Read kumam Mateo 10 Bible Online

Mateo 10 - kumam bible

Mateo 10

¹E tzajtzun ttxko'n Jesús qe kab'laj t-xnaq'tzb'en, xi tq'o'n kyoklen tu'n kyetz qe ju'ẍ kyu'n tuj kyanmi xjal, ex tu'n kyb'anix kykyaqil yab', noq alkyechaqx kyyab'il, ex tu'n tel tkyaqil k'ixk'oj.

²Atzun kyb'i qe kab'laj apostol jlu: Tnejel Simón aju Pedro tb'i, tuk'ix Andrés aju titz'in Pedro; tuk'ix Jacobo aju tky'ajal Zebedeo, tuk'ix Juan aju titz'in Jacobo;

³tuk'ix Felipe, tuk'ix Bartolomé, tuk'ix Tomás, tuk'ix Mateo aju peyil pwaq, tuk'ix Jacobo aju tky'ajal Alfeo, tuk'ix Tadeo,

⁴tuk'ix Simón aju toktoq te tajlal kyxol jun partid xjal Cananista kyb'i, tuk'ix Judas Iscariote aju xi q'onte Jesús tuj kyq'ab' xjal.

⁵E je'xtzun t-sama'n Jesús qe kab'laj apostol, xi tma'n kye alkye tu'n kyb'inchante: —Mi'n che'xe kyxol txqantl xjal mya judiy qe ex mi'n che okxe tuj kytanmi aj Samaria;

⁶o'kx che xe'le kyuk'il qe ẍne'l tzpetni qe, aqeju tiyjil Israel.

⁷Oktzun kyxi'ye, kypakb'anxe ex kymanxe kye xjal kyja': Aju kawb'il in tzaj tuj kya'j ma tzul laq'e', che chikuye.

⁸Che b'anix qe xjal kyu'ne aqeju at tx'a'k kyi'j minti' q'anb'il ti'j, ex che b'anix qe txqantl yab' kyu'ne; ex che jaw anq'in qe kyimni kyu'ne; ex kylajo'mitze qe ju'ẍ tuj kyanmi xjal. Noq kukx ma kyk'ame kyoklene lu, ax ikx aju ma txi nma'ne kyeye, noq kukx kyb'inchame.

⁹Mi'n txi kyi'ne q'an pwaq tuj kybolse, mi saq pwaq ex mi pwaq q'an k'uxb'il.

¹⁰Ex mi'n txi kyi'ne pa tuj kyb'eye, ex mi'n txi kyi'ne kab'e kykamiẍe, ex mi'n txi kyi'ne kyxajb'iye, ex mi'n txi kyi'ne kyky'aqo'che; porke aju aq'nal il ti'j tu'n t-xi q'ot twa.

¹¹Ex ok kyokxe tuj jun tnam ex qa tuj jun aldey, kyqaninxe qa at jun xjal b'a'n tmod; axtzun che posadiyile tuk'il ex maxitzun che ik'ele tuj tja xjal lu ok kyik'e tuj tnam.

¹²Oktzun kyokxe tuj tja xjal lu, nej kyq'onxe jun q'olb'eb'l: Che tenwt xjal tuj tzalajb'il tuj ja lu, che chikuye.

¹³Qatzun b'a'n ma che k'mete kyu'n, che teltzun qe xjal lu tuj tzalajb'il ik tza'n otoq txi kyma'ne. Qatzun mya b'a'n ma che k'mete kyu'n, tu'n jlu mlay che ten xjal tuj tzalajb'il.

¹⁴Ex qa at jun xjal minti' ma che k'mete tu'n, ex qa minti' xi tb'i'n kyyole, kyetze tuj tja xjal ex qa tuj ttanmi, ex kychto'mile puj ti'j kyqane.[1]

¹⁵Ax tok kxel nma'ne kyeye, mas nim tcastiw tnam lu kb'el, twitz tcastiw tnam Sodoma tuk'ix tnam Gomorra, tuj tq'ijlalil ok tul jwisi.

¹⁶Che xel nsama'ne ex ik che okele ik tza'n qe ẍne'l kyxol xo'j; kyja'tzun tenx kynab'le ik tza'n lob'aj, ex yalnix ti'j kynab'le ik tza'n paloma.

¹⁷Ten kykwente kyi'je, ok che xel q'i'ne kywitz aj sanjelal kyu'n xjal, ex che b'ajel asyaline kyu'n kyuj ja te k'ulb'il.

¹⁸Ax ikx che xel q'i'ne kywitz qe gobernador ex kywitz qe rey tu'n nlaje; kyja'tzun che okele te testiw wi'je kywitz, ex kywitz xjal mya judiy qe.

¹⁹Ex ok kypon q'i'ne kywitz, mi'n b'aj kyk'u'je ti'j alkye yol tu'n t-xi kyma'ne ex tza'n tten kyu'ne, porke jurat naj ktzajel tq'o'n Dios yol kyeye alkye tu'n t-xi kyma'ne.

²⁰Porke mya aqeye che yolil, noq o'kx aju T-xew Dios aju Kymane, atzunte ktzajel q'onte yol alkye tu'n t-xi kyma'ne.

²¹Kxel tq'o'n xjal terman tu'n tkyim, ex kxel tq'o'n mamb'aj tk'wa'l tu'n tkyim; ex qe k'wa'lb'aj che q'ojlel kyi'j kyman, ex che xel kyq'o'n tu'n kykyim.

²²Ex che elel ik'une kyu'n kykyaqil xjal tu'n tlaj okslal qeye wi'je; ex alkye kukx ma tzik'x tu'n ex minti' ma kub' numj, atzunju ok kletel.

²³Qa ma che yajlanjtze tuj jun tnam, kyxi oqe tuj juntl tnam; ex ax tok kxel nma'ne kyeye na'nxtoq tb'aj kyb'etine kykyaqil tnam kye aj Israel ok wule, aqine sk'o'maj qine tu'n Dios tu'n ntene kyuk'il xjal.

²⁴Aju xnaq'tzb'en mya mas toklen twitz ju xnaq'tzal te, ex aju majen mya mas toklen twitz tpatrón.

²⁵Aju yajb'il k'ik'ex tu'n xnaq'tzal, axju k'ik'ex tu'n xnaq'tzb'en, ex aju yajb'il k'ik'ex tu'n patrón, axju k'ik'ex tu'n majen. Qa ma tz'ok yaso'n tajaw ja, ex qa ma tz'ok q'o'n tb'i Beelzebú, ¿yajtzun qeju ate' tuj tja, myapelo ikx tu'n kyok yaso'n?

²⁶Kyja'tzun mi'n che xob'e kywitz xjal; porke tkyaqilju ewan, k'elel tuj q'ancha'l, ex tkyaqilju at tuj ewaj, ok kyb'i' xjal.

²⁷Aju ma txi nma'ne kyeye tuj qlolj, kymanxe tuj tqan q'ij; ex aju ma txi njask'u'ne kyeye, kyjaxe twi ja tu'n t-xi kyma'ne, tu'ntzun kyb'inte kykyaqil xjal.

²⁸Ex mi'n che xob'e kywitz qeju in kub' kyb'yo'n t-ximlal xjal, atzun tanmi xjal mlay b'ant tu'n tb'yet kyu'n; atzun che xob'e twitzju at tipumal tu'n tnaj tanmi xjal tu'n tuj infierni, tuk'ix t-ximlal.

²⁹¿Minti'pe in che k'ayinjtz kab'e tal chyu'j tu'n jun sentav? Maske ikju, pero minti' jun tal chyu'j in kub' tz'aq twitz tx'otx' minti'wt b'i'n tu'n Kymane.

³⁰Ax ikx kyeye, tkyaqil ttzmal kywi'ye ajla'maj.

³¹Kyja'tzun mi'n che xob'e, ex mas ma' kyxilene kywitz nimku tal chyu'j.

³²Aju xjal minti' in kub' tewan, ex qa in xi tma'n kye xjal qa ax tok okslal wi'je, ax ikx weye mlay kub' wewane, kxel nma'ne te Nmane aju at tuj kya'j qa ax tok okslal wi'je.

³³Ex qa at jun xjal in kub' tewan kywitz xjal qa minti' ojtzqi'n qine tu'n, ax ikx weye kb'el wewane twitz Nmane aju at tuj kya'j qa minti' ojtzqi'n xjal lu wu'ne.

³⁴Mi'n kub' kyximane qa ma chin ule tu'n kyten xjal tuj tzalajb'il; minti' ma chin ule tu'n kyten xjal tuj tzalajb'il, noq o'kx ma chin ule q'ol q'oj kyxol xjal.

³⁵Porke ma chin ule q'ol pab'l tib' kyxol xjal, tu'n tel tpa'n tib' q'a ti'j tman, ex tu'n tel tpa'n tib' txin ti'j ttxu', ex tu'n tel tpa'n tib' txin alib'aj ti'j tlib';

³⁶kyja'tzun qe aj q'oj ti'j xjal, ax qeju ate' tuj tja.

³⁷Qa at jun xjal mas in tk'ujla'n tman ex qa ttxu', atzun weye minti' in chin tk'ujla'n, mya b'a'n tu'n tajb'en te weye; ex qa at jun xjal mas in tk'ujla'n tky'ajal ex qa tme'jel, atzun weye minti' in chin tk'ujla'n, mya b'a'n tu'n tajb'en te weye.

³⁸Ex alkye minti' in xi ti'n tcrus tu'n tok lpe' wi'je, mya b'a'n tu'n tajb'en te weye.

³⁹Alkye jun xjal o'kx tok tk'u'j ti'j tu'n tten tchwinqlal twitz tx'otx', mlay tkamb'a' aju chwinqlal in tzaj tq'o'n Dios; ex alkye jun xjal tq'on tib' tu'n tnaj tchwinqlal twitz tx'otx' noq tu'n nlaje, ok tkamb'a' aju chwinqlal in tzaj tq'o'n Dios.

⁴⁰Aju xjal in che k'monjtze tu'n, aqine in chin tk'mo'n; ex alkye in chin k'monjtze tu'n, in k'monjtz Dios tu'n, aju tzaj samante weye.

⁴¹Alkye ma k'monte jun t-sanjel Dios tu'nju sama'n xjal lu tu'n Dios, ktzajel q'o'n jun oyaj te ik tza'n oyaj in tzaj q'o'n te t-sanjel Dios; ex alkye ma k'monte jun xjal tz'aqlxix tu'nju tz'aqlxix te xjal, ktzajel q'o'n jun oyaj te ik tza'n oyaj in tzaj q'o'n te jun xjal tz'aqlxix.

⁴²Ex alkye jun xjal in tzaj q'onte jun vas che'w a' te jun okslal ch'in toklen tu'nju ma tz'ok te nxnaq'tzb'ene, ax tok kxel nma'ne kyeye, il ti'j kxel q'ot jun oyaj te.