Read kumam Sofonías 1 Bible Online

Sofonías 1 - kumam bible

Sofonías 1

¹Atzun tqanil lu tzaj tma'n Qman te Sofonías tuj tq'ijlalil tej toktoq Josías te rey tuj Judá. Ate Josías tky'ajal Amón, atzunte Sofonías tky'ajal Cusi, atzunte Cusi tky'ajal Gedalías, atzunte Gedalías tky'ajal Amarías ex atzunte Amarías tky'ajal Ezequías.

²Atzun jlu in tma'n Qman: Te jumajx knajel wu'ne tkyaqilju at twitz tx'otx'.

³Che najel wu'ne qe xjal, qe alumaj, qe kyiẍ tuj mar, kyuk'ix qe chyu'j ex txqantl jil in che lipan twitz kya'j; kb'el nq'o'ne tolsab'l kywitz qe b'inchal mya b'a'n, ex te jumajx che najel qe xjal wu'ne twitz tx'otx', chi Qman.

⁴Kb'el nq'o'ne kycastiw qe aj Judá ex kykyaqil qeju najlqe tuj Jerusalén. Che najel wu'ne kykyaqil qe tilb'ilal Baal ate'x tuj lugar lu, kyuk'ix qeju in che k'ulun kywitz ex kyuk'ix qe pal in che ajb'en kywitz.

⁵Che najel wu'ne qe xjal in che jax kywi ja tu'n kyk'ulun kywitz che'w, twitz q'ij ex twitz xjaw, ex kyuk'ix qe xjal in che kub' ẍmeje' tu'n ttzaj kytziyan jun yol weye ex tuk'ix tb'i Milcom aju kydios in tzaj kyna'n.

⁶Ax ikx che najel wu'ne qe xjal nne'l kypa'n kyib' wi'je, kyuk'ix qeju minti' in che jyon wi'je ex minti' in che tzaj qanilte alkye tu'n tb'ant kyu'n, chi Qman.

⁷Che txulekuye twitz Qman Dios tu'nju niqa' ta' tq'ijlalil castiw tu'n. Ma b'ant kyten xjal tu'n Qman tu'n kykub' b'yo'n, ex ma b'ant kyten qeju ma che tzaj ttxko'n b'yol kye.

⁸Chi Qman in tma'n kyja': Tuj tq'ijlalil castiw kb'el nq'o'ne kycastiw qe nejenel, kyuk'ix qe tky'ajal rey ex kyuk'ix kykyaqil qeju nne'l kykano'n kymod xjal kye txqantl nasyon.

⁹Ax ikx tuj tq'ijlalil lu kb'el nq'o'ne kycastiw qeju in che okx elq'al tuj kyja xjal, ex in noj tuj kyja kypatrón tu'n kyelq'ab'en ex tu'nju otoq tz'el kyi'n kye xjal tu'n sb'ub'l.

¹⁰Tuj tq'ijlalil lu, chi Qman, kb'injtzel ok kyjaw sch'in xjal tu'n b'is max ttzi tlamel tnam, Tlamel kye Kyiẍ tb'i. Che tzajel sch'in qe xjal tuj jun piẍ ak'aj tnam ex kb'injtzel nim tq'ajq'ajel qotx' max kywi' qe tal witz.

¹¹Che wu'yine, aqeye xjal najl t-xe witz tuj tnam, tu'nju che najel kykyaqil qe comersyant, ax ikx che najel kykyaqil qe xjal nnu'l kyi'n saq pwaq tu'n kylaq'on ti'j k'aẍjel.

¹²Tuj tq'ijlalil lu kb'ajel nke'yine tuj Jerusalén tu'n lámpara. Kb'el nq'o'ne kycastiw qe xjal aqeju tuj kynab'l tuj txub'txaj ate', minti' jun xob'ajil jaku tzaj kyi'j ex in kyma'n tuj kyanmi: Mlay tb'incha Qman jun b'a'n ex mi jun mya b'a'n.

¹³Kyja'tzun k'elex q'i'n kyq'inumab'l ex che b'ajel xitun kyja. Kjawil kyb'incha'n kyja, ex mlay che najan kyuj; kb'elex kyawa'n tqan uva, ex mlay che k'an ti'j ta'l twitz, chi Qman.

¹⁴Niqa' ta' tu'n tul kanun ju nintz tq'ijlalil jwisi tu'n Qman. Niqa' ta', lu tzul naj. Xob'ajilxix tq'ajq'ajel jwisi tu'n Qman; kyuk'ixpe qe xjal mas kyuw kyk'u'j tuj q'oj che jawil sch'in.

¹⁵Aju q'ij lu q'ij te q'oj, te b'is, te k'ixk'oj, te xitb'il, tu'n tb'aj naj tkyaqil, ex jun q'ij puro qlolj ex qxopinxix te nim muj ex q'eq muj;

¹⁶jun q'ij tu'n kyok q'ajtzet qe chun ex tu'n kyjaw sch'in qe soldad kyja' kyxi' q'ojlel kyi'j qe tnam tok muro kyi'j, ex kyi'j qe ja ma' kywa'l te kykolb'il kyib' xjal.

¹⁷Chi Qman in tma'n kyja': Che okel nq'o'ne qe xjal tuj yajb'il. Che b'etel ik tza'n moẍ, tu'nju o che b'inchan il nwitze. Kb'ajel qojl kychk'el, k'okel ik tza'n quq minti' tajb'en, ex k'elex xo'n kyximlal kyimni ik tza'n kytxa' alumaj.

¹⁸Tuj q'ij ok ttzaj tq'oj Qman mlay che klet qe xjal tu'n saq pwaq mi tu'n q'an pwaq at kyuk'il, tu'nju ik tten tq'oj Qman ik tza'n q'aq', ktz'e'yil tkyaqil twitz tx'otx' tu'n. Kykyaqil qe xjal najlqe twitz tx'otx' che najel te jurat naj.