Read kumam Zacarías 7 Bible Online

Zacarías 7 - kumam bible

Zacarías 7

¹Tuj tkyajin q'ij te tb'elajin xjaw (aju xjaw tok tb'i Quisleu), tej lajo'ntoq tkyajin ab'q'i ttzyetlen tkawin rey Darío, tzaj tma'n Qman jun tqanil te Zacarías aju t-sanjel.

²Tuj tq'ijlalil lu, qe xjal tuj tnam Betel xi kysama'n Sarezer tuk'ix Regem-melec kyuk'ix qe txqantl kyuk'il tu'n t-xi kyqanin tky'iwb'il Qman

³ex tu'n t-xi kyqanin kye qe t-sanjel Dios ex kye qe pal ate' tuj tja Qman aju Tajaw Tkyaqil, che chi kyja': ¿Kukxpe qo b'isule ex kukxpe kb'el qyo'ne we'yaj tuj tjwe'yin xjaw tuj junjun ab'q'i ik tza'n in qb'incha'ne ma tz'el ela'xi ab'q'i ex kukx ja'lo? Che chi.

⁴Tzaj yolin Qman weye, aju Tajaw Tkyaqil, ex tma kyja':

⁵Q'manxa kye kykyaqil tnam xjal najlqe tuj tx'otx' lu ex kye qe pal: Ma b'ant-xi 70 ab'q'i in kub' kyyo'ne we'yaj ex in che b'isune tuj tjwe'yin ex tuj twuqin xjaw te junjun ab'q'i, ex minti' in kyb'incha'ne jlu tu'n njaw kynimsa'ne,

⁶noq o'kx, ok in che wa'ne ex ok in che k'ane in kyb'incha'ne noq tu'n tnoj kyk'u'je, chikuya kye.

⁷¿Myapetzun ax yol lu o q'manjtz tu'n Qman kyu'n qe t-sanjel o che ten ojtxi, tej attoq tnam Jerusalén tuj txub'txaj ex tej attoq nimku xjal tuj, ex ate'xtoq xjal kyuj qe tnam ate' ti'jele tnam Jerusalén, ex tej najlqe'xtoq qe xjal tuj Néguev ex tuj chq'ajlaj t-xe witz?

⁸Tzaj yolin Qman tuk'il Zacarías aju t-sanjel ex chi kyja':

⁹Atzun jlu o txi nma'ne: Kyb'inchanxe kyi'j xjal tuj tumelxix, kyb'inchame xtalb'il ex tenxwit tq'aq'b'il kyk'u'je kyi'j kyuk'ile.

¹⁰Mi'n kub' kyyajla'ne qe meb'a xu'j, mi qe k'wa'l minti' kyman ex kytxu', mi qe stranjer xjal ex mi qe meb'a minti' at kye. Mi'n kub' kyximane tu'n tok kyb'incha'ne mya b'a'n ti'j kyuk'ile, chi Dios.

¹¹Ex minti' kub' tuj kywitz xjal tu'n t-xi kyniman. Kykyaqil ajtz kyq'o'n tzal kyi'j twitz Dios ex ok kymaqsi'n kyẍkyin tu'n mi'n kyb'inte tyol.

¹²Kub' kykyuwsa'n kyanmi ik tza'n ab'j kyuw, tu'n mi'n t-xi kyb'i'n qe xnaq'tzb'il ex qe yol e tzaj tma'n Qman aju Tajaw Tkyaqil, aju o tzaj tma'n kye t-sanjel ojtxi. Kyja'tzun tzaj nimxix tq'oj Qman aju Tajaw Tkyaqil,

¹³ex tma: Tza'nxtzun kye minti' ma chinx kyb'i'n tej nyoline, kyja'xtzun weye, mlay che'x nb'i'ne ok kytzaj yolin weye.

¹⁴Kyja'tzun e b'aj nsputine ik tza'n tu'n xkyaqinpaẍ kyxol kykyaqil nasyon minti' ojtzqi'n kyu'n, ex kyetzlenxi tuj kytanmi ok kytx'otx' te tzqij tx'otx' jatum mi jun xjal jaku najan tuj. Tb'anilxix aju tx'otx' ex kyu'nx ma tz'ok te tzqij tx'otx'.