijlalil tej tkawin Ezequías, rey qe tuj tnam Judá. Tzaj q'ma'n te ti'j tnam Samaria ex ti'j tnam Jerusalén.

²Kykyaqile aqeye tnam kyb'intze ju yol lu, ex aqeye xjal najl tuj tkyaqil twitz tx'otx' kyq'ontz kywi'ye ti'j. Max ktzajel yolin Qman Dios tuj tja, aju ja xjan; k'okel te testiw ti'j kyb'inchb'ene mya b'a'n.

³Kyke'yinxe, lu Qman k'eletz tuj lugar jatum najl ex ktzajel b'et kywi' qe witz.

⁴Che b'el ulj qe witz tjaq' tqan, ik tza'n in kub' ulj xkab' ok tokx q'ot tuj q'aq', ex te kab'e che elel qe chq'ajlaj kyxe witz, mer ik tza'n otoq ku'tz txqan a' tuj tmij.

⁵Kb'antel tkyaqil jlu noq tu'n tlaj mib'an che b'in qe tiyjil Jacob ex tu'n tlaj kyil aj Israel. ¿Jatum ate' qe tiyjil Jacob mib'an che b'in? Ate' tuj tnam Samaria. ¿Jatum ate' qe lugar jatum in che k'ulun aj Judá kywitz qe tilb'ilal? Lu ate' tuj tnam Jerusalén.

⁶Kyja'tzun in tma'n Qman: B'i'x kb'ajel xitj tnam Samaria wu'ne tu'n tok te jun kojb'il jatum tu'n tku'x awet tqan uva. Qe ab'j otoq che kub' tilj tuj tnam che b'ajel nsputine tuj chq'ajlaj t-xe witz, ex o'kx t-simyentil kyjel ten tuj q'ancha'l.

⁷Kykyaqil qe tilb'ilal at kyu'n che b'ajel b'uchj, ex tkyaqil kyoyaj in pon kyi'n tuj tja kydios che b'ajel patit. B'i'x che b'ajel naj kykyaqil qe tilb'ilal nno'k kydiosin, porke chmet tkyaqil jlu kyu'n ti'j oyaj in kyaj kyq'o'n xinaq kye qe xu'j jawni kywitz kyuk'il xinaq ax ate' tuj tja kydios, ex ax qe oyaj lu che ajb'el te chojb'il kye qe xu'j jawni kywitz kyuk'il xinaq tuj juntl nasyon, chi Dios.

⁸Tu'n jlu chin okel tene oq'el kyuw wen tu'n ta'w nb'ise, mi'n tz'ok nq'o'ne nxajb'iye ok nb'ete, ex mi'n tz'ok nq'o'ne nxb'alune; chin okel tene wuyil ik tza'n in wuyin jun xo'j tu'n tb'is, ex chin jawil sch'ine ik tza'n in q'ajt jun chyu'j avestrúz.

⁹Porke aju k'ixb'isab'l kyi'j aj Samaria minti' q'anb'il ti'j: aju k'ixb'isab'l lu ma pon kanun tuj tx'otx' Judá ex ttzi tlamel tnam Jerusalén, aju tnam jatum najl qe nxjalile.

¹⁰Mi'n txi kyma'ne jlu kye aj Gat, ex mi'n che ok tene oq'el. Kytolin jaw kyib'e tu'n ta'w k'ixk'oj tuj quq tuj tnam Bet-le-afra.

¹¹Aqeye xjal najl tuj tnam Safir, e kyxi q'i'ne pres tuj juntl lugar minti' kyxb'alune toksa'n tu'ntzun tkub' kych'ixwiye. Qe xjal najl tuj tnam Zaanán mlay che etz. At oq'el tuj lugar Bet-esel, tu'ntzun jlu mlayx che oninjtze tu'n.

¹²Qe xjal najl tuj tnam Marot in xi kyẍokin kyi'j tu'n ta'w k'ixk'oj ex kyajb'il tu'n kyten tuj txub'txaj, porke ma tzul castiw tu'n Qman ex ma pon kanun ttzi tlamel tnam Jerusalén.

¹³Aqeye xjal najl tuj tnam Laquis e oke mib'an che b'ine ik tza'n qe aj Israel, ex tu'n kylaje e b'inchan il qe aj Sión, kyja'tzun, kyk'alo'n oke kycheje kyi'j qe kycarwaje tu'n kyel oqe.

¹⁴Aqeye aj Judá, te jumajx kykolin kyaje tnam Moreset-gat; aju tnam Aczib k'okel te k'ob'il kye kyrey aj Israel.

¹⁵Chi Qman in tma'n: Aqeye xjal najl tuj tnam Maresa, ktzajel nsama'ne jun xjal tu'n tkub' kyi'je tu'n, ex qeju at mas kyoklen kyxol aj Israel, atzun che xel oq tuj toy' pik Adulam tu'n kyklonte kyib'.

¹⁶Ex atzun kyeye aj Judá, kymatzo'mele tkyaqil ttzmal kywi'ye te jun techal ti'j kyb'ise, tu'n kylaj qe kyk'wa'le k'ujla'nxix kyu'ne. Jumajx kymatzo'mele ttzmal kywi'ye tu'ntzun tkyaj ik tza'n ti'j twi' jun k'utz tz'a'j ti'j, porke qe kyk'wa'le che xel q'i'n pres tuj juntl tnam najchaq.