Read kumam Mateo 13 Bible Online

Mateo 13 - kumam bible

Mateo 13

¹Tujx q'ij lu etz Jesús tuja ex kub' qe' ttzi laguna.

²Ex pon kychmon kyib' nim xjal tuk'il; jaxtzun Jesús tuj barc ex kub' qe', atzun kykyaqil xjal ate' ttzi a'.

³Ex xi tma'n Jesús nimku yol kye xjal tuj techal ex tma: —At jun xjal xi' awal triw.

⁴Ex tej t-xi tchitun iyaj, kub' tz'aq ch'in iyaj tuj b'e; e ul qe chyu'j ex jaw kywa'n.

⁵Ch'intl iyaj kub' tz'aq kyxol ab'j jatum mya nim tpimil tx'otx', ex jurat naj tzaj poq'l, porke mya nim tpimil tx'otx',

⁶ex tej tmeq't q'ij o tz'e'y, ex b'i'x tzqij tu'nju mya nim tlok'.

⁷Ch'intl iyaj kub' tz'aq kyxol ch'i'x k'ul; tejtzun tch'iy ch'i'x k'ul, o xk'ost triw tu'n.

⁸Ex ch'intl iyaj kub' tz'aq tuj tb'anil tx'otx', ex ok twitz, at ok jun syent twitz, ex at ok 60 twitz, ex at ok 30 twitz ti'j jun tqan.

⁹Alkye at t-ẍkyin, b'inx ju yol lu, chi Jesús kye.

¹⁰E ultzun laq'e' qe t-xnaq'tzb'en Jesús ttxlaj, ex xi kyqanin te: —¿Tiqu'n in yolina kyuk'il xjal tuj techal?

¹¹Xi ttzaq'we'n Jesús: —Te kyeye ma tzaj tq'o'n Dios tu'n tel kynik'e ti'j ju yol ewantoq nej ti'j kawb'il in tzaj tuj kya'j; atzun kye xjal mya q'o'n tu'n tel kynik' ti'j.

¹²Porke aju xjal at ch'in te, kxel q'o'n txqantl te tu'ntzun tten mas nim te; ex aju xjal minti' te, aju ch'in at te k'elel q'i'n.

¹³Kyja'tzun in chin yoline kye tuj techal; porke nno'k kyke'yin ex minti' in kyil; in che b'in ti'j ex minti' in kyb'i'n ex minti' nne'l kynik' ti'j.

¹⁴Kyja'tzun tten ma japun kyi'j aju yol kyaj tma'n Isaías aju t-sanjel Dios. Chi Isaías: Kukx in kyb'i'ne, ex minti' nne'l kynik'e ti'j; ex kukx nno'k kyke'yine, ex minti' in kyile.

¹⁵Porke aju kyanmi xjal lu ma kyuwix, minti' in xi kyb'i'n tu'n kyẍkyin ex ma kub' kymaltz'u'n kywitz; tu'ntzun mi'n kylonte tu'n kywitz, ex tu'n mi'n kyb'inte tu'n kyẍkyin, ex tu'n mi'n tel kynik' ti'j tuj kyanmi, ex tu'n mi'n kyajtz meltz'aj tu'n kyb'anix wu'ne, chi Isaías.

¹⁶Atzun kyeye at tzalajb'il kyeye, porke in kyile tu'n kywitze, ex in kyb'i'ne tu'n kyẍkyine.

¹⁷Ex ax tok kxel nma'ne kyeye, nimku t-sanjel Dios kyuk'ix qe xjal tz'aqlxix o kyajb'e tu'n kylonte aju in kyile, ex minti' o kyil; ex o kyajb'e tu'n kyb'inte aju in kyb'i'ne, ex minti' o kyb'i.

¹⁸Kyb'intztzune ti in tma'n ju techal ti'j xjal xi' awal.

¹⁹Jun xjal in tb'i'n aju yol ti'j tkawb'il Dios ex minti' nne'l tnik' ti'j, nnu'ltzun tajaw il, in jatz ti'n ju yol otoq ku'x awa'n tuj tanmi xjal. Aju xjal lu ik tten ik tza'n b'e jatum kub' tz'aq iyaj.

²⁰Ex aju xjal in xi tb'i'n ju yol, ex jurat naj in xi toksla'n tuk'il tzalajb'il, aju xjal lu ik tten tza'n qe ab'j jatum kub' tz'aq iyaj;

²¹ex tu'nju minti' tlok' iyaj, noq kab'e q'ij in kyaj ten. Ikxtzun tten xjal ju. Ok in tzaj jun yajb'il te ex ok tel ik'un kyu'n xjal tu'n tlaj tyol Dios, jurat in kub' tz'aq.

²²Ex juntl xjal ik tten ik tza'n ju tx'otx' at ch'i'x k'ul tuj, in xi tb'i'n tyol Dios, ex in b'aj tk'u'j ti'j nimku tuj tq'ijlalil ja'lo ex in sb'unjtz tu'n q'inumab'l; kyja'tzun nne'l tipun tyol Dios tuj tanmi xjal ex minti' in witzan.

²³Atzun juntl xjal ik tten ik tza'n tb'anil tx'otx' jatum kub' tz'aq iyaj, in xi tb'i'n ju yol ex nne'l tnik' ti'j, ex nno'k twitz iyaj tuj. At junjun nno'k jun syent twitz, ex at junjun nno'k 60 twitz, ex at junjun nno'k 30 twitz ti'j jun tqan, chi Jesús.

²⁴Xi tma'n Jesús juntl techal kye, chi kyja': —Aju kawb'il in tzaj tuj kya'j ik tten ik tza'n jun xjal ku'x tawa'n tb'anil iyaj tuj tkojb'il.

²⁵Ex te qonik'an in che tantoq xjal, ul jun xjal at tq'oj ti'j, ku'x tawa'n tiyjil ch'im k'ul t-xol triw, ex ajtzun.

²⁶Tej tjawil poq'l triw ex tej tok twitz, ax ikx te ch'im k'ul tzaj poq'l.

²⁷E ultzun qe tmajen xjal, xi kyma'n te: Tat, ¿myapetzun tb'anil iyaj ku'x tawa'na tuj tkojb'ila? ¿Tza'ntzun tten ma tzaj poq'l ch'im k'ul t-xol triw? Che chi.

²⁸Xi tma'n ju tajaw awal kye: Tu'n jun xjal at tq'oj wi'je ma tb'incha jlu. Xitzun kyma'n qe majen te: ¿Tajpeya tu'n qxi'ye ex tu'n tjaw qb'aqo'ne ch'im k'ul?

²⁹Mi'n, chi te xjal xi tma'n kye, ex ok tjatz kyb'aqo'ne ch'im k'ul, mya yajku tuk'ix triw kjawitz kyb'aqo'ne.

³⁰E tten, junx e ttzaj ch'iy tuk'il triw, maxi kjawil b'aqet ok tjaw triw. Oktzun tpon tq'ijlalil tu'n tjaw triw, maxitzun kxel nma'ne kye majen: Nej kychmo'nktze ch'im k'ul, ex kyk'alome junjun che'l tten tu'n tokx tuj q'aq'; atzunte triw kychmo'nktze tu'n tokx tuj ntx'utx'e, chi tajaw awal.

³¹Xi tma'n Jesús juntl techal kye. Chi kyja': —Aju kawb'il in tzaj tuj kya'j ik tten ik tza'n jun twitz mostaza tzaj ti'n jun xjal ex ku'x tawa'n tuj tkojb'il.

³²Aju twitz mostaza mas tal ch'inxix twitz tkyaqil iyaj; oktzun tch'iy, mas in ch'iy twa'l kywitz txqantl tal awal tuj pe'n, ex nno'k ik tza'n jun tze', kyja'tzun in che ul qe chyu'j ex in b'ant kyq'u' t-xol tq'ab'.

³³At juntl techal xi tma'n Jesús kye. Chi kyja': —Aju kawb'il in tzaj tuj kya'j ik tten ik tza'n ch'in t-samel pan tzaj ti'n jun xu'j tu'n tjaw mal tk'u'j pan, xi t-smo'n tuj ox malb'il arin, ex jawtzun mal tkyaqil tq'otjil pan tu'n.

³⁴Tkyaqil jlu xi tma'n Jesús kye xjal tuj techal, ex minti' o yolin kyuk'il myawt tuj techal,

³⁵tu'ntzun tjapun aju o q'manjtz tu'n t-sanjel Dios, chi kyja': Ok chin yolile tuj techal; kxel nchik'b'a'ne aju ewan atxix tb'antlen twitz tx'otx', chi t-sanjel Dios.

³⁶B'ajtzun tq'olb'en tib' Jesús kyuk'il xjal, okx tuja, e pontzun laq'e' qe t-xnaq'tzb'en ttxlaj ex xi kyma'n te: —Chik'b'antza qeye aju techal ti'j ch'im k'ul tuj kojb'il, che chi.

³⁷Xi ttzaq'we'n Jesús: —Aju in ku'x awante tb'anil iyaj, atzun qine sk'o'maj qine tu'n Dios tu'n ntene kyuk'il xjal.

³⁸Aju kojb'il, atzun tkyaqil twitz tx'otx'. Aju tb'anil iyaj, atzun qeju at kyoklen tuj tkawb'il Dios, atzunju ch'im k'ul, atzun qeju tk'wa'l tajaw il.

³⁹Aju aj q'oj ku'x awante ch'im k'ul, atzun tajaw il. Aju tu'n tjaw chmet twitz triw, atzun in yolin ti'j mankb'il tq'ijlalil, ex qe majen in jaw kychmo'n twitz triw, atzun qe anjel.

⁴⁰Kyja'tzun, ik tza'n in jaw b'aqet ch'im k'ul ex nno'kx q'ot tuj q'aq', ikxtzun kb'ajel tuj mankb'il tq'ijlalil.

⁴¹Aqine sk'o'maj qine tu'n Dios tu'n ntene kyuk'il xjal, che tzajel nsama'ne qe n-anjele, ex k'elex kyi'n tuj nkawb'ile kykyaqil qeju in che kub' tz'aq xjal tuj il kyu'n, kyuk'ix qeju in kyb'incha'n mya b'a'n.

⁴²Ex che okex q'o'n tuj jorni in k'ant tu'n q'aq'; atzun ktzajel oq'el ex kqitx'itx'il t-xe kye' xjal.

⁴³Atzun qe tz'aqlxix che qoptz'ajel ik tza'n tqan q'ij tuj tkawb'il Kyman. Alkye at t-ẍkyin, b'inx ju yol lu.

⁴⁴Aju kawb'il in tzaj tuj kya'j ik tten ik tza'n jun q'inumab'l ewan tuj jun kojb'il o knet tu'n jun xjal ex ku'x tewan juntl maj, ex o tzalajxix ti'j; xi'tzun ex xi tk'ayin tkyaqilju at te, ex laq'et ju kojb'il tu'n, jatum ewan ju q'inumab'l.

⁴⁵Ax ikx aju kawb'il in tzaj tuj kya'j ik tten ik tza'n jun comersyant in jyon ti'j tb'anil perla;

⁴⁶tejtzun tknet jun perla wi'yilxix tu'n, xi'tzun ex xi tk'ayin tkyaqilju at te, ex laq'et ju perla tu'n.

⁴⁷Ax ikx aju kawb'il in tzaj tuj kya'j ik tten ik tza'n jun xyub' te tzuyb'il kyiẍ; ok in ku'x q'ot tuj mar in che tzyet kykyaqil txkaj kyiẍ tu'n.

⁴⁸Oktzun tnoj xyub', in jatz q'i'n kyu'n xjal ttzi a'; in che kub' qe' xjal ti'j, in jatz kysk'o'n qeju b'a'n ex in ku'x kyq'o'n tuj chi'l, atzunju mya b'a'n nne'x kyxo'n.

⁴⁹Iktzun kb'ajel tuj mankb'il tq'ijlalil; che tzajel qe anjel ex k'elel kypa'n qeju mya b'a'n kyxol qeju tz'aqlxix,

⁵⁰ex che okex q'o'n qe mya b'a'n tuj jorni in k'ant tu'n q'aq'; atzun ktzajel oq'el ex kqitx'itx'il t-xe kye' xjal, chi Jesús kye.

⁵¹Xitzun tqanin Jesús kye t-xnaq'tzb'en: —¿Mape tz'el kynik'e ti'j tkyaqil jlu? Xi kytzaq'we'n t-xnaq'tzb'en: —Ma tz'el qnik'e ti'j, Tat.

⁵²Xitzun tma'n Jesús kye: —Kyja'tzun tten jun xnaq'tzal ti'j ley qa ma tz'ok te xnaq'tzb'en ti'j kawb'il in tzaj tuj kya'j, ik tten ik tza'n jun tajaw ja in jaw t-sk'o'n ti'xti ak'aj ex qa te ojtxi jatum chmo'n tq'inumab'l.

⁵³Tejtzun tb'aj tma'n Jesús qe techal lu, ik'tzun tuj lugar lu,

⁵⁴ex pon tuj ttanmi, xi tq'o'n xnaq'tzb'il kye xjal tuj ja te kyk'ulb'il; kyja'tzun e lab'in xjal ti'j, ex in kyma'n: —¿Jatum in tzaj tnab'l xjal lu? ¿Ex tza'n tten in che b'ant qe b'inchb'en nim kyipumal tu'n?

⁵⁵¿Myapetzun tky'ajal calpinter jlu? ¿Myapetzun Mariy tb'i ttxu'? ¿Ex myapetzun Jacobo tb'i jun titz'in, ex juntl José tb'i, ex juntl Simón tb'i, ex juntl Judas tb'i?

⁵⁶¿Ex myapetzun kykyaqil tanb' ate' quk'il? ¿Tza'ntzun tten in b'ant tkyaqil jlu tu'n? Che chi xjal.

⁵⁷Kyja'tzun mya b'a'n ela tyol Jesús tuj kywitz. Ex xi tma'n Jesús kye: —Qe t-sanjel Dios at nimb'il kye tuj tkyaqil lugar. O'kx tuj kytanmi ex tuj kyja minti' nimb'il kye.

⁵⁸Kyja'tzun mya nim b'inchb'en nim tipumal b'ant tu'n Jesús tuj ttanmi, tu'n tlaj minti' xi kyoksla'n xjal.