Read kumam Nahum 2 Bible Online

Nahum 2 - kumam bible

Nahum 2

¹Aqeye aj Nínive, aju xitul kyeye lu tzul kyi'je. Kyq'on kub'e qe xq'uqil tuj ja te kykolb'il kyib'e. Kyxq'uqin oke b'e. Kyq'onk kyspadiye kyk'u'je. Kyq'onkxix kyipune wen.

²Ok che jawil nimsa'n juntl maj qe tiyjil Jacob tu'n Qman, che jawil nimsa'n qe aj Israel ik tza'n nej tej na'nxtoq tel q'i'n aju at kye, ex na'nxtoq kykyaj q'o'n ik tza'n tqan uva otoq tz'el jetz'j tq'ab'.

³Kyaq ke'yin ju maqb'il q'i'n kyu'n qe xinaq kyuw kyk'u'j tuj q'oj, ex kyaq ke'yin kyxb'alun qe soldad. B'anin kyten tu'n kyq'ojin. In che txilk'aj kycarwaj; in meltz'aje' kyspad.

⁴In che lipan qe carwaj tuk'il kytx'u'jil kyuj cay, in che'x tuj jun pak' plas ex in che aj tuj juntl pak', ik kyten ik tza'n jun ttxan tzaj in k'ant, in che b'et ik tza'n xle'laj kya'j.

⁵In che tzaj ttxko'n rey qe xjal at kyoklen ttxlaj, ex atzun kye in che jaw tolj ok kyxi lipan tu'n kypon jatum ta' muro ex jatum ta' lugar b'animaj tu'n tok kyklon kyib' ti'j.

⁶In che jaqet qe maqb'il nima, ex aju tja rey in kub' tilj.

⁷In xi q'i'n t-xu'jil rey pres kyuk'ix qe tmajen xu'j; in che oq' ik tza'n qe paloma ex nno'k kyq'ajtza'n ttzi kyxu'k tu'n b'is.

⁸Ik tza'n a' nne'tz qojl otoq pax maqb'il te, iktzun tten in che el oq qe xjal najlqe tuj tnam Nínive. Che we'kuye, kyajtz meltz'aje juntl maj, che chi xjal in xi kyma'n kye, ex mi jun nna'jtz meltz'aj.

⁹Kyelq'anxe saq pwaq. Kyelq'anxe q'an pwaq. Nimxix tq'inumab'l tnam Nínive at. Nimxix txkaj ti'xti wi'yilxix chmo'maj kyu'n.

¹⁰Ma kub' xitj tnam Nínive, ma txi q'i'n tkyaqilju at tuj, minti' xjal ma kyaj ten tuj. Ma b'aj tipun kyanmi qe xjal tu'n kyxob'il, in che lu'lun kyqan, kykyaqil minti'tl kyipun ex spelin ma tz'ok kywitz tu'n kyxob'il.

¹¹¿Ti ma b'aj ti'j tnam Nínive aju iktoq tten ik tza'n kyjul b'alun, ex ti ma b'aj ti'j kyja qe tal tman b'alun jatum in che ojlantoq qe tman b'alun ex qe ttxu b'alun kyuk'ix qe kyal, ex mi a'ltoq jun nno'k sek'punte kye?

¹²In che kub' tb'yo'ntoq b'alun qe tkanb' te kychi' qe ttxu b'alun ex qe tal tman b'alun, ex nojnitoq qe tjul tu'n tkanb'.

¹³Ate Qman aju Tajaw Tkyaqil chi in tma'n kyja': Lu qine in chin q'ojin ti'ja; che b'el npatune qe tcarwaja in che ajb'en tuj q'oj ex kjawil kysib'el; che b'el nb'yo'ne qe tal tman b'alun ate' tuja ex mlay tz'etz telq'a'ntla qe q'inumab'l at kyuj txqantl nasyon ex mlay b'injtz juntl maj tq'ajq'ajel kywi' qe t-sanjela.