Read kumam Mateo 20 Bible Online

Mateo 20 - kumam bible

Mateo 20

¹Aju kawb'il in tzaj tuj kya'j ik tten ik tza'n jun patrón, te prim ex jyol majen tu'n kyaq'nan tu'n tkub' twitz uva.

²B'anttzun ti'j tu'n kyuk'il majen, jun denari pwaq twi kyk'u'j jun q'ij, e je'xtzun t-sama'n aq'nal.

³Tej tpon las nueve ex patrón juntl maj, o til junjun xjal ate' tuj plas minti' kyaq'un.

⁴Xi tma'n kye: Ax ikx kyeye kyxi'ye aq'nal wuk'ile, jaku chjet kyq'ije wu'ne, chi patrón. E je'xtzun qe majen aq'nal.

⁵Ex patrón juntl maj te chilkuq'ij ex juntl maj te las tres te qale, ax ikx o tb'incha.

⁶Extzun juntl maj ch'ixtoq tpon las cinco, e knet junjuntl xjal tu'n minti' kyaq'un ex xi tma'n kye: ¿Tiqu'n noq nne'x kyq'ije tzalu minti' in che aq'nane?

⁷Xitzun kyma'n te: Porke mi a'l jun saj q'mante qaq'une. Xitzun tma'n patrón kye: Ax ikx kyeye kyxi'ye aq'nal wuk'ile, jaku chjet twi kyk'u'je wu'ne.

⁸Tejtzun tqoqax, xi tma'n patrón te tmayordom: Txkontza qe majen ex q'onxa twi kyk'u'j; nej q'onxa twi kyk'u'j qeju ẍe ul te mankb'il, te mankb'iltzun q'onxa twi kyk'u'j qeju ẍe ul nej.

⁹Tejtzun kypon qeju e je'x aq'nal ch'ixtoq tpon las cinco, teyle junjun o tk'am jun denari pwaq.

¹⁰Tejtzun kypon qeju e je'x aq'nal nej, kub' kyximan qa mas tu'n kychjet. Ax ikx teyle junjun o kyk'am jun denari pwaq.

¹¹Tejtzun kyk'monte twi kyk'u'j, tzaj jun kyyol ti'j patrón,

¹²ex xi kyma'n: Qe majen ẍe ul te mankb'il noq jun or ma che aq'nan, ex ax twi kyk'u'j ma chjet tu'na ik tza'n qeye ma qo sikte ti'j aq'untl ex ma tzik'x ta'w q'ij qu'ne enter q'ij.

¹³Xi ttzaq'we'n patrón ex xi tma'n te jun majen: Aya wuk'il, minti' jun mya b'a'n ma nb'inchaye teya. ¿Myapetzun b'i'x xb'ant ti'j qu'n jun denari pwaq twi tk'u'ja?

¹⁴Q'inxa twi tk'u'ja ex txi'ya. Ik tza'n ma txi nq'o'ne teya, ax ikx waje tu'n t-xi nq'o'ne te xjal lu aju sul te mankb'il.

¹⁵¿Myapetzun b'a'n tu'n nb'inchanteye alkye wajb'ile ti'j npwaqe? ¿Plojpe ma tz'el tuj twitza tu'nju b'a'n qi'ne?

¹⁶Kyja'tzun, qeju ate' te tnejel ja'lo, che okel te mankb'il, atzun qeju ate' te mankb'il ja'lo che okel te tnejel. [Ex nimku in che txkonjtz, ex nik'xi qeju sk'o'maj], chi Jesús, b'aj tma'n kye.

¹⁷Tej kyja'toq tjax Jesús tuj Jerusalén, xi tuk'in qe t-xnaq'tzb'en tuj b'e junx kye ex xi tma'n kye:

¹⁸—Qo jawix tuj Jerusalén ex chin xel q'o'ne tuj kyq'ab' nejenel kye pal ex tuj kyq'ab' xnaq'tzal ti'j ley, ex kb'el q'o'n nsentense tu'n nkyime, aqine sk'o'maj qine tu'n Dios tu'n ntene kyuk'il xjal,

¹⁹ex chin xel q'o'ne tuj kyq'ab' stranjer xjal, chin okel xmayine kyu'n, chin b'ajel k'ixb'isa'ne, ex chin jawil q'o'ne twitz crus; ex tuj toxin q'ij chin jawil anq'ine kyxol kyimni.

²⁰Pontzun laq'e' t-xu'jil Zebedeo kyuk'ix qe tal, kub' ẍmeje' twitz Jesús tu'n t-xi tqanin jun xtalb'il. Atzunte Jesús xi tqanin te:

²¹—¿Alkye taja? Xitzun tma'n xu'j te: —Q'ontza kyoklen qeju kab'e wale lu tu'n kykub' qe' ttxlaja ok tula tu'n tkawina, jun tuj tb'anq'ab'a ex juntl tuj tnayaja.

²²Xitzun ttzaq'we'n Jesús: —Minti' nne'l kynik'e ti'j ju in tzaj kyqanine. ¿Jakupe tzik'x kyu'ne ik tza'n weye ex tu'n t-xi kyk'a'ne aju kxel nk'a'ne? [¿Ex jakupe tzik'x nim k'ixk'oj kyu'ne ik tza'n weye k'ik'ex wu'ne?] —Jaku b'ant qu'ne, che chi.

²³Xi tma'n Jesús kye: —Ax tok k'ik'ex yajb'il kyu'ne aju weye k'ik'ex wu'ne; [ex k'ik'ex nim k'ixk'oj kyu'ne ik tza'n weye k'ik'ex wu'ne,] ex aju tu'n kykub' qe'ye tuj nb'anq'ab'e ex tuj nnayaje, mya tuj nkwente ta', b'animaj tu'n Nmane alkye qe tu'n kykub' qe' ntxlaje.

²⁴Tej kyb'inte qeju lajtl t-xnaq'tzb'en, tzaj kyq'oj kyi'j qeju kab'e kyitz'in kyib'.

²⁵E tzajtzun ttxko'n Jesús ex xi tma'n kye: —B'i'n kyu'ne, qe nejenel kyxol qe nasyon, in che kawin kyib'aj xjal, ex qeju at kyoklen, in che kyaj xjal tjaq' kykawb'il.

²⁶Atzun kyxole mya ik ttenju. Qa at jun kyxole taj tu'n tten mas toklen, e tok te ajb'el kyeye.

²⁷Ex alkye taj tu'n tok te nejenel kyxole, e tok te kymajene.

²⁸Ik tza'n weye, sk'o'maj qine tu'n Dios tu'n ntene kyuk'il xjal, minti' ma chin ule tu'n kyajb'en txqantl weye, noq o'kx tu'n wajb'ene kye mastl ex tu'n t-xi nq'on wib'e tu'n nkyime tu'n kykolpet nimku xjal.

²⁹Tejtzun tetz Jesús kyuk'ix t-xnaq'tzb'en tuj tnam Jericó, e ok lpe' nim xjal ti'j.

³⁰At kab'e xjal moẍ q'uql qe ttzi b'e. Tejtzun kyb'inte kyja' ttzaj Jesús, e jaw sch'in in kyma'n: —Aya Tat Tk'wa'l David, q'aq'antz tk'u'ja qi'je, che chi.

³¹Atzun kye xjal e ok ten ilil kyi'j, xi kymayo'n tu'n mi'n kyq'ajt; atzun kye moẍ mas e jaw sch'in kyuwxix, in kyma'n: —Aya Tat Tk'wa'l David, q'aq'antz tk'u'ja qi'je.

³²We'tzun Jesús, e tzaj ttxko'n ex xi tma'n kye: —¿Alkye kyajb'ile tu'n nb'inchanteye kyeye? Chi Jesús.

³³Xitzun kyma'n qe moẍ te: —Tat, qajb'ile tu'n tjaqet qwitze.

³⁴Tzajtzun q'aq'an tk'u'j Jesús kyi'j, ok tmako'n tb'aq' kywitz; ex jurat naj jaqet kywitz, ex e ok lpe' ti'j.