Read kumam Zacarías 2 Bible Online

Zacarías 2 - kumam bible

Zacarías 2

¹Ax ikx at juntl tzaj yek'un weye. O wile jun xinaq q'i'n jun ky'jaj te echb'il tu'n.

²Xi nqanine te kyja': ¿Jatum ma txi'ya? Atzun te tzaj ttzaq'we'n: Ma chinxe echalte tnam Jerusalén, tu'ntzun twile jte' tnuqb'il ex jte' twitz.

³Atzunte anjel otoq yolin wuk'ile xi laq'e' ch'intl ex ok noj juntl anjel twitz,

⁴ex tzaj q'ma'n te kyja': Chux ojqelanxa ex q'manxa teju ku'xun kyja': Minti' muro k'okel ti'jele tnam Jerusalén, tu'nju nim xjal knajal tuj ax ikx alumaj.

⁵Chi Qman in tma'n: Aqine chin okele te muro puro q'aq' ti'jele tnam Jerusalén ex kxel nyek'une wajwalile tuj tnam.

⁶Chi Qman in tma'n: Wu'ne o b'aj kysputin kyib'e tuj kykyajil pak' twitz tx'otx', ex ja'lo in xi nma'ne kyeye: Jurat-x kyetz oqe tuj tx'otx' tuj tb'anq'ab' q'ij.

⁷Aqeye aj Sión o che pon q'i'ne tuj Babilonia, kyetz oqe. Aqine Dios ma chin q'mante jlu.

⁸Ate Qman aju Tajaw Tkyaqil ma chin tzaj sama'ne tu'n, tuk'il jun tqanil kyi'j qe nasyon e ok tzoqpaj kyi'je tu'n t-xi kyi'n tkyaqilju at kyeye, chi kyja': Alkye ma tz'ok tb'incha'n mya b'a'n ti'j tnam etzan wu'ne junx ta' ik tza'n ti'j t-santil tb'aq' nwitze nno'k tb'incha'n jlu.

⁹Kyja'tzun ax qine chin q'ojile kyi'j qe nasyon lu, ex ax qe kymajen che okel tzoqpaj kyi'j ex kxel kyi'n tkyaqilju at kye, chi Dios. Kyja'tzun k'elel kynik'e ti'j, ate Qman aju Tajaw Tkyaqil ma tzaj samante weye.

¹⁰Chi Qman in tma'n: Che b'itzane tuk'il tzalajb'il aqeye najl tuj tnam Jerusalén, ok chin ule najal kyxole.

¹¹Oktzun tpon tq'ijlalil lu, nim qe nasyon kxel kyniman tyol Qman ex kxel tma'n Qman kyja': Ax ikx qe nasyon lu che okel te weye. Ok chin najale kyxole chi Dios. Kyja'tzun k'elel kynik'e ti'j, ate Qman aju Tajaw Tkyaqil ma tzaj samante weye.

¹²K'okel Qman juntl maj te tajwil tx'otx' Judá ex k'okel te jun tetzb'il nimxix toklen tuj tx'otx' Xjan ex kjawil t-sk'o'n juntl maj tnam Jerusalén.

¹³Kykyaqilxwit xjal che kub' txule' twitz Qman, porke ktzajel tuj tnajb'il Xjan tuj kya'j.