Read kumam Zacarías 13 Bible Online

Zacarías 13 - kumam bible

Zacarías 13

¹Tuj tq'ijlalil tzul kjaqetel jun twi a' tu'n ttx'jet kyil ex kytz'ilil qe tiyjil David ex qeju najl tuj Jerusalén.

²Ex kyuj kykyaqil kytanmi aj Israel che elel wi'ne qe tilb'ilal tu'ntzun mi'n ttzaj na'ntl kyb'i. Ax ikx k'elel wi'ne tuj kytanmi aqeju nno'k kyq'on kyib' te nsanjele ex kykyaqil qeju kyajb'il tu'n kyk'ulun kywitz tilb'ilal. Aqine Dios in chin q'mante jlu.

³Ex, qa at jun ma tz'ok tq'on tib' te nsanjele, ax qe tman che q'malte te kyja': Il ti'j kymela tu'nju ma yolina nik'aj yol tuj tb'i Qman. Ax qe tman che okel xayunte te tu'n tkyim ok tok tq'on tib' te nsanjele.

⁴Tuj tq'ijlalil tzul, aqeju nno'k kyq'on kyib' te nsanjele ktzajel kych'ixwi ok kypakb'an ti'j ju in tzaj yek'un kye mer ik tza'n tuj witzik'. Mi jun k'okel tq'o'n t-ẍjo'w tu'n t-sb'un ik tza'n ẍjo'w in ajb'en kyu'n qe nsanjele,

⁵noq o'kx teylex te junjun kxel tma'n kyja': Mya t-sanjel Dios we qin, noq jun aq'nal xjal qine. Atxix tej k'wa'lxtoq qine in chin aq'nane tuj kojb'il.

⁶Qatzun at jun ma tzaj qaninte te: ¿Ti kyxilen qe tb'antlen ẍil ate'k ti'j t-ximlala? qa chi, atzun te kxel ttzaq'we'n: O chin ok k'ixb'isa'ne tuj kyja qe wamiwoye.

⁷Ate Qman aju Tajaw Tkyaqil chi in tma'n kyja': We'ktza aya spad, tok tzoqpaja ti'j ju xjal tok te pastor wu'ne ex tok te onil weye. B'yonkuya ju pastor, atzun qe ẍne'l che elel sputj ex atzun weye chin okel tzoqpaje kyi'j qe tal ẍne'l.

⁸Qeju najl tuj tx'otx' lu che elel pa'n tuj ox k'loj, kab'e k'loj che najel, atzun toxin k'loj kyjel anq'in.

⁹K'okex nq'o'ne toxin k'loj tuj q'aq', che b'ajel nsaqsa'ne ik tza'n in b'aj saqset saq pwaq, ex k'ik'el nwitze kyi'j ik tza'n nne'l nik'b'aj ti'j q'an pwaq. Oktzun che kub'sal nwitze ex atzun weye ktzajel ntzaq'we'ne. Kxel nma'ne kye kyja': Aqeye xjal etzan wu'ne, ex atzun kye ktzajel kytzaq'we'n kyja': Ate Qman, atzun Qdios. Aqine Dios in chin q'mante jlu.