Read kumam Mateo 1 Bible Online

Mateo 1 - kumam bible

Mateo 1

¹Atzun tu'jil jlu jatum tz'ib'an kyb'i qe t-xe'chel Jesucrist; ate Jesucrist tiyjil David, atzunte David tiyjil Abraham.

²Ate Abraham tman Isaac, atzunte Isaac tman Jacob, atzunte Jacob tman Judá kyuk'ix qe terman Judá.

³Atzunte Judá kyman Fares tuk'ix Zara, tal Tamar qe jlu. Atzunte Fares tman Esrom, atzunte Esrom tman Aram.

⁴Atzunte Aram tman Aminadab, atzunte Aminadab tman Naasón, atzunte Naasón tman Salmón.

⁵Atzunte Salmón tman Booz, tal Rahab jlu. Atzunte Booz tman Obed, tal Rut jlu. Atzunte Obed tman Isaí.

⁶Atzunte Isaí tman rey David, atzunte rey David tman Salomón, ate Salomón tal t-xu'jilb'en Urías.

⁷Atzunte Salomón tman Roboam, atzunte Roboam tman Abías, atzunte Abías tman Asa.

⁸Atzunte Asa tman Josafat, atzunte Josafat tman Joram, atzunte Joram tman Uzías.

⁹Atzunte Uzías tman Jotam, atzunte Jotam tman Acaz, atzunte Acaz tman Ezequías.

¹⁰Atzunte Ezequías tman Manasés, atzunte Manasés tman Amón, atzunte Amón tman Josías.

¹¹Atzunte Josías tman Jeconías kyuk'ix qe titz'in, aqeju e ten tuj tq'ijlalil tej kyxi q'i'n aj Israel pres tuj Babilonia.

¹²Ate Jeconías tman Salatiel. Otoq che pon q'i'n aj Israel tuj Babilonia tej titz'j Salatiel. Atzunte Salatiel tman Zorobabel.

¹³Ate Zorobabel tman Abiud, atzunte Abiud tman Eliacim, atzunte Eliacim tman Azor.

¹⁴Atzunte Azor tman Zadoc, atzunte Zadoc tman Aquim, atzunte Aquim tman Eliud.

¹⁵Atzunte Eliud tman Eleazar, atzunte Eleazar tman Matán, atzunte Matán tman Jacob.

¹⁶Atzunte Jacob tman José tchmil Mariy, ex ate Mariy ttxu' Jesús aju Crist tb'i, aju at toklen tu'n Dios.

¹⁷Kyja'tzun at kyajlaj k'loj kyiyjil aj Israel tzaj xe't ti'j Abraham ul ti'j David; ex at kyajlaj k'loj kyiyjil aj Israel tzaj xe't ti'j David ul ti'j tq'ijlalil tej kyxi q'i'n aj Israel tuj Babilonia; ex at kyajlaj k'loj kyiyjil aj Israel tzaj xe't ti'j tq'ijlalil tej kyxi q'i'n aj Israel tuj Babilonia ul b'aj tej titz'j Crist, aju at toklen tu'n Dios.

¹⁸Tej tul itz'j Jesucrist kyja'tzun tten lu: Ate Mariy ttxu' Jesús otoq b'ant ti'j tu'n tmoje' tuk'il José; ex na'nxtoq kyok moje' o tna' Mariy qa otoq tz'ok ten tal tu'n tipumal Xewb'aj Xjan.

¹⁹Atzunte José aju tchmil Mariy, tej tb'inte otoq tz'ok ten tal Mariy o tajb'e tu'n tkyaj tkolin tuj ewaj; porke tz'aqlxix te José, ex minti' o tajb'e tu'n ttzaj tch'ixwi Mariy kywitz xjal.

²⁰Ex matoq in ximan José ti'j jlu, kub' tyek'un tib' jun t-anjel Qman twitz tuj twitzik', ex xi tma'n anjel te: —Aya José tiyjil David, mi'n xob'a tu'n tok Mariy te t-xu'jila, porke tu'n tipumal Xewb'aj Xjan ma tz'ok ten tal.

²¹Ex tzul itz'j jun tal, ex k'okel tq'o'na tb'i JESÚS. Atzun tb'i k'okel, porke qe xjal etzan tu'n che kletel tu'n tuj kyil.

²²Tkyaqil jlu o b'ant tu'ntzun tjapun aju q'ma'maj tu'n Qman, aju tzaj tma'n t-sanjel Dios chi kyja':

²³At jun q'apoj na'nx tlonte xinaq k'okel ten tal, ex q'a jun tal tzul itz'j, ex Emanuel tb'i k'okel, chi t-sanjel Dios. Aju yol Emanuel atzun in tma'n: At Dios quk'il.

²⁴Tej tel watl tuj twitz José, xi tniman aju tyol t-anjel Qman tzaj q'ma'n te, tk'amtzun t-xu'jil.

²⁵Ex mya junx e kub' tan, maxitzun kub' kymojb'an kyib' tej tul itz'j tnejel tal Mariy; ex ok tq'o'n José tb'i k'wa'l JESÚS.