Read kumam Habacuc 3 Bible Online

Habacuc 3 - kumam bible

Habacuc 3

¹A jlu jun tna'j Dios Habacuc aju t-sanjel Dios:

²Nman, o nb'iye tqanil ti'ja, ex o tzaj nxob'ile tu'n. Nman, ax ikx b'inchama tuj tq'ijlalil ja'lo qe nmaq tb'inchb'ena o che b'ant ojtxi, tu'ntzun ikx qeye tu'n tel qnik'e ti'j. Maske at tq'oja qi'je, pero q'aq'antz tk'u'ja qi'je.

³Atzun ktzajel Dios tuj tx'otx' Temán; ex aju Dios xjan ktzajel twi witz Parán. Ma b'aj noj twitz kya'j tu'n tajwalil, ex nim ma jaw nimsa'n tb'i kyu'n xjal tuj tkyaqil twitz tx'otx'.

⁴In qoptz'aj t-spik'umal ik tza'n tqan q'ij ex in che etz qe tqan spik'un tuj tq'ab'; atzun ewan tipumal tu'n.

⁵Nejni tx'u'j yab'il twitz, ex lepchix ttzaj yab'il nintz kyaq, aju in b'aj naj nimku xjal tu'n.

⁶B'i'x in tzaj lu'lun tx'otx' ok tkub' we'; ex b'i'x in che tzaj lu'lun qe nasyon ok in xi tke'yin kyi'j. B'i'x in che b'aj qotx'in qe ojtxi witz, ex b'i'x in che kub' xitj. Minti' b'ajsb'il te tipumal Dios.

⁷O che wile qe xjal aj Cusán ate' tuj jun nintz yajb'il, ex qe aj Madián nim kyxob'il ma tzaj.

⁸¿Maj ma tzaj tq'oja kyi'j qe nima, Nman? ¿Maj ma tzaj tq'oja ti'j mar? ¿Maj noqtzun tu'n jlu in jaxa tuj tcarwaja jawo'n kyu'n tcheja, tu'n tkub' ti'j nimku tu'na?

⁹Ma b'ant tten aju xob'l plech tu'na, ex b'anin kyten nimku tplecha. Kyu'n qe nima ma b'aj julix tx'otx' tu'na.

¹⁰B'i'x in che tzaj lu'lun qe witz ok tke'yinjtza kyu'n; ex in tzaj tilj nim jb'al twitz kya'j. In jaw jululun aju mar ma' t-xe' ok tjaw pulin nimxix wen.

¹¹Aju q'ij ex xjaw minti'tl e b'et, ax e we' tu'n tlaj kyspik'umal qe tplecha ex tu'nju spik'un nne'l qoptz'aj ti'j tlansa.

¹²In b'aj tb'etina twitz tx'otx' tu'n tq'oja; in che b'aj twab'ana qe nasyon tu'n ttx'u'jila.

¹³Ma tz'etza kolol kyi'j qe xjal etzan tu'na ex ti'j ju rey jaw t-sk'o'na. Ma b'aj t-xituna twi tja aju xjal b'inchal mya b'a'n ex b'i'x ma kyaj q'ancha'lin t-simyentil tu'na.

¹⁴Kub' tb'yo'na ju nejenel kye tu'nx tlans, tej kytzaj q'ojlel qi'je tuk'il nim kyipun; ik tza'n kyq'iq' tu'n qb'aj sputje kyu'n. In che tzalajtoq tu'n tkub' qi'je kyu'n tuj ewaj ik tza'n qe xjal minti' kykolb'il kyib'.

¹⁵In b'aj tb'etina tib'aj mar kyu'n qe tcheja, ex tib'aj a' ma' twitz in b'aj t-xtulq'in tib'.

¹⁶Tej nb'inteye tkyaqil jlu, b'i'x tzaj lu'lun nk'u'je, b'i'x e tzaj lu'lun qe ttxo'w ntzi'ye, b'i'x el b'aq'ch tkyaqil nximlale ex tkyaqil nximlale b'i'x tzaj lu'lun. Maske ikju, pero chin b'el txule'ye ayolte aju q'ij ok ttzaj tq'o'n Dios yajb'il kyib'aj qe soldad in che yajlan qi'j.

¹⁷Maske minti' ma tzaj tq'o'n t-xmakal tqan higo, ex minti' ma tzaj tq'o'n twitz tqan uva ex aju tqan olivo; maske minti' ma tzaj kyq'o'n twitz awal tuj kojb'il, ex maske che kub' b'aj kykyaqil qe ẍne'l, ex mi juntl wakẍ kyaj ten tuj pe'n, tu'n tkyaqil jlu chin tzalajele ti'j Qman Dios aju klol weye.

¹⁹Porke in tzaj tq'o'n Qman Dios wipumale, ex jurat in che b'et qe nqane tu'n ik tza'n che b'et qe masat, ex in chinx ti'n tuj lugar ma' tjaw jatum tu'n nklete.