Read kumam Zacarías 4 Bible Online

Zacarías 4 - kumam bible

Zacarías 4

¹Aju anjel in yolintoq wuk'ile ajtz meltz'aj juntl maj ex in jaw tk'asun ik tza'n nno'kx k'asun jun xjal in tan.

²Tzaj tqanin weye: —¿Ti in tila? Atzun weye xi ntzaq'we'ne: —In wile jun tkub'il kandil q'an pwaq ttx'otx'il, tuk'ix jun tkub'il aseyt tkub' tib'aj ex wuq kandil; ex kyuj wuq tubo in pon kanun aseyt kyi'j.

³At kab'e tqan olivo tkub' ttxlaj tkub'il kandil, jun tuj tb'anq'ab' ex jun tuj tnayaj.

⁴Ax ikx xi nqanine te anjel aju in yolintoq wuk'ile: —Tat, ¿ti t-xilen jlu?

⁵Atzunte anjel tzaj ttzaq'we'n kyja': —¿Minti'petzun b'a'n tu'na ti t-xilen? Xi ntzaq'we'ne: —Tat, minti' b'a'n wu'ne.

⁶Atzunte anjel tzaj tma'n weye: —Atzun tqanil lu tu'n Qman te Zorobabel: Mya tu'n kyipumal txqan soldad, ex mya tu'n kyipumal xjal kb'antel aq'untl, noq o'kx tu'n Nxewe, chi Qman aju Tajaw Tkyaqil.

⁷¿Ti toklena aya matij witz? K'okela te jun chq'ajlaj twitz Zorobabel. Ate Zorobabel kb'el q'onte aju mankb'il ab'j tu'n tjupet tja Dios, ex kjawiltzun tq'ajq'ajel kywi' kykyaqil xjal te aq'b'il chjonte: Tb'anilxix te jlu, tb'anilxix te jlu.

⁸Tzaj tma'ntl Qman juntl tqanil weye:

⁹Ate Zorobabel ma kub' q'onte t-simyentil tja Dios, ex tu'nx Zorobabel kpol b'aj aq'untl. Kyja'tzun k'elel kynik' ti'j, aqine Dios aju Tajaw Tkyaqil ma chinx samante teya.

¹⁰Aqeju minti' xi kyniman tej ttzaj xe't aq'untl, ja'lo che jawil tzalaj ok tkyil ok tpon b'aj aq'untl tu'n Zorobabel, chi Qman. Ax ikx tzaj tma'ntl anjel weye: —Aqeju wuq kandil lu, atzun qe tb'aq' twitz Qman in che ke'yin tuj tkyaqil twitz tx'otx'.

¹¹Xi nqanine te anjel: ¿Ti kyxilen qe kab'e tze' olivo kykub' ttxlaj tkub'il kandil, jun tuj tb'anq'ab' ex jun tuj tnayaj?

¹²Ax ikx xi nqanintle te: ¿Ti kyxilen qe kab'e tq'ab' olivo kykub' junx kyuk'il qe tubo q'an pwaq kytx'otx'il, aqeju in che ajb'en tu'n tpon aseyt kyi'j qe kandil?

¹³Tzaj ttzaq'we'n anjel: —¿Minti'petzun b'a'n tu'na ti kyxilen? Xi ntzaq'we'ne: —Tat, minti' b'a'n wu'ne.

¹⁴Atzun te tzaj ttzaq'we'n: —Atzun qe kab'e xjal lu ma txi q'o'n kyoklen tu'n kyajb'en te Qman aju Tajaw Tkyaqil twitz tx'otx'.