Read kumam Zacarías 6 Bible Online

Zacarías 6 - kumam bible

Zacarías 6

¹Ax ikx o wile kyaje carwaj te q'ojb'il ate' kyxol kab'e witz, ik che ke'yin ik tza'n q'an k'uxb'il.

²Aju tnejel carwaj jawo'ntoq kyu'n chej kyaq kyi'j; aju tkab'in jawo'ntoq kyu'n chej q'eq kyi'j;

³aju toxin jawo'ntoq kyu'n chej saq kyi'j; aju tkyajin jawo'ntoq kyu'n chej sib' kyi'j ex nimxix kyipun.

⁴Xi nqanine te anjel aju in yolintoq wuk'ile: —Tat, ¿ti t-xilen jlu?

⁵Atzunte anjel tzaj ttzaq'we'n: —Aqe jlu, aqetzun kyaje kyq'iq' in che etz twitz Qman aju Tajaw Tkyaqil twitz tx'otx'.

⁶Aju carwaj jawo'n kyu'n chej q'eq kyi'j kyja' kyxi' tuj tx'otx' tuj tb'anq'ab' q'ij, aju carwaj jawo'n kyu'n qe chej saq kyi'j kyja' kyxi' tuj tx'otx' tumlal telex q'ij, ex aju carwaj jawo'n kyu'n chej sib' kyi'j kyja' kyxi' tuj tx'otx' tuj tnayaj q'ij, chi anjel.

⁷E je'xtzun qe chej sib' kyi'j, nimxix kygan tu'n tb'aj kyb'etin tuj tkyaqil twitz tx'otx'. Xi tma'n anjel kye: Kyb'etin b'aje tuj tkyaqil twitz tx'otx'. Ex o kyb'incha ikju.

⁸Te tib'ajxi jlu, tzaj sch'in anjel wi'je, tzaj tma'n weye kyja': —Aqeju e je'x tuj tx'otx' tuj tb'anq'ab' q'ij ma chewix tq'oj Qman kyu'n tuj ju tx'otx' ma chixin.

⁹Tzaj tma'n Qman tqanil lu weye:

¹⁰—Chmo'n jawa ch'in oyaj kyxol Heldai, Tobías ex Jedaías, aqeju e'x q'i'n tuj Babilonia ex o che ajtz meltz'aj. Ex ax tuj q'ij lu txi'ya tja Josías aju tky'ajal Sofonías.

¹¹Ti'j ju saq pwaq ex q'an pwaq kjawil tchmo'na, b'inchama qe coron, ex q'on jaxa jun tuj twi' Josué aju tnejel pal ex tky'ajal Josadac.

¹²Ex q'manxa te kyja': Ate Qman aju Tajaw Tkyaqil chi kyja': Lu xinaq aju tok tb'i T-xul, ti'j ktzajel jlet jun t-xul, ex atzun te kjawil b'inchante juntl maj aju tja Qman.

¹³Kjawil tb'incha'n juntl maj tja Qman ex ok tk'ma' nimb'il ik tza'n jun rey. Kb'el qe' tuj tq'uqb'il tu'n tkawin, kb'el qe' pal ttxlaj ju tq'uqb'il ex kmojeb'el kyyol kykab'il.

¹⁴Ax che kyjel ten qe coron tuj tja Qman te nab'l kye Heldai, Tobías, Jedaías ex Josías aju tky'ajal Sofonías.

¹⁵Che ul qe xjal te najchaq onil tu'n tjaw b'inchet juntl maj tja Qman; k'eleltzun kynik'e ti'j, ate Qman aju Tajaw Tkyaqil ma tzaj samante weye. Kb'antel jlu qa ma txi kynimane tyol Qman aju Kydiose.