Read kumam Miqueas 6 Bible Online

Miqueas 6 - kumam bible

Miqueas 6

¹Kyb'intze ja'lo aju in tma'n Qman, chi kyja': Che we'ktze ex kychik'b'antze aju kykolb'il kyib'e kywitz qe nmaq witz, ex e tjaw tq'ajq'ajel kywi'ye tu'ntzun kyb'inte qe tal witz.

²Kyb'intze, aqeye nmaq witz ex tq'uqb'il tx'otx' kyuwxix tten: Qe xjal etzan tu'n Qman che okel tuj xjel tu'n ti'j kyb'inchb'en ex k'okel ten xtisil kyi'j aj Israel.

³Chi Qman in tma'n kyja': Aqeye xjal etzan wu'ne, ¿Alkye mya b'a'n ma nb'inchaye kyi'je ex qa alkye mya b'a'n ma tz'e'le tuj kywitze? Chin kytzaq'wentze.

⁴Aqine etz q'inte kyeye tuj Egipto tu'n mi'n kytentle te kymajen, ex xi nsama'ne Moisés, Aarón ex Mariy te ẍaqlul kyeye.

⁵Aqeye xjal etzan wu'ne, kyna'ntze ja'lo aju kub' t-ximan Balac tu'n tb'ant kyi'je, aju kyrey aj Moab, ex kyna'ntze alkyeju tzaq'web'l tzaj q'o'n te tu'n Balaam aju tky'ajal Beor. Kyna'ntze tej tkub' b'e kyu'ne tuj lugar Sitim tu'n kypone tuj Gilgal, tu'ntzun tel kynik'e ti'j ju xtalb'il o nb'inchaye kyeye, chi Qman.

⁶¿Alkye tumel tu'n nkub' tene k'ulul twitz Qman aju Dios ma'xix toklen? ¿B'a'npe tu'n nkub' tene k'ulul twitz tuk'il jun tal wakẍ te jun ab'q'i, tu'n tkub' nb'yo'ne ex tu'n tkub' npatune te jun oyaj te Qman?

⁷¿Jakupe tzalaj Qman ti'j qa ma txi nq'o'ne jun mil ẍne'l te jun oyaj te ex qa ma kub' nq'o'ne nimxix chib'j aseyt twitz? ¿Kxelpe nq'o'ne nej nk'wa'le te chojb'il teju mya b'a'n in b'ant wu'ne ex ju wile? Mi'n.

⁸Aya xjal, o tma Qman teya alkyeju b'a'n ex alkye taj tu'n tb'inchanteya: Taj Qman tu'n tb'inchanteya aju tz'aqlxix ex tu'n tten tk'ujlalila ti'j juntl ex tu'n tkub' tmansin tib'a twitz ju Tdiosa.

⁹Ate Qman in txokon kyi'j qe xjal ate' tuj tnam, ex aju xjal in xob' twitz, at tnab'l. Kyq'ontz kywi'ye ti'j castiw ex ti'j ju in kub' q'onte castiw.

¹⁰Tuj tja xjal b'inchal mya b'a'n at q'inumab'l mya tuj tumel in kamb'et, ex at malb'il mya tz'aql; aqe jlu ik'un wu'ne.

¹¹¿Tza'n tten tu'n tkub' nnajsa'ne til ju xjal in che ajb'en qe balans ex qe mark mya tz'aql tu'n?

¹²Qe q'inun ate' tuj tnam lu, kykyaqil in che yajlan kyi'j qe meb'a, ex kykyaqil qe xjal najlqe tuj, puro nik'al yol qe ex sb'ul qe.

¹³Kyja'tzun kb'el nq'o'ne kycastiwoye; che najele wu'ne tu'n tlaj kyile.

¹⁴Che wa'le, ex mlay noj kyk'u'je, noq o'kx kukx che apale we'yaj; kjawil kychmo'ne kywaye, ex mlay kyaj klet ch'in kyu'ne, ex qatzun at ch'in ma kyaj klet kyu'ne, kxel nq'o'ne kye qeju che ul q'ojlel kyi'je.

¹⁵Che awale, ex mlay jaw kychmo'ne twitz kyawale; k'elex kyche'ne twitz olivo, ex mlay che nik'b'ene ti'j ju aseyt k'elel ti'j; k'elel kyyatz'o'ne ta'l twitz uva, ex mlay che k'ane ti'j ta'l.

¹⁶Porke ma che'x lpe'ye kyi'j tmandamyent rey Omri ex ti'j tkyaqilju o kyb'incha qeju ate' tuj tja rey Acab, ex ma kyb'inchaye aju kye o b'ant kyu'n. Kyja'tzun kxel nq'o'ne amb'il tu'n kynaje ex tu'n kyok xmayin qeju najl tuj tnam ex che elel ik'une kyu'n txqantl tnam.