Read kumam Hageo 1 Bible Online

Hageo 1 - kumam bible

Hageo 1

¹Tuj tkab'in ab'q'i ttzyetlen tkawin rey Darío, tuj tnejel q'ij te tqaqin xjaw, tzaj yolin Qman te Hageo aju t-sanjel, tu'n t-xi tma'n te Zorobabel aju tky'ajal Salatiel ex gobernador te Judá, ex te Josué aju tky'ajal Josadac ex nejenel kye qe pal:

²Atzun jlu in tma'n Qman aju at Tipumal tu'n Tb'ant Tkyaqil tu'n: Qe xjal lu in kyma'n qa na'nx tpon tq'ijlalil tu'n tjaw b'inchet njaye juntl maj.

³Tzajtzun yolin Qman te Hageo aju t-sanjel, tu'n t-xi tma'n kye xjal kyja':

⁴¿O'kxpetzun kyeye ma pon tq'ijlalil tu'n kynajane kyuj qe ja tb'anilxix, ex atzun weye nja o kub' xitj minti' in jaw kyb'incha'ne?

⁵Aqine Kymane Tajaw Tkyaqil in xi nma'ne jlu kyeye: Che ximane ti'j aju in b'aj kyi'je.

⁶Nim in ku'x kyawa'ne, ex nik'xi in jaw kychmo'ne; in che wa'ne, ex minti' in noj kyk'u'je, in che k'ane, ex minti' in we' txqetle'n kyi'je; nno'k kyq'o'ne kyẍjo'we, ex minti' in che meq'te tu'n, ex aju twi kyk'u'j xjal in kyk'mo'n, in ku'x kyq'o'n mer ik tza'n tuj jun sak at toy'.

⁷Aqine Kymane Tajaw Tkyaqil in xi nma'ne jlu kyeye: Che ximane ti'j aju in b'aj kyi'je.

⁸Kyxi'ye kywi' qe witz, kyi'ntze qe tze' ex kyb'incha'n jawe njaye juntl maj, tu'ntzun ntzalaje tuj ja lu ex tu'n tten wajwalile tuj.

⁹Ximan kyu'ne tu'n tjaw kychmo'ne nim twitz kyawale, ex noq ch'in in chmet kyu'ne; ex aju in xi kyk'u'ne tuj kyjaye noq tajx in kub' naj wu'ne. ¿Tiqu'ntzun jlu? Chi Dios aju Tajaw Tkyaqil. Tu'nju minti' in jaw kyb'incha'ne njaye o kub' xitj, noq o'kx in che ximane ti'j tu'n tjaw kyb'incha'ne kyeye kyja,

¹⁰kyja'tzun minti' in tzaj jb'al kyib'aje, ex aju tx'otx' minti' in tzaj tq'o'n tawal.

¹¹Wu'ne ma tzaj koresma kyib'aj qe kojb'il ex kyib'aj qe witz, tib'aj triw, tib'aj tqan uva ex tib'aj tqan olivo, tib'aj tkyaqil twitz awal tuj kojb'il, kyib'aj xjal, kyib'aj alumaj ex tib'aj tkyaqil kyaq'unb'en xjal, chi Dios.

¹²Atzunte Zorobabel tuk'ix Josué kyuk'ix qe xjal otoq che ul meltz'aj tuj kytanmi, tej kyb'inte aju yol otoq tma Dios te Hageo aju t-sanjel, tzaj t-xob'il kyi'j ex xi kyniman.

¹³Atzunte Hageo aju t-sanjel Qman xi tma'n kye xjal aju yol otoq txi tma'n Dios te kyja': Chi Qman in tma'n: Aqine Kymane, lu qine atine kyuk'ile.

¹⁴Kyja'tzun tten, xi tkyuwsa'n Qman tk'u'j Zorobabel aju gobernador te Judá, tuk'ix Josué aju nejenel kye qe pal, ex qe xjal otoq che ul meltz'aj tuj kytanmi, tu'n tjaw b'inchet juntl maj tja Qman Dios aju Tajaw Tkyaqil.

¹⁵Tuj 24 tajlal tqaqin xjaw tuj tkab'in ab'q'i ttzyetlen tkawin Darío tzyet aq'untl kyu'n.