Read kumam Mateo 19 Bible Online

Mateo 19 - kumam bible

Mateo 19

¹Tejtzun tb'aj tma'n Jesús ju yol lu, etz tuj Galilea, xi' tuj tx'otx' Judea jlajxi nima Jordán.

²Ex nim xjal e ok lpe' ti'j, ex atzun e b'anix yab' tu'n.

³E pontzun laq'e' qe fariseo tuk'il Jesús tu'n tok tuj joyb'il ti'j kyu'n, ex xi kyma'n te: —¿Q'o'npelo tu'n ley tu'n tex tlajo'n xinaq t-xu'jil noq tu'n tlaj jun ti'xti? Che chi.

⁴Xi ttzaq'we'n Jesús: —¿B'ajxpe jaw kysch'i'ne tuj Tu'jil tej tb'ant xjal tu'n Dios t-xe tnejel, xinaq ex xu'j e kub' tb'incha'n?

⁵Ex tma Dios: Kyja'tzun kyjel tq'o'n xinaq tman tuk'ix ttxu', ex kmojeb'el tuk'il t-xu'jil, ex kykab'il che okel te junx.

⁶Kyja'tzun mya kab'e kyten, noq junx kyten; kyja'tzun, aju ok tmojb'a'n Dios, mi'n tz'el tpa'n xjal, chi Jesús kye.

⁷Xitzun kyma'n fariseo: —¿Tiqu'ntzun kyaj tma'n Moisés tu'n tex tlajo'n xjal t-xu'jil ex tu'n t-xi q'ot jun u'j te xu'j jatum in tma'n qa otoq kub' kypa'n kyib'? Che chi.

⁸Xi tma'n Jesús kye: —Tu'nju puro kyuw kyanmiye, kyja'tzun kyaj tma'n Moisés tu'n tex kylajo'ne kyxu'jile. Pero t-xe tnejel mya ik ttenju.

⁹Atzun weye kxel nma'ne kyeye, qa at jun xjal ma kub' tpa'n tib' tuk'il t-xu'jil ex qa minti' in tb'incha'n xu'j aj pajil, qatzun ma moje' xinaq tuk'il juntl xu'j, in tb'incha'n xinaq aj pajil; [ex qa ma moje' juntl xinaq tuk'il ju xu'j otoq tz'el lajo'n, in tb'incha'n xinaq aj pajil], chi Jesús kye.

¹⁰Xitzun kyma'n t-xnaq'tzb'en Jesús te: —Qa ik tten tchwinqlal xinaq tuk'il t-xu'jil, maslo b'a'n tu'n mi'n tknet t-xu'jil xjal, che chi.

¹¹Xitzun tma'n Jesús kye: —Mya kykyaqil xjal jaku txi kyniman ju yol lu, noq o'kx qeju ma tzaj tq'o'n Dios kyoklen tu'n tjapun kyu'n.

¹²Tu'nju at junjun xjal minti' tumel tu'n kymoje' porke kyitz'jlenx ikju; ex at junjun in che ok kyu'n xjal ikju tu'n mi'n kymoje'; ex at junjun in che ok ikju kyu'nx kyib', minti' in che moje' noq tu'n kyajb'en tuj tkawb'il Dios in tzaj tuj kya'j. Alkye jaku b'ant jlu tu'n, b'incham, chi Jesús kye.

¹³E tzajtzun q'i'n junjun tal k'wa'l twitz Jesús tu'n tkub' tq'o'n tq'ab' tib'aj kywi' ex tu'n tna'n Dios kyi'j; atzun kye t-xnaq'tzb'en e mayet qe xjal kyu'n, aqeju e tzaj q'inte kye tal k'wa'l.

¹⁴Ex xi tma'n Jesús kye t-xnaq'tzb'en: —Kyq'onxe amb'il kye tal k'wa'l tu'n kytzaj wuk'ile ex mi'n che'x kymayo'ne; porke aju kawb'il in tzaj tuj kya'j kyekye xjal ik kyten ik tza'n qe tal k'wa'l lu, chi Jesús.

¹⁵Kub'tzun tq'o'n tq'ab' tib'aj kywi', ex xi' tuj juntl lugar.

¹⁶Ultzun jun ku'xun tuk'il Jesús ex xi tma'n te: —Xnaq'tzal b'a'n, ¿alkye b'a'n tu'n nb'inchanteye tu'n nkamb'anteye chwinqlal te jumajx?

¹⁷Xi tma'n Jesús te: —¿Tiqu'n in chin ok tq'o'na te b'a'n? Mi a'l jun xjal b'a'n, o'kx te Dios b'a'n. Qa taja tu'n tten tchwinqlala te jumajx, che japunx qe mandamyent tu'na.

¹⁸Xitzun tma'n ku'xun: —¿Alkyetzun qe mandamyent? Xi tma'n Jesús te: —Atzun qe jlu: Mi'n che b'iyune; mi'n kyb'inchaye aj pajil; mi'n che elq'ane; mi'n che nik'ane yol ti'j juntl;

¹⁹kynimanxe kymane ex kytxuye; ex kyk'ujlame kyuk'ile ik tza'nx kyeye in kyk'ujlan kyib'e.

²⁰Xitzun tma'n ju ku'xun te Jesús: —Tkyaqil jlu o japun wu'ne tej matoq k'wa'lx qine. ¿Alkyetzun juntl atx taj tu'n tjapun wu'ne?

²¹Xitzun tma'n Jesús te: —Qa taja tu'n toka tz'aqlxix, txi'ya, k'ayinxa tkyaqilju at teya ex q'onxa kye meb'a, ex kteltzun tq'inumab'la tuj kya'j; tzaja, ex lpe'ka wi'je.

²²Tejtzun tb'inte ku'xun ju yol lu, ajtzun in b'isunxix, porke nimtoq tq'inumab'l at.

²³Xitzun tma'n Jesús kye t-xnaq'tzb'en: —Ax tok kxel nma'ne kyeye, kyuw tu'n tokx jun xjal q'inun tuj kawb'il in tzaj tuj kya'j.

²⁴Kxel nma'ne juntl maj kyeye, mas jurat jaku tz'ex jun chej camey tuj toy' jun b'aq, twitzju tu'n tokx jun q'inun tuj tkawb'il Dios.

²⁵Tej kyb'inte qe t-xnaq'tzb'en Jesús ju yol lu, b'i'x jaw naj kynab'l, ex kyma: —Qa ikju ¿alkyetzun jaku klet?

²⁶Xi tke'yin Jesús kywitz ex xi tma'n kye: —Mlay b'ant jlu kyu'n xjal, pero te Dios tkyaqil jaku b'ant tu'n.

²⁷Xitzun ttzaq'we'n Pedro: —Tat, kina qo'ye, ma kyaj qq'o'ne tkyaqilju at qeye ex ma qo ok lpe'ye ti'ja. ¿Alkyetzun ktzajel q'o'n qeye?

²⁸Xi tma'n Jesús kye: —Ax tok kxel nma'ne kyeye, tuj tq'ijlalil ok tok tkyaqil te ak'aj, chin b'el qe'ye tuj nq'uqb'ile in qoptz'aj tu'n nkawine, aqine sk'o'maj qine tu'n Dios tu'n ntene kyuk'il xjal; ax ikx kyeye che b'el qe'ye tib'aj kab'laj q'uqb'il tu'n kykawine kyib'aj kab'laj k'loj tiyjil Israel, porke ma che ok lpe'ye wi'je.

²⁹Ex alkye jun ma kyaj tq'o'n tja, ex qa ttzik, ex qa titz'in, ex qa tman, ex qa ttxu', ex qa t-xu'jil, ex qa tk'wa'l, ex qa ttx'otx', noq tu'n nlaje, jun syent maj ok tk'ma' t-xel, ex ok tkamb'a' tchwinqlal te jumajx.

³⁰Ex qeju ate' te tnejel ja'lo, nimku che okel te mankb'il; ex qeju ate' te mankb'il ja'lo, nimku che okel te tnejel.