Read kumam Mateo 11 Bible Online

Mateo 11 - kumam bible

Mateo 11

¹Tejtzun tb'aj tma'n Jesús xnaq'tzb'il kye kab'laj t-xnaq'tzb'en, ik'tzun tuj lugar lu, xi' q'ol xnaq'tzb'il ex pakb'al kye xjal kyuj txqantl tnam kye aj Galilea.

²Tokx Juan tuj pres ex tej tb'inte aju in tb'incha'n Crist, e tzaj t-sama'n kab'e t-xnaq'tzb'en tuk'il

³tu'n t-xi kyqanin te kyja': —¿Apeya ju Crist aju at tulel, ex qa qo ayole ti'j juntl? Che chi.

⁴Xi ttzaq'we'n Jesús: —Kyxi'ye ex kymanxe te Juan aju ma kyb'iye ex ma kyile.

⁵Qe moẍ in b'ant kyke'yin, qe kox in b'ant kyb'et, qe xjal at tx'a'k kyi'j minti' q'anb'il ti'j in che b'anix, qe chkyin kywi' in b'ant kyb'in, qe kyimni in che jatz anq'in, ex in pakb'anjtz tqanil jun kolb'il kye meb'a.

⁶Ex at tzalajb'il teju xjal minti' in jawje' tk'u'j wi'je, chi Jesús kye t-xnaq'tzb'en Juan.

⁷Tej kyaj meltz'aj qe t-xnaq'tzb'en Juan, ok ten Jesús yolil kye xjal ti'j Juan: —¿Titzun xi kyla'kje tuj lugar minti' kynajb'il xjal tuj? ¿Ikpe tten xjal o kyile ik tza'n jun ajlaj in yukch tu'n kyq'iq'? Mi'n.

⁸¿Titzun xi kyla'kje? ¿Tb'anilpe t-xb'alun xjal xi kyla'kje? Mi'n. Porke b'a'n kyu'ne, qe xjal tok kyxb'alun tb'anilxix, atzun ate' tuj kyja rey.

⁹Pero ¿titzun xi kyla'kje? ¿Jun t-sanjel Diospe xi kyla'kje? Kxel nma'ne kyeye, ax tok jun t-sanjel Dios xi kyla'kje, ex mas ma' t-xilen twitz jun t-sanjel Dios.

¹⁰Tu'nju at jun yol tz'ib'an tuj Tu'jil in yolin ti'j Juan, chi kyja': Lu kxel nsama'ne nsanjele tu'n tkub' nej twitza b'inchalte tb'eya, chi tuj Tu'jil.

¹¹Ax tok kxel nma'ne kyeye: Kyxol kykyaqil xjal minti' jun mas ma' toklen ik tza'n te Juan aju in che b'yan xjal tu'n; ex aju mas tal ch'in tuj kawb'il in tzaj tuj kya'j, mas ma' toklen twitz Juan.

¹²Atxix tuj tq'ijlalil tej tten Juan aju in che b'yan xjal tu'n, in kyipuman kyib' xjal tu'n kyokx tuj tkawb'il Dios, ex kukx tb'aj ja'lo, ex qeju in kyipuman kyib' in che okx naj tuj.

¹³Ex kykyaqil qe t-sanjel Dios tuk'ix tley Moisés, o'kxtzun web'a kyyol tej tul Juan.

¹⁴Qa kyajb'ile tu'n t-xi kyoksla'ne, ate Juan Elías aju o q'manjtz ti'j qa attoq tulel.

¹⁵Alkye at t-ẍkyin, b'inx ju yol lu.

¹⁶At jun techal kxel nma'ne tza'n tten kymod xjal ate' tuj tq'ijlalil ja'lo. Ik kyten xjal ik tza'n qe k'wa'l q'uql qe tuj plas in che schan ex in che sch'in in kyma'n kye kyuk'il:

¹⁷Nno'k qq'ajtza'ne xux kywitze, ex minti' ma che b'ixane; in qo b'itzane jun b'itz b'isb'ajil kywitze, ex minti' ma che ok tene oq'el, che chi k'wa'l.

¹⁸Ex ul Juan minti' o wa'n ex minti' o k'an ti'j nintz wa'n nno'k kyu'ne, ex in kyma'ne: At ju'ẍ tuj tanmi.

¹⁹Atzun weye ma chin ule, aqine sk'o'maj qine tu'n Dios tu'n ntene kyuk'il xjal, in chin wa'ne ex in chin k'ane, ex in kyma'ne: Lu jun xjal kye wa'n ex kye k'an vin, mer tamiw tib' kyuk'il qe peyil pwaq ex kyuk'il qe aj il, che chiye. Ex k'elel qnik' ti'j jun xjal qa at tnab'l, tu'n tb'inchb'en.

²⁰Oktzun ten Jesús qawil kyi'j tnam jatum otoq tb'incha nimku b'inchb'en nim kyipumal, porke minti' ajtz ti'j kyanmi ex xi tma'n kye:

²¹—Ay b'ek'b'il kywitze aj Corazín. Ay b'ek'b'il kywitze aj Betsaida. Porke noqwit tuj tnam Tiro ex tuj tnam Sidón o che b'inchanjtz qe b'inchb'en nim kyipumal ik tza'n ma nb'inchaye kyxole, b'i'xwitlo ajtz ti'j kyanmi ojtxi, owtlo tz'ok kyq'o'n kyxb'alun ch'i'x twitz, ex owtlo che kub' qe' tuj tza'j.

²²Kyja'tzun kxel nma'ne kyeye, tuj tq'ijlalil jwisi mas nim kyeye kycastiw kb'el ik tza'n te tnam Tiro ex tnam Sidón.

²³Ex aya tnam Capernaum, ¿maj kjapunela tuj kya'j? Mlay, max kb'el ponela tuj kynajb'il kyimni. Ex noqwit tuj tnam Sodoma o che b'inchanjtz qe b'inchb'en nim kyipumal ik tza'n ma nb'inchaye kyxole, atxwitlo tnam ja'lo.

²⁴Kyja'tzun kxel nma'ne kyeye, tuj tq'ijlalil jwisi, mas nim kyeye kycastiw kb'el ik tza'n te tnam Sodoma.

²⁵Tuj tq'ijlalil lu ok ten Jesús yolil ex tma: —Kxel nq'o'ne chjonte teya, Tat, aya Tajaw kya'j ex Tajaw tx'otx', porke ma kub' tewana tkyaqil jlu kywitz aj nab'l ex kywitz qeju nne'lxix kynik' ti'j, ex ma tzaj tyek'una kye tal k'wa'l.

²⁶Ma tb'inchaya ikju Tat, porke b'a'n ela tuj twitza.

²⁷Ax ikx tma Jesús: Tkyaqil ma tzaj q'o'n weye tu'n Nmane; ex mi jun ojtzqilte alkye qine, o'kxte Nmane ojtzqilte, porke aqine Tk'wa'l; ex mi jun ojtzqilte Nmane, o'kx aqine ojtzqilte, porke aqine Tk'wa'l, ex alkye jun xjal waje tu'n t-xi nyek'une Nmane te k'eleltzun tnik' xjal ti'j Nmane.

²⁸Kytzaje wuk'ile kykyaqile aqeye ma che sikte tu'n aq'untl ex ma che sikte tjaq' iqtz, oktzun che ojlale wu'ne.

²⁹Kyiqanxe nyuwiye, ex kyxnaq'tzam kyib'e wi'je, porke mans qine ex mans wanmiye; oktzun knetel jun ojlab'l kyu'ne te kyanmiye.

³⁰Porke aju nyuwiye mya yajkux tiqanjtz, ex sasj wiqatze kxel kyiqane.