Read kumam Malaquías 3 Bible Online

Malaquías 3 - kumam bible

Malaquías 3

¹Chi Qman aju Tajaw Tkyaqil: Kxel nsama'ne nsanjele tu'n tkub' nej nwitze b'inchalte b'e. Aju Kyajawe in che ayone ti'j noq minab'en kpol tuj tja, aju tja Dios. Ch'ix tpon sanjel aju kyaj b'ant ti'j jun yol tu'n kyuk'ile ex aju kyaje tu'n tpon, chi Qman.

²Ex ¿alkye jun jaku tzik'x tu'n tuj q'ij ok tul? ¿Alkye jun jaku ten tipun tu'n tkub' we' twitz ok tul? Porke tzul mer ik tza'n jun q'aq' tu'n tb'aj tz'e'y tkyaqil qb'inchb'en mya b'a'n tu'n, ex mer ik tza'n jun jabón tu'n tel tx'jet tz'il qi'j.

³Kb'el qe' tu'n kyb'aj saqset qe pal tiyjil Leví tuj kyb'inchb'en mya b'a'n, ik tza'n jun xjal nno'kx tq'o'n saq pwaq ex q'an pwaq tuj q'aq' tu'n tkyaj saqix. Te tib'ajxitzun jlu, kxel kyq'o'n pal kyoyaj tuj tumelxix te Qman.

⁴Ex kjawil tzalaj Qman ti'j kyoyaj aj Judá ex ti'j kyoyaj aj Jerusalén, ik tza'n tej tjaw tzalaj ti'j ojtxi.

⁵Chi Qman aju Tajaw Tkyaqil: Chin ule tu'n tkub' kycastiwoye wu'ne. Tujx q'ij lu ax qine chin okel te testiw kyi'j qeju b'a'n mañ kyu'n, qeju in kyb'incha'n aj pajil, qeju noq tten in xi kytziyan jun kyyol, qeju mya cabal in xi kychjo'n twi kyk'u'j qe majen, qeju in che yajlan kyi'j qe meb'a xu'j ex kyi'j qe k'wa'l minti' kyman ex kytxu', ex qeju in kyb'incha'n mya b'a'n kyi'j stranjer xjal, ex minti' in che niman weye.

⁶Aqine Dios minti' in chin ch'expaje, kyja'tzun minti' ma che naje, aqeye tiyjil Jacob.

⁷Ma tz'el kypa'n kyib'e ti'j nleye ik tza'n el kypa'n kyib' qe kyxe'chele, ex minti' in xi kynimane. Aqine Dios aju Tajaw Tkyaqil in xi nma'ne kyeye: Kyajtz meltz'aje wuk'ile ex jakutzun chin aj meltz'aje kyuk'ile. Atzun kyeye in kyma'ne: ¿Tiqu'n il ti'j tu'n qaj meltz'aje tuk'ila?

⁸In xi nqanine kyeye: ¿Jakupelo b'ant tu'n nkub' elq'a'ne tu'n jun xjal, aqine Dios? Atzun kyeye ma txi kyelq'a'ne aju at woklene ti'j. Ex kukx ttzaj kyqanine: ¿Titzun ma qelq'aye teya? Aju ma tz'el kyelq'a'ne, atzun aju tlaji'n ex txqantl oyaj weye.

⁹Ax tok aqeye aj Israel, kykyaqile ma txi kyelq'a'ne aju at woklene ti'j; tu'n tlaj jlu ktzajel mya b'a'n kyib'aje wu'ne.

¹⁰Kyintze tkyaqil tlaji'n tuj k'ub'l te, tu'ntzun mi'n tkub' naj wab'j tuj njaye. Chin kyq'o'nke tuj malb'il ti'j jlu, qa ma tzaj kyi'ne tlaji'n, che elel njaqo'ne qe tventanil kya'j tu'n t-xi nq'o'ne nimxix nxtalb'ile kyeye.

¹¹Mlay txi nq'o'ne amb'il kye qe ẍplon tu'n tb'aj kywa'n kyawale ex mlay tzaj tz'aq twitz ky-uvaye qa na'nxtoq tul tq'ij.

¹²Kykyaqil txqantl nasyon ok kyma' kyja': At tzalajb'il kyeye tu'nju tb'anilxix kytx'otx'e. Aqine Dios aju Tajaw Tkyaqil in chin q'mante jlu.

¹³Chi Qman in tma'n: Kyuw o che yoline wi'je, ex in tzaj kyqanine weye: ¿Alkyetzun yol mya b'a'n o txi qma'ne ti'ja?.

¹⁴O kymaye kyja': Noqx gan tu'n qajb'en te Dios ex ¿alkyetzun b'a'n jaku qkamb'a qa ma txi qniman tley, ex ti tajb'en qe tu'n qb'et tuj b'is twitz Qman aju Tajaw Tkyaqil?

¹⁵In qile at tzalajb'il kye qe xjal in jaw kyniman kyib', qe b'inchal mya b'a'n puro b'a'n nne'la tkyaqil kye, ex minti' castiw in tzaj kyi'j qeju nno'k kyq'o'n Dios tuj malb'il, che chiye.

¹⁶Qe xjal nimal Dios e yolin kyxolx ex e kub' b'i'n tu'n Qman. Twitz Qman o tz'ib'et jun libro jatum in che tzaj na'n qe xjal b'a'n che niman te Qman ex in che ximan ti'j.

¹⁷Tuj tq'ijlalil ok tb'ant jlu wu'ne, che okel te jun tnam etzan wu'ne, ex ktzajel q'aq'an nk'u'je kyi'j ik tza'n jun mamb'aj in tzaj tz'e'y tk'u'j ti'j tk'wa'l in ajb'en te, chi Qman aju Tajaw Tkyaqil.

¹⁸Atzun k'elel kynik'e ti'j qa mya junx ta' ju xjal b'a'n tuk'il ju xjal mya b'a'n, ex mya junx ta' ju xjal in k'ulun te Dios tuk'il ju xjal minti' in k'ulun te.