Read kumam Zacarías 12 Bible Online

Zacarías 12 - kumam bible

Zacarías 12

¹Atzun jun tqanil lu tu'n Qman kyi'j aj Israel. Aju Qman o b'inchante kya'j ex o kub' tq'o'n tq'uqb'il tx'otx' ex o tzaj tq'o'n kychwinqlal xjal, chi in tma'n kyja':

²Aju tnam Jerusalén k'okel wu'ne ik tza'n jun copa q'e'n ex kchyo'mil kywi' kykyaqil qe nasyon tu'n, aqeju kyvesin kyib' tuk'il Jerusalén. Oktzun tb'aj kytxolb'an kyib' ti'j tnam Jerusalén, ax ikx che okel tzoqpaj kyi'j txqantl tnam tuj Judá.

³Tuj tq'ijlalil tzul k'okel tnam Jerusalén wu'ne ik tza'n jun ab'j nimxix talil wen te kye kykyaqil nasyon. Qa at jun taj tu'n tjaw tyukun, b'i'x ktza'wtel tu'n. K'okel kychmon kyib' kykyaqil nasyon tu'n kyok tzoqpaj ti'j Jerusalén,

⁴ex che okel nsek'pu'ne kykyaqil kychej, ex qe soldad kyjax kyib'aj che okel lok wu'ne. Atzun qe tiyjil Judá che okel nkwentine ex kykyaqil kychej nasyon kb'el moẍix kywitz wu'ne.

⁵Ok tok kyke'yin qe nejenel tuj Judá jlu, ok kyma' tuj kyanmi: Ate Qman aju Tajaw Tkyaqil atzun Kydios qeju najlqe tuj Jerusalén, ex atzunju in q'onte kyipun.

⁶Tuj tq'ijlalil tzul qe nejenel tuj Judá che okel ik tza'n txqan xq'a'l in k'ant kyxol ttxan si', ex ik tza'n jun ttxan tzaj in k'ant kyxol junjun che'l triw. Ex kyu'n che b'ajel tz'e'y kykyaqil qe nasyon ate' tuj kyb'anq'ab' ex tuj kynayaj, aqeju kyvesin kyib' kyuk'il, ex atzun qe xjal aj Jerusalén ax che najal juntl maj tuj kytanmi, chi Dios.

⁷Ex tnejel che kletel qe tiyjil Judá wu'ne, aqine Kyman, tu'ntzun mi tjaw kyniman kyib' qe tiyjil David ex qe xjal najlqe tuj Jerusalén kywitz txqantl tiyjil Judá.

⁸Wu'ne che kletel qe xjal najlqe tuj Jerusalén. Qeju minti' kyipun ate' kyxol k'okel mas kyipun ik tza'n te rey David, ex qe tiyjil David che okel ik tza'n te Dios, ik tza'n t-anjel Qman in kub' nej kywitz.

⁹Tuj tq'ijlalil tzul kb'el nxitune kykyaqil nasyon che okel tzoqpaj q'ojlel ti'j tnam Jerusalén.

¹⁰Ktzajel nq'o'ne Nxewe kyib'aj qe tiyjil David ex qeju najl tuj Jerusalén; knojel tuj kyanmi tu'n xtalb'il tu'ntzun tb'ant kykub'san nwitze. K'okel kyke'yin aju xjal o b'aj xayu'n kyu'n, che okel ten b'isul ex che jawil oq' ti'j ik tza'n in che jaw oq' ok tkyim aju o'kxku jun kyk'wa'l ex qa ok tkyim ju tnejel kyky'ajal.

¹¹K'okel jun matij b'is tuj Jerusalén ik tza'n b'is ok tuj Hadad-rimón tuj chq'ajlaj Meguido.

¹²Ex kykyaqil aj Israel che oq'el, teylex te junjun k'loj tiyjil tuj kyeylex kylugar: Qe tiyjil David che b'el ten jun pak' ex qe kyxu'jil tuj juntl pak'; qe tiyjil Natán jun pak' ex qe kyxu'jil tuj juntl pak':

¹³qe tiyjil Leví jun pak' ex qe kyxu'jil tuj juntl pak'; qe tiyjil Semei jun pak' ex qe kyxu'jil tuj juntl pak';

¹⁴ax ikx che oq'el txqantl k'loj kyiyjil, teylex junjun k'loj jun pak' ex qe kyxu'jil tuj juntl pak'.