Read kumam Habacuc 1 Bible Online

Habacuc 1 - kumam bible

Habacuc 1

¹Atzun yol lu tzaj tma'n Qman te Habacuc aju t-sanjel.

²Nman, ¿Jte' maj chin qanile onb'il teya ex minti' in chin tzaj tb'i'na? ¿Jte' maj chin kub'sale twitza tu'n tlaj kytx'u'jil xjal ex minti' in tzaja kolpil qeye?

³¿Tiqu'n taja tu'n tik' nwitze ti'j yajb'il ex mya b'a'n in kyb'incha'n xjal? Nwitze in tzaj nim kytx'u'jil xjal ex nim xitb'il kyxol; tuj tkyaqil part in b'aj kyik'len kyib' xjal ex in che q'ojin.

⁴Ya minti'tl in ajb'en ley kye ex minti' in xi b'incha'n kyi'j xjal tuj tumel; aju xjal mya b'a'n nno'k ten yajlal ti'j ju xjal b'a'n, ex tu'ntzun jlu in b'aj kytzakun ju ley.

⁵Chitzun Qman kyja': Kyke'yinxe qe nasyon ate' kytxlaje; kyke'yinxe qe ex tzajx nim tchiylal kyi'je. Ch'ix wok tene b'inchal jun ti'xti aju mlay txi kyoksla'ne qa at jun ma tzaj q'mante kyeye.

⁶Che tzajel wi'ne qe aj Babilonia q'ojlel kyi'je, aqeju jawni kywitz ex noq b'anin kyten tu'n kyxi' q'ojlel tuj tkyaqil twitz tx'otx' tu'ntzun kyok te tajwil qe tx'otx' mya kye.

⁷Jawni che xob'tzan ex xob'ajilxix qe, minti' tchiylal txqantl ley tuj kywitz, o'kx aju kye kyley, ex kyu'nx nno'k kyq'o'n kyoklen.

⁸Mas kyuw che ojqelan qe kychej kywitz qe tigre ex mas jurat in tzyet kykanb' kywitz qe xo'j in che b'et qonik'an. Nim kyb'et qe kychej tjax xjal kyib'aj, najchaq in che tzaj ojqelan tu'n kyok tzoqpaj q'ojlel ik tza'n jun t'iw in tzaj lipan kyuw wen tzyul tkanb'.

⁹Tkyaqil in b'aj naj kyu'n tuj kyb'e ex in che jaw xob' xjal kyu'n. Qe xjal in che'x kytzyu'n tu'n t-xi kyi'n pres mas nim kyb'aj twitz ttxa' tz'a'n ttzi mar.

¹⁰In che ok ten xmayil kyi'j qe rey ex kyi'j qe xjal ma' kyoklen. In che ok ten tze'l kyi'j qe nmaq ja tjawsa'n te kykolb'il kyib' xjal, porke jurat naj in jaw kyb'uyin tx'otx' te kyxwe'tzb'il tu'n kyokx tujxi ex tu'n kyok tzoqpaj kyi'j.

¹¹Jurat naj in che ik' ik tza'n jun nintz kyq'iq'; minti' kyaj ti'j juntl dios, noq o'kx aju kyex kyipumal nno'k kyq'o'n te kydios, chi Qman.

¹²Nman, ¿Myapetzun kukx ttena te jumajx? Aya Ndiose ex xjana. Mlay qo kyime Nman, aya kolol weye, ma txi tq'o'na kyipumal qe aj Caldeo tu'n tkub' kyq'o'n qcastiwoye.

¹³Xjanxix teya ex minti' in tzalaja ti'j ju mya b'a'n, ex minti' in tzalaja ti'j ok in che yajlan xjal kyi'j kyuk'il. ¿Tza'ntzun tten minti' in q'ajta kyi'j qe xjal in kyb'incha'n tkyaqil txkaj mya b'a'n, ex tiqu'ntzun in xi tq'o'na amb'il kye qe b'inchal mya b'a'n tu'n kynaj xjal kyu'n, aqeju mas b'a'n qe kywitz?

¹⁴¿Tiqu'n in che ok tq'o'na qe xjal ik tza'n qe kyiẍ ex ik tza'n qe jil tuj mar, mi a'l jun nejenel kye?

¹⁵In kub' kyi'j txqantl nasyon kyu'n aj Babilonia ik tza'n qe tzyul kyiẍ in che tzyet kyiẍ kyu'n; in che tzyet kyu'n tu'n xuk'b'il kyiẍ ex tu'n xyub', ex oktzun kychmet kyu'n, nim in che jaw tzalaj ti'j.

¹⁶Tu'ntzun jlu qe xjal tzyul kyiẍ in kub' kyq'o'n chojb'il twitz kyxuyb' ex in kub' kypatun storak te nimb'il te, tu'nju noq tu'n in tzaj q'o'n kychi' tb'anil ex nimxix.

¹⁷¿Kukxpetzun kxe'l tu'n kykamb'an qe aj Babilonia qi'je ik tza'n in che tzyet qe kyiẍ tuj xyub'? ¿Kukxpetzun che b'el b'yo'n qe xjal kyu'n ex minti' tu'n ttzaj tz'e'y kyk'u'j kyi'j?