Read kumam Zacarías 8 Bible Online

Zacarías 8 - kumam bible

Zacarías 8

¹Ate Qman aju Tajaw Tkyaqil tzaj tma'n tqanil lu weye:

²Aqine Dios aju Tajaw Tkyaqil, atzun jlu in xi nma'ne: At nimxix nganiye ti'j tnam Sión ex ma tzaj nimxix ntx'u'jile kyi'j qe aj q'oj ti'j.

³Ja'lo chin ajel meltz'aje tuj Jerusalén tu'ntzun nnajane tuj. K'okel q'o'n tb'i tnam Jerusalén: Aju tnam jatum ate' qe xjal in japun tyol Dios kyu'n; ex aju witz etzan wu'ne, k'okel tb'i: Aju Witz Xjan. Aqine Tajaw Tkyaqil.

⁴Che b'el qe' juntl maj qe tij xinaq ex qe tij xu'j kyuj qe cay tuj Jerusalén, ex teyle junjun q'i'n tky'aqo'ch tu'n tlaj nimxix kyab'q'iyil.

⁵Che nojel qe cay tuj tnam kyu'n qe tal q'a ex qe tal txin in che schan.

⁶Tuj tq'ijlalil tzul, tkyaqil jlu k'okel te jun b'inchb'en ma'xix t-xilen tuj kywitz qe xjal etzan wu'ne, aqeju che kyjel anq'intl, atzun weye tuj nwitz mya jun b'inchb'en ma' t-xilen jlu. Aqine Dios Tajaw Tkyaqil in chin q'mante jlu.

⁷Qe xjal etzan wu'ne che kletel wu'ne tjaq' kykawb'il xjal ate' tuj tx'otx' tuj tjawitz q'ij ex tuj tx'otx' tuj telex q'ij,

⁸ex che ajetz wi'ne juntl maj tu'n kynajan tuj Jerusalén. Che okel te jun tnam etzan wu'ne, atzun weye chin okele te Kydios axix tok ex tz'aqlxix qine.

⁹Atzun jlu in tma'n Qman aju Tajaw Tkyaqil: Kyq'onke tilil aq'untl, aqeye ma kyb'iye ja'lo aju o q'manjtz ojtxi kyu'n qe t-sanjel Dios atxix tej tkub' qe' simyent tu'n tjaw b'inchet juntl maj tja Qman aju Tajaw Tkyaqil.

¹⁰Ojtxi minti'toq chojb'il twi kyk'u'j xjal ex mi qe alumaj. Ex tu'n kylaj qe aj q'oj, minti'toq ttxub'txajal at kyxol xjal ex ax qine otoq chin kub' q'onte q'oj kyxol xjal.

¹¹Atzun ja'lo mlay nb'inchatle kyi'j qe xjal che kyjel tentl tuj tnam lu ik tza'n o b'ant wu'ne ojtxi. A qine Dios Tajaw Tkyaqil in chin q'mante jlu:

¹²Tuj txub'txaj che xe'l xjal awal, k'okel twitz uva; ktzajel tq'o'n tx'otx' tawal ex ktzajel jb'al cabalxix. Tkyaqil jlu kxel nq'o'ne te kyetzb'il qe xjal etzan wu'ne, aqeju che kyjel ten.

¹³Aqeye aj Judá ex aj Israel, ik tza'n o che yolin xjal mya b'a'n kyi'je tej kytene kyuj qe nasyon, ikxtzun che kletele wu'ne ja'lo ex che okele te ky'iwb'il. Mi'n che xob'e, kyq'o'nk kyipune.

¹⁴Atzun jlu in tma'n Qman aju Tajaw Tkyaqil: Kub' nximane tu'n tkub' nq'o'ne kycastiw kyxe'chele ojtxi tej ttzaj nq'oje kyu'n ex minti' ik'x ti'j wu'ne.

¹⁵Atzun ja'lo ma kub' nximane tu'n nb'inchanteye b'a'n kyi'j aj Jerusalén ex kyi'j aj Judá. Kyja'tzun, mi'n che xob'e.

¹⁶Atzun jlu tu'n kyb'inchanteye: Che yoline axix tok kyuk'il txqantl, kyb'inchanxe kyi'j xjal tuj tumelxix ex tz'ok tililx kyu'ne tu'n tb'ant kyten xjal kyxolx ok kypon xtisil.

¹⁷Mi'n kub' kyximane tu'n kyb'inchanteye mya b'a'n kyi'j kyuk'ile ex mi'n txi kytziyane yol mya ax tok, ex tkyaqil jlu nne'l wik'une. Aqine Dios in chin q'mante jlu.

¹⁸Ate Qman aju Tajaw Tkyaqil tzaj tma'n weye kyja':

¹⁹Aju tu'n tkub' kyyo'ne we'yaj tuj tkyajin xjaw, tuj tjwe'yin, tuj twuqin ex tuj tlaji'n, ja'lo k'okel te tzalajb'ilxix kyeye ex te ninq'ij tzalajb'ilxix kye qe tiyjil Judá. Che tzalajxe ti'j ju yol axix tok ex tu'n kytene b'a'n kyxolxe.

²⁰Atzun jlu in tma'n Qman aju Tajaw Tkyaqil: Che ul nimku k'loj xjal tzalu ex qe xjal najlqe kyuj qe nintz tnam.

²¹Qe xjal tuj jun tnam che xe'l kyuk'il xjal tuj juntl tnam ex kxel kyma'n kye kyja': Qo' qe jyolte Qman aju Tajaw Tkyaqil, qo' qanilte tu'n qkub' tky'iwla'n. Ex atzun qe xjal tuj juntl tnam ktzajel kytzaq'we'n kyja': Ax ikx qeye qo xe'le.

²²Che ul tuj Jerusalén nimku tnam ex qe nasyon nim kyipun, che ul jyolte Qman aju Tajaw Tkyaqil, che ul qanil te tu'n kykub' ky'iwla'n tu'n.

²³Tuj tq'ijlalil tzul, laj stranjer xjal kye txqantl nasyon ktzajel kytzyu'n ttxa'n t-xb'alun jun xjal judiy ex kxel kyma'n te kyja': Qaje qo'xe kyuk'ile, porke ma qb'iye atzun ta' Dios kyuk'ile.