Read kumam Mateo 21 Bible Online

Mateo 21 - kumam bible

Mateo 21

¹Ch'ixtoq kykanun tuj Jerusalén, e pon tuj tal tnam Betfagé t-xe witz Olivos tb'i, xi t-sama'n Jesús kab'e t-xnaq'tzb'en

²ex xi tma'n kye: —Kyxi'ye tuj tal tnam tokx chixin; atzun knetel jun ttxu bur kyu'ne k'alo'n tuk'ix jun tal bur; kypaju'mile ex kyintze tzalu.

³Qa at jun xjal ma tma jun yol kyeye, kymanxe te: K'ajb'el te Qajaw, ex jurat che ajetz tq'o'n, che chikuye, chi Jesús.

⁴Tkyaqil jlu o b'ant tu'ntzun tjapun aju yol q'ma'maj tu'n t-sanjel Dios, chi kyja':

⁵Kymanxe kye xjal aj Sión: Lu tzul Kyreye kyuk'ile, mans ex tjax tib'aj jun ttxu bur, tjax tib'aj jun tal bur, tal jun ttxu bur, chi t-sanjel Dios.

⁶E je'xtzun qe xnaq'tzb'en, ex o kyb'incha ik tza'n tzaj q'ma'n kye tu'n Jesús.

⁷Ultzun kyi'n ju ttxu bur tuk'ix ju tal bur, jax kyq'o'n kyxb'alun kyib'aj; jaxtzun qe' Jesús tib'aj tal bur.

⁸Atzun kye tnam xjal kub' kylik'un kyxb'alun tuj b'e; ex junjuntl el kytx'emin tq'ab' tze', kub' kyq'o'n tuj b'e.

⁹Atzun qe xjal nejni twitz Jesús kyuk'ix qeju lepchix ti'j in che sch'in ex in kyma'n: —Qq'onx q'olb'eb'l te Tk'wa'l rey David. Ky'iwla'n teju tzul, tu'n Qman ma tzaj sama'n. Nimanxwit tb'i Dios tuj kya'j.

¹⁰Tejtzun tokx Jesús tuj tnam Jerusalén, kykyaqil xjal tuj tnam e jaw tilj ex in kyma'n: —¿Alkyeju xjal lu?

¹¹Atzun kye xjal xi kyma'n: —Ate jlu Jesús t-sanjel Dios, aju aj Nazaret tuj tx'otx' Galilea.

¹²Okxtzun Jesús tuj tja Dios, e b'je'tz tlajo'n kykyaqil qeju in che k'ayin ex in che loq'on tuj tja Dios; ex jaw tpich'q'u'n kymes qe ch'expul twitz pwaq, tuk'ix kyq'uqb'il qeju in che k'ayin paloma.

¹³Xi tma'n kye: —At jun yol in tma'n tuj Tu'jil chi kyja': We nja, ja te nab'l Dios tb'i k'okel, chi tuj Tu'jil; atzun kyeye ma tz'ok kyq'o'ne te kyjul eleq', chi Jesús.

¹⁴E ultzun qe moẍ kyuk'ix qe kox tuk'il Jesús tuj tja Dios, ex e b'anix tu'n.

¹⁵Atzun kye nejenel kye pal kyuk'ix qe xnaq'tzal ti'j ley, tzaj kyq'oj tej kylonte qe tb'inchb'en Jesús nim tipumal, ex tej kyb'inte in che sch'in qe k'wa'l tuj tja Dios ex in kyma'n: Qq'onx q'olb'eb'l te Tk'wa'l rey David, che chi k'wa'l.

¹⁶Ex xi kyma'n nejenel kye pal te Jesús: —¿Mape tb'iya aju in kyma'n jlu? —Ma nb'iye, chi Jesús. Yajtzun kyeye, ¿b'ajxpe jaw kysch'i'ne tuj Tu'jil jatum in yolin ti'j jlu? Chi kyja': Ma tzaj tma'na tu'n tjaw nimsa'n tb'iya kyu'n tal k'wa'l ex kyu'n qeju in che ch'u'n, chi tuj Tu'jil.

¹⁷E kyajtzun tq'o'n Jesús qe xjal, etz ti'jtzi tnam Jerusalén, pon tuj tnam Betania ex axtzun kyaj ten te qonik'an.

¹⁸Te juntl q'ij te prim, kyja'toq t-xi' Jesús tuj tnam Jerusalén, tzaj el tk'u'j.

¹⁹Ex o til Jesús jun tqan higo tkub' ttzi b'e, xi'tzun t-xe tqan higo, ex minti' knet jun twitz higo tu'n, o'kx t-xaq at. Xitzun tma'n Jesús te tqan higo: —Te jumajx mlay tz'ok jun twitza, chi Jesús. B'i'xtzun tzqij tqan higo.

²⁰Tej kylonte qe t-xnaq'tzb'en jlu, e lab'in ti'j. —¿Tza'ntzun tten b'i'x ma tzqij tqan higo? Che chi.

²¹Xi ttzaq'we'n Jesús: —Ax tok kxel nma'ne kyeye, qa at kyokslab'le ex qa minti' ma jawje' kyk'u'je, mya noq o'kx jaku b'ant tu'n ttzqij tqan higo kyu'ne, ax ikx jaku txi kyma'ne teju witz lu: Tik'a ex xo'nx tib'a tuj mar, qa che chiye, ex kb'anteltzun aju kxel kyma'ne.

²²Ex tkyaqilju kxel kyqanine tuj na'j Dios, ex qa ma qe' kyk'u'je ti'j Dios, ok kyk'ma'ye.

²³Tej tokx Jesús tuj tja Dios, e pon laq'e' qe nejenel kye pal kyuk'ix qe kytijil xjal judiy; matoq in tq'o'n Jesús xnaq'tzb'il xi kyqanin te: —¿Ti toklena tu'n tb'inchanteya tkyaqil jlu? ¿Alkye ma tzaj q'onte toklena? Che chi.

²⁴Xi ttzaq'we'n Jesús: —Ikx weye at jun yol kxel nqanine kyeye; qa ma tzaj kytzaq'we'ne, ax ikx weye kxel nma'ne kyeye ti woklene tu'n nb'inchanteye tkyaqil jlu.

²⁵¿Alkye tzaj q'onte toklen Juan tu'n kyb'yan xjal tu'n? ¿Tu'npe Dios ex qa kyu'n xjal? Chi Jesús kye. Atzun kye e ok ten yolil ti'j kyxolx in kyma'n: —Qa ma txi qma'n, tu'n Dios tzaj q'o'n toklen, ktzajeltzun tma'n qe: ¿Tiqu'ntzun minti' xi kyoksla'ne? Chilo.

²⁶Ex qa ma txi qma'n, kyu'n xjal tzaj q'o'n toklen, jakulo tzaj qxob'il kywitz xjal porke kykyaqil in che yolin ti'j qa ate Juan t-sanjel Dios.

²⁷Xitzun kyma'n te Jesús: —Minti' b'i'n qu'ne. Ikx te Jesús xi tma'n kye: —Ikx weye mlay txi nma'ne kyeye ti woklene tu'n nb'inchanteye tkyaqil jlu.

²⁸Ex ¿chi tok kyu'ne? At jun xjal attoq kab'e tk'wa'l; pon xjal tuk'il ju tzikb'aj ex xi tma'n te: Nk'wa'l, txi'ya aq'nal ja'lo tu'n tkub' twitz uva.

²⁹Tzaj ttzaq'we'n ju tk'wa'l: Mlay chinxe. Ex te yajxitl ajtz ti'j tanmi ex xi'tzun.

³⁰Ax ikx pontl ju mamb'aj tuk'il ju tz'inb'aj, ax ju yol xi tma'n te; atzunte tz'inb'aj tzaj ttzaq'we'n: Chin xe'le, Tat. Ex minti' xi'.

³¹¿Alkyetzun kyxol kab'e k'wa'lb'aj lu tb'incha aju tajb'il tman? Chi Jesús kye. Xi kytzaq'we'n xjal: —Aju tzikb'aj. Xi tma'ntl Jesús kye: —Ax tok kxel nma'ne kyeye: Qe peyil pwaq ex qe xu'j aj pajil nej che okex kywitze tuj tkawb'il Dios.

³²Porke ul Juan kyuk'ile, aju e b'yan xjal tu'n, in tma'n tu'n kyb'inchanteye aju tz'aqlxix, ex minti' xi kyoksla'ne; atzun kye peyil pwaq ex qe xu'j aj pajil xi kyoksla'n; atzun kyeye o kyile jlu, ex minti' ajtz ti'j kyanmiye ex minti' xi kyoksla'ne.

³³Kyb'intze juntl techal: At jun patrón ku'x tawa'n tqan uva, ok tq'o'n pe'n ti'j, ku'x tlaku'n jun jul jatum tu'n tel ptz'et ta'l uva, jaw tb'incha'n jun ja te kwentb'il tqan uva, kyajtzun tq'o'n tx'otx' te majen kye junjun aq'nal ex xi'tzun tuj jun lugar najchaq.

³⁴Tejtzun tul tq'ijlalil tu'n tkub' twitz awal, e tzajtzun t-sama'n patrón qe tmajen kyuk'il majenal tx'otx' tu'n tk'monte ch'in twitz awal te ta'l ttx'otx'.

³⁵Atzun kye majenal tx'otx' e tzyet qe majen kyu'n; jun b'aj kyk'ixb'isa'n, juntl kub' kyb'yo'n, ex juntl ok kyxo'n tu'n ab'j.

³⁶E tzajtzun t-sama'ntl patrón txqantl tmajen, mas ela' kyb'et kywitz qeju e tzaj t-sama'n nej; atzun kye majenal tx'otx' ikx kyb'incha kyi'j ik tza'n kyb'incha nej.

³⁷Te mankb'ilxitzun tzaj t-sama'n patrón tk'wa'l: Qapelo at ch'in tchi nk'wa'le tuj kywitz, chi patrón.

³⁸Atzun kye majenal tx'otx', tej kylonte kyja' ttzaj tk'wa'l patrón, kyma kyxolx: Atzunte etzal jlu; chux qeye qb'yonku ex qtzyum aju tetzb'il, tu'ntzun tkyaj ten tetzb'il te qe, che chi.

³⁹Tzyettzun kyu'n, ex kyi'n ti'jxi tqan awal, ex kub' kyb'yo'n.

⁴⁰Oktzun tul tajaw tqan awal, ¿chi tok kyu'ne, ti ok tb'incha' kyi'j qe majenal tx'otx' lu? Chi Jesús kye.

⁴¹Xitzun kyma'n: —Ok che b'el tb'yo'n qe xjal lu mya b'a'n qe, mlay tzaj q'aq'an tk'u'j kyi'j; atzun tqan uva kxel tq'o'n te majen kye txqantl aq'nal, tu'ntzun t-xi kyq'o'n ch'in twitz awal te ok tul tq'ij, che chi xjal.

⁴²Xitzun tma'n Jesús kye: —¿B'ajxpe jaw kysch'i'ne ti in tma'n tuj Tu'jil? Chi kyja': Aju ab'j el kyik'un qe b'inchal ja ma tz'ok te skyini te simyent. Tu'n Qman ma b'ant jlu, ex ma' t-xilen jlu tuj qwitz, chi tuj Tu'jil.

⁴³Kyja'tzun kxel nma'ne kyeye, k'elel q'i'n kyoklene tu'n mi'n kyokxe tuj tkawb'il Dios, ex kxel tq'o'n Dios kyoklen juntl k'loj xjal, tu'n t-xi kyq'o'n ch'in twitz awal teju tajaw awal.

⁴⁴Alkye jun xjal ma jaw tolj ex ma kub' tz'aq tib'aj ab'j lu, b'i'x kb'ajel toqj; ex alkye jun xjal qa ma kub' tz'aq ab'j lu tib'aj, b'i'x kb'ajel b'uchj xjal tu'n, chi Jesús kye.

⁴⁵Tejtzun kyb'inte qe nejenel kye pal kyuk'ix qe fariseo aqeju techal tma Jesús, el kynik' ti'j qa kyi'j in yolintoq Jesús.

⁴⁶O kyajb'e tu'n ttzyet Jesús kyu'n, ex tzaj kyxob'il kywitz xjal, porke in kyma'n xjal qa t-sanjel Dios te Jesús.