Read kumam Zacarías 10 Bible Online

Zacarías 10 - kumam bible

Zacarías 10

¹Kyqaninxe jb'al te Qman ok ch'ixtoq tul ttzi' jb'alil, ate Qman in tzaj q'onte q'ankyoq, ktzajel t-sama'n nimxix jb'al ex ktzajel poq'l k'ul tu'n tuj kojb'il kye kykyaqil xjal.

²Mya ax tok kyyol qe tilb'ilal ex mya ax tok aju in kyil qe chman, noq tten aju nno'k yek'un tuj kywitzik', ex noqx gan aju kyyol te q'uqb'ab'l k'u'jb'aj. Kyja'tzun, noq in che b'etje' xjal ik tza'n jun k'loj ẍne'l, ex nnik'x nimku kyu'n tu'n tlaj minti' jun pastor kyi'j.

³Kyja'tzun in tma'n Qman kyja': Ma tzaj nimxix ntx'u'jile kyi'j qe pastor ex kb'el nq'o'ne kycastiw qe nejenel. Aqine aju Tajaw Tkyaqil che okel nkwentine qe nẍne'le, aqeju tiyjil Judá, ex che okel nq'o'ne ik tza'n chej kyuwxix kyipun tuj q'oj.

⁴Kyxol aj Judá che jawil jlet qe nejenel, ik che okel ik tza'n jun ab'j tok te skyini te simyent, ik tza'n jun stak te tqan ja xb'alun ja ex ik tza'n jun xob'l plech in ajb'en tuj q'oj. Ex kyxol che jawil jlet qe nejenel.

⁵Che okel ik tza'n qe soldad at nim kyipun in kub' kyi'j aj q'oj kyu'n, ik tza'n in b'aj wab'at xoq'l tuj cay; che q'ojel tu'nju atine kyuk'il ex aqeju kyjax kyib'aj chej kb'el kyi'j kyu'n.

⁶Kxel nq'one kyipun qe tiyjil Judá ex che kletel qe tiyjil José wu'ne. Che ajetz meltz'aj wu'ne tu'n kyul tuj kytanmi tu'nju in q'aq'an nk'u'je kyi'j. Che okel mer ik tza'n minti' otoq che el wik'une, porke aqine Kyman, aju Kydios ex kxel nb'i'ne kyna'j Dios.

⁷Che okel qe tiyjil Efraín ik tza'n jun soldad kyuw tk'u'j tuj q'oj. Che tzalajel mer ik tza'n otoq txi kyk'a'n vin ex ok tilwajtz jlu kyu'n kyk'wa'l, ax ikx kye che jawil tzalaj. Ktzalajel kyanmi ti'j Qman.

⁸Che tzajel ntxko'ne ex che okel nchmo'ne, porke ma che kolpet wu'ne. Kchmetel nimxix kyb'aj ik tza'n chmet nimxix kyb'aj ojtxi.

⁹Maske o che b'aj nsputine kyxol qe nasyon ate' najchaq, pero chin tzajel na'ne kyu'n. Che anq'il kyuk'il kyk'wa'l ex che ajetz meltz'aj.

¹⁰Che ajetz wi'ne tuj Egipto, che ajetz wi'ne tuj Asiria, ex che pol wi'ne tuj Galaad ex tuj tx'otx' Líbano; nimxix kyb'aj ktel ex mlay kanun lugar te kye.

¹¹Che ik'etz tuj mar xob'ajilxix ex aju a' in xtulq'in tib'aj mar b'i'x kweb'el. B'ix ktzqijel nima Nilo, knajel tnimb'il tib' Asiria ex kb'ajel kyipun aj Egipto.

¹²Wu'ne kxel nq'o'ne kyipun aj Israel ex che b'etel kwentin qe wu'ne. Aqine Dios in chin q'mante ju yol lu, chi Qman.