Read kumam Miqueas 2 Bible Online

Miqueas 2 - kumam bible

Miqueas 2

¹Ay b'ek'b'il kywitz qe xjal ok in che'x tal in che ok ten ximal ti'j alkye mya b'a'n tu'n tb'ant kyu'n, ex oktzun tjawil q'ij in b'inchettzun kyu'n tu'nju at kyipun tu'n tb'ant.

²In pon kyk'u'j ti'j kytx'otx' xjal ex nne'l kyi'n, in pon kyk'u'j ti'j tja kyuk'il ex nne'l kyelq'a'n, in che b'aj kyyajla'n qe xjal kyuk'ix qeju ate' tuj kyja ex nne'l kyetzin kytx'otx'.

³Tu'ntzun tlaj jlu in tma'n Qman kyja': Ax ikx weye at jun nximb'etze kyi'je: Tzul nsama'ne jun yajb'il kyib'aje ex mi jun ktzoqpetel tuj yajb'il lu. Mlay jaw kyniman kyib'e porke tzul jun mya b'a'n kyi'je.

⁴Tuj tq'ijlalil lu kxel kyb'itzan xjal jun b'itz te kyeye b'isb'ajilxix, ex kxel kyma'n kyeye kyja': Jumajx ma qo naj, aju qtanmi etzan tu'n Qman ma ch'expet tajwil ex mi jun jaku tz'ok mayonte kye ti'j, qe qkojb'il ma b'aj pa'n kyxol qe xjal ma kub' qi'j kyu'n, che chilo kyeye,chi Qman.

⁵Tu'ntzun tlaj jlu minti' kyoklen kyk'wa'le ti'j kyetzb'il ok tkub' sipet tx'otx' juntl maj kyxol qe xjal etzan tu'n Qman.

⁶Mi'n tzaj kyma'ne qeye alkye yol in tzaj q'ma'n kyeye tu'n Qman, che chi xjal, porke aju yajb'il mlay tzul kanun quk'ile.

⁷¿Baqa o tma Dios tu'n tkub' kycastiw qe tiyjil Jacob? ¿Baqa ma b'aj tpasens Dios? ¿Baqa ik tten te Dios tb'inchb'en?, che chiye. Kyja'tzun in tma'n Qman kyja': ¿Myapetzun b'a'n in tb'incha'n nyole teju xjal in b'et tuj tumel?

⁸Ma jaw kyi'n kyib'e tu'n kyq'ojine kyi'j qe xjal etzan wu'ne, ex nne'l kyi'ne aju xb'alun wi'yilxix tok kyi'j qe xjal in che ul meltz'aj tuj q'oj ok matoq in che ximan ti'j qa otoq che klet.

⁹In che etz kylajo'ne qe xu'j tuj kyja, aju nim in che tzalaj ti'j, ex te jumajx ma tz'el kyi'ne nky'iwb'ile kyib'aj kyal.

¹⁰Che we'ktze ex che b'ete, porke aju lugar lu mya te ojlab'l ex ma b'aj tz'ilix tu'n mya b'a'n, kyja'tzun te jumajx ma b'aj naj.

¹¹Qa at jun ma kub' t-ximan tu'n tnik'an yol ex qa ma tma: In chin q'mane tqanil jlu: Ktel nim vin ex nim q'e'n te kyk'a'ye, qa chi, atzunju xjal tu'nx nno'k tq'on tib' te nsanjele ex mas in che tzalaj xjal ti'j, chi Qman.

¹²Che okel nchmo'ne kykyaqile aqeye tiyjil Jacob, ex che tzajel wi'ne qe kab' oxtl aj Israel ma che kyaj ten. Che okel nchmo'ne ik tza'n in che ok chmet ẍne'l tuj kype'n, ex ik tza'n txqan ẍne'l tuj kojb'il, ex nim che q'ajtel tu'nju nimxix kyb'et, chi Dios.

¹³Ate Dios kb'el nej kywitz te jaqol kyb'e, atzun kye che okel lpe' ti'j ex che eletz ttzi tlamel tnam. Ate Qman k'okel te kyrey, ex kb'el nej kywitz kykyaqil.