Read kumam Mateo 14 Bible Online

Mateo 14 - kumam bible

Mateo 14

¹Tuj tq'ijlalil lu el tqanil ti'j Jesús, o tb'i Herodes aju gobernador.

²Xitzun tma'n Herodes kye qeju in che ajb'en te: —Ate Juan jlu aju e b'yan xjal tu'n; ma jaw anq'in kyxol kyimni, kyja'tzun at tipumal tu'n tb'ant tkyaqil jlu tu'n, chi Herodes.

³Porke o tzyet Juan tu'n Herodes, ex ok tk'alo'n tu'n caden, ex okx tq'o'n tuj pres tu'n tlaj Herodías; ate Herodías t-xu'jil Felipe nej, aju titz'in Herodes.

⁴Ex xi tma'n Juan te Herodes: —Mya q'o'n tu'n ley tu'n tten Herodías te t-xu'jila.

⁵O tajb'e Herodes tu'n tkub' tb'yo'n, pero tzaj t-xob'il kywitz xjal; porke kykyaqil xjal in kyma'n ate Juan t-sanjel Dios.

⁶Ex tej tkub' ik'sa'n tq'ijlalil titz'jlen Herodes, ok ten tal Herodías b'ixal kywitz xjal, ex tzaj jun ttzalajb'il Herodes ti'j.

⁷Kyja'tzun xi ttziyan Herodes te txin: Noq alkyex ktzajel tqanina weye jaku txi nq'o'ne teya, chi Herodes; xi tma'n tzqan Dios ti'j qa tu'n t-xi tq'o'n.

⁸Atzunte txin, nej xi aj qanilte te ttxu', xitzun tma'n te Herodes: —Q'ontza twi' Juan weye, aju e b'yan xjal tu'n, q'ontza tuj jun plat, chi txin.

⁹Atzunte rey Herodes tzaj tb'is; ex tu'n tlaj tzqan Dios otoq txi tma'n ex tu'n kylaj qeju ate'toq tuk'il ti'j mes, kyja'tzun xi tma'n tu'n t-xi q'o'n twi' Juan te txin.

¹⁰Xi tq'o'n orden tu'n tel tamtz'u'n twi' Juan tuj pres.

¹¹Tzajtzun q'i'n twi' tuj jun plat, ex xi q'o'n te txin; atzunte txin pon ti'n twitz ttxu'.

¹²E pontzun qe t-xnaq'tzb'en Juan, etz kyi'n t-ximlal ex ku'x kymaqu'n; e je'xtzun ex xi kyq'o'n tqanil te Jesús.

¹³Tej tb'inte Jesús jlu, ik' tuj lugar lu, xi' tuj jun barc tu'n tpon tuj jun lugar minti' kynajb'il xjal tuj. Tejtzun kyb'inte xjal, e je'tz tuj junjun tnam ex e je'x tu'n kyqan tu'n kypon jatum attoq tponil Jesús.

¹⁴Tejtzun tetz Jesús tuj barc o til nim xjal otoq che pon, tzaj q'aq'an tk'u'j kyi'j, ex e b'anix yab' tu'n, aqeju ate' kyxol xjal.

¹⁵Tej ch'ixtoq tex q'ij, e pon laq'e' qe t-xnaq'tzb'en Jesús ttxlaj ex xi kyma'n te: —Aju lugar lu minti' kynajb'il xjal tuj, ex ma qo qax; q'manxa kye xjal tu'n kyxi' kyuj aldey tu'n tlaq'et ch'in kywa, che chi.

¹⁶Xi tma'n Jesús kye: —Mya il ti'j tu'n kyxi' xjal laq'ol kywa; kyq'onxe ch'in kywa.

¹⁷Atzun kye xnaq'tzb'en xi kyma'n: —Minti' at quk'ile, noq o'kx jwe' pan at ex kab'e kyiẍ.

¹⁸Xi tma'n Jesús kye: —Kyi'ntze tzalu.

¹⁹Xitzun tma'n kye xjal tu'n kykub' qe' tib'aj ch'im. Ex e tzaj ttzyu'n jwe' wab'j kyuk'ix kab'e kyiẍ, jaw tke'yin twitz kya'j ex xi tq'o'n chjonte te Dios ti'j, ex e kub' tpiẍk'u'n qe wab'j, xi tq'o'n kye t-xnaq'tzb'en, atzun kye t-xnaq'tzb'en xi kysipan kye xjal.

²⁰Kykyaqil xjal e wa'n ex e noj; ex jaw kychmo'n kab'laj chi'l ttx'aqan wab'j kyaj ten.

²¹Aju kyajlal xjal e wa'n, b'alo jwe' mil xinaq, mya kyuk'ix qe xu'j ex mya kyuk'ix qe k'wa'l e ok te tajlal.

²²Tejtzun tb'aj jlu, xi tma'n Jesús kye t-xnaq'tzb'en tu'n kyokx tuj barc ex tu'n kyxi' nej twitz tu'n kypon jlajxi laguna, atzunte Jesús kyaj ten q'malte kye xjal tu'n kyaj kyja.

²³Tejtzun kyaj b'aj xjal, jax Jesús twi witz na'l Dios tjunalx. Tejtzun qok yupj, tjunalx Jesús attoq.

²⁴Atzunte barc otoq mijin tib'aj a', ex in pon tilj a' ti'j, porke maqet barc tu'n kyq'iq'.

²⁵Ch'ixtoq ttzaj t-xe kya'j pon Jesús kyuk'il in b'ettoq tib'aj a'.

²⁶Tejtzun kylonte t-xnaq'tzb'en in b'ettoq Jesús tib'aj a', b'i'x naj kynab'l: —Qlab' te jlu, che chi. Ex e jaw sch'in tu'n kyxob'il.

²⁷Ex jurat naj xi yolin Jesús kyuk'il: —Qe' kyk'u'je; aqine, mi'n che xob'e, chi Jesús kye.

²⁸Tzajtzun ttzaq'we'n Pedro: —Tat, qa aya, q'mantza tu'n nxi'ye tuk'ila tib'aj a'.

²⁹Xitzun tma'n Jesús: —Tzaja. Ku'tztzun Pedro tuj barc, xi b'et tib'aj a' tu'n tpon tuk'il Jesús.

³⁰Ex tej tlonte Pedro nim kyq'iq', tzaj t-xob'il; kyja'toq t-xi mulq'aj tuj a', jaw sch'in ex tma: —Tat, chin tkloma.

³¹Jurat naj xi tnuqpi'n Jesús tq'ab', tzyettzun Pedro tu'n, ex xi tma'n te: —Aya xinaq ch'in tokslab'la, ¿tiqu'n xjawje' tk'u'ja? Chi Jesús te.

³²Tejtzun kyjax tuj barc, b'i'x we' kyq'iq'.

³³Atzun qeju ate'toq tuj barc e ul laq'e' twitz Jesús, ex e k'ulun twitz in kyma'n: —Ax tok aya Tk'wa'l Dios.

³⁴Tej kyik'x jlajxi a', e pon tuj tx'otx' Genesaret.

³⁵Tejtzun tel kynik' xjal ti'j Jesús, aqeju ax najl qe, ex tqanil kyu'n tuj tkyaqil lugar niqayin; kykyaqiltzun qe yab' e ul q'i'n tuk'il Jesús.

³⁶E kub'san xjal twitz Jesús ichaq noq ttxa'n t-xb'alun tz'ok kymako'n yab'; ex kykyaqil qeju ok kymako'n, e b'anix.