Read kumam Sofonías 2 Bible Online

Sofonías 2 - kumam bible

Sofonías 2

¹Aqeye aj Judá, aqeye minti' in tzaj kych'ixwiye, kychmon ok kyib'e

²na'nxtoq ttzaj kyi'je aju o b'ant ti'j, na'nxtoq tb'aj q'ij ik tza'n mu'p in xi iqan tu'n kyq'iq', na'nxtoq ttzaj ttx'u'jil Qman kyi'je, ex na'nxtoq tul tq'ijlalil tu'n ttzaj tq'oj Qman kyi'je.

³Kyjyome Qman kykyaqile aqeye xjal mans ate'ye twitz tx'otx', aqeye in che niman qe tmandamyent. Che b'ete tuj tumel ex che oke mans, mya yajku che klete tuj ju q'ij ok ttzaj tq'oj Qman.

⁴Minti' xjal kyjel ten tuj tnam Gaza ex kb'ajel xitj tnam Ascalón; q'ijl che elex lajo'n qe xjal najl tuj tnam Asdod ex te jumajx che elex lajo'n qe najl tuj tnam Ecrón.

⁵Ay b'ek'b'il kywitze aqeye xjal aj Creta najlqeye ttzi'yile mar. Aqeye aj Canaán najlqeye tuj kytx'otx' aj Filisteo; ma tma Qman tu'n tkub' kysentense, kb'el xitun kytanmiye tu'n ex minti' jun xjal kyjel ten tuj.

⁶Aju tx'otx' tkub' ttzi mar k'okel te kywab'l alumaj, atzun che pol qe pastor, ex k'okel te kype'n ẍne'l.

⁷Qe aj Judá che kyjel anq'in, che etzal ti'j tx'otx' lu ok ttzaj Qman Dios onil kyi'j, ex che tel b'a'n ik tza'n nej. Atzun ma chixin che kwentil kyi'j qe kyẍne'l, ex che ojlal qonik'an kyuj qe ja otoq che kyaj kolin tuj tnam Ascalón.

⁸Atzun jlu in tma'n Qman aju Tajaw Tkyaqil, aju Kydios aj Israel: Ma nb'iye aju yasb'il kyu'n aj Moab ex aju xmayb'il kyu'n aj Amón. Ma che yolin mya b'a'n kyi'j qe xjal etzan wu'ne, ma jaw kyniman kyib' ex ma che okx laq'e' tuj kytx'otx' aj Judá. Kyja'tzun in xi nma'ne jun yol wu'nx wib'e; ikx kb'ajel kyi'j aj Moab ik tza'n o b'aj ti'j tnam Sodoma, ex ik kb'ajel kyi'j aj Amón ik tza'n b'aj ti'j tnam Gomorra; k'okel kytx'otx' ik tza'n jun kojb'il o'kx ch'i'x at tuj, k'okel te tqan atz'an, k'okel te jun lugar jumajx minti' xjal tuj. Qe xjal che kyjel anq'in kyxol qeju etzan wu'ne k'eletz kyi'n tkyaqilju at kye ex che okel tajwil kytx'otx'.

¹⁰Atzun castiw kb'el kyib'aj aj Moab ex aj Amón, tu'nju jaw kyniman kyib' ex e xmayin kyi'j qe xjal etzan tu'n Qman aju Tajaw Tkyaqil.

¹¹Ktzajel nimxix xob'ajil kyi'j tu'n Qman. Kb'el t-xitun kykyaqil kydios xjal at twitz tx'otx'; qe xjal tuj tkyaqil lugar che k'ulul twitz, ax ikx qe xjal ate' kyuj kykyaqil nasyon.

¹²Ax ikx kyeye, aqeye aj Etiopía, che najele tu'n t-spad Qman.

¹³Knajel tx'otx' Asiria tu'n, aju at tuj tb'anq'ab' q'ij, minti' xjal kyjel tq'o'n tuj tnam Nínive ex k'okel tu'n ik tza'n tzqij tx'otx'.

¹⁴Tujtzun che okex ten ẍne'l ex tkyaqil txkaj txkup te tjaq' k'ul. Qe ẍin ex qe tol che tal kyib'aj qe tqan ja, kq'ajtel kywi' kytzi' qe ventan, ex nojni k'okel kytzi ja tu'n ttx'aqan ti'xti, ok che kyjel q'ancha'lin qe tb'anil tze' kyjax twi ja.

¹⁵Atzun tnam lu jaw tnimanxix tib' ex in anq'intoq minti' tb'is, ex qe xjal najltoq tuj in kyma'ntoq kyja': O'kxku aqo'ye ex mi a'l juntl, che chi. Ex ma kyaj ten minti' xjal tuj ex ma tz'ok te kyja txkup te tjaq' k'ul. Qe xjal che ik'el b'et niqayin ti'j tnam che okel ten xmayil ti'j ex k'elel kychito'n kyq'ab'.