Read kumam Zacarías 5 Bible Online

Zacarías 5 - kumam bible

Zacarías 5

¹Ax ikx o wile jun b'otz' u'j tz'ib'an yol twitz ex in lipantoq twitz kya'j.

²Tzaj tqanin anjel weye: —¿Ti in tila? Xi ntzaq'we'ne: —Ma wile jun b'otz' u'j tz'ib'an yol twitz ex in lipan twitz kya'j, at laj var tnuqb'il ex jwe' var twitz.

³Tzajtzun tma'n anjel weye: Atzun tz'ib'amaj tkyaqilju mya b'a'n ktzajel tuj tkyaqil twitz tx'otx'. Ik tza'nx in tma'n tuj jun pak' twitz, kb'el kycastiw kykyaqil qeju ma che elq'an, ex kykyaqil qeju ma txi kytziyan yol mya ax tok, kb'el kycastiw tu'n kykyim ik tza'nx tz'ib'an tuj juntl pak'.

⁴Ate Qman aju Tajaw Tkyaqil chi in tma'n kyja': A qine chin xel samante mya b'a'n tuj tja ju xjal in elq'an ex tuj tja ju xjal in ttziyan yol mya ax tok ex nno'k tq'o'n qine te testiw ti'j tyol. Aju mya b'a'n ax ktel tuj kyja ex kb'ajel xitj tkyaqil tu'n, kyuk'ix qe viga ex qe ab'j.

⁵Etz aju anjel in yolintoq wuk'ile ex tzaj tma'n weye kyja': —Q'onka kwent ti'j aju ktzajel yek'un teya ja'lo.

⁶Xi nqanine: —¿Titzun jlu? Atzun te tzaj ttzaq'we'n: —Ate jlu jun cajón. Ex tzaj tma'ntl: Aju cajón lu, atzun malb'il kyil kykyaqil qe aj Israel.

⁷Tkub'toq jun tmaqsil cajón, plom ttx'otx'il. Jaw jaqo'n tmaqsil ex attoq jun xu'j q'uql tku'x tuj.

⁸Ex tzaj tma'n anjel weye: —Aju xu'j lu, atzun jun techal ti'j ju mya b'a'n. Ku'x tlamo'n juntl maj tuj cajón ex kub' tmaqsi'n ttzi' tu'n tmaqsil plom ttx'otx'il.

⁹Xi nke'yine juntl maj ex o wile kab'e xu'j attoq kyxik' mer ik tza'n kyxik' garza ex tu'n kyq'iq' in che b'et. Xi kyi'n aju cajón twitz kya'j.

¹⁰Xitzun nqanine te anjel aju in yolintoq wuk'ile: ¿Jatum kpol kyi'n xu'j aju cajón?

¹¹Atzunte anjel tzaj ttzaq'we'n: —Ma che'x b'inchalte jun tja tuj Babilonia. Oktzun tjupet tja, kpol kyi'n aju cajón tuj ex axtzun kyjel ten tib'aj jun tq'uqb'il.