Read kumam Mateo 22 Bible Online

Mateo 22 - kumam bible

Mateo 22

¹O yolin Jesús juntl maj kye tuj techal, chi kyja':

²—Aju kawb'il in tzaj tuj kya'j ik tten ik tza'n jun rey tb'incha jun nintz wa'n tej tmoje' tk'wa'l.

³Xi t-sama'n rey qe tmajen txkol kye xjal otoq txi q'ma'n kye tu'n kyul tuj mejeb'le'n; ex aqeju xjal lu minti' kub' tuj kywitz tu'n kytzaj.

⁴Xitzun t-sama'n rey junjuntl tmajen ex xi tma'n kye: Kymanxe kye qe xjal txko'maj qe: Lu ma b'ant wab'j wu'ne; ma che kub' nb'yo'ne wakẍ kyuk'ix qe walune ulni kynab'l, tkyaqil ma b'ant tten; kytzaje tuj mejeb'le'n, che chikuye.

⁵Atzun kye xjal minti' xi kyb'i'n. At jun xi' aq'nal ti'j tawal, ex juntl xi' k'ayil;

⁶ex txqantl xjal e tzyet qe majen kyu'n, e ok ten yasul kyi'j, ex e kub' kyb'yo'n.

⁷Tejtzun tb'inte rey jlu, tzaj nim tq'oj; e je'x t-sama'n qe t-soldad, b'i'x kub' kyb'yo'n soldad qeju b'yol xjal, ex kub' kypatun kytanmi.

⁸Xitzun tma'n rey kye tmajen: Aju nintz wa'n te mejeb'le'n ma b'ant tten tkyaqil; ex qe xjal xi q'met kye tu'n kyul, mya b'a'n qe.

⁹Kyxi'tzune jatum in che moje' b'e, ex kytxkontze kykyaqil xjal alkyex ma che knet kyu'ne, tu'n kyul tuj mejeb'le'n, chi rey.

¹⁰E je'xtzun qe majen tuj b'e, e tzaj kychmo'n kykyaqil xjal e knet kyu'n, qe xjal mya b'a'n ex qe xjal b'a'n; kyja'tzun aju ja jatum ok mejeb'le'n o noj kyu'n xjal otoq che tzaj txko'n.

¹¹Okxtzun rey ke'yil kye xjal otoq che tzaj txko'n, o til rey jun xjal mya t-xb'alun tok aju in ajb'en te mejeb'le'n.

¹²Xi tma'n rey te xjal: Aya wuk'il, ¿tza'n tten soktza tzalu ex mya t-xb'aluna tok aju in ajb'en te mejeb'le'n? Atzunte xjal minti' q'ajt.

¹³Xitzun tma'n rey kye qeju in che sipan wab'j: Kyk'alome tqan tuk'ix tq'ab', ex kyxo'mixe tuj qlolj ttxa'n pe'n; atzun ktzajel oq'el ex kqitx'itx'il t-xe kye' xjal, chi rey.

¹⁴Ex nimku in che tzaj txko'n, ex nik'xi qeju sk'o'maj qe, chi Jesús.

¹⁵E je'xtzun qe fariseo, ex e yolin ti'j kyxolx tza'n tten tu'n tkub' tz'aq Jesús kyu'n ti'j jun tyol.

¹⁶E je'x kysama'n fariseo kyxnaq'tzb'en tuk'il Jesús kyuk'ix qeju in che ok lpe' ti'j Herodes ex xi kyma'n te: —Xnaq'tzal, b'i'n qe qu'n aya ax tok tyola, ex in tq'o'na xnaq'tzb'il tuj tumelxix tza'n tten tu'n qb'et twitz Dios, ex minti' in xob'a kywitz xjal, porke minti' nno'k tke'yina aju t-xilen xjal.

¹⁷Q'mantza qeye, ¿chi tok tu'na? ¿B'a'npe tu'n t-xi qq'o'ne chojb'il nne'l tqanin gobierni ex qa mi'n? Che chi.

¹⁸Pero el tnik' Jesús ti'j kyximb'etz mya b'a'n ex xi tma'n kye: —¿Tiqu'n in che jyone tumel wi'je tu'n nkub' tz'aqe tuj jun wile? Xmletz' qeye.

¹⁹Kyyek'untze jun pwaq weye aju in xi q'ot te chojb'il. Xitzun kyyek'un jun denari pwaq.

²⁰Xitzun tqanin Jesús kye: —¿Al etzun tilb'ilal tok twitz pwaq ex al etzun b'iyb'aj tz'ib'an twitz?

²¹—Te gobierni, che chi. Xitzun tma'n Jesús kye: — Kyq'onxe te gobierni aju te gobierni, ex kyq'onxe te Dios aju te Dios.

²²Tej kyb'inte jlu, e lab'in ti'j, kyajtzun ten Jesús kyu'n, ex e ik'tzun.

²³Tujx q'ij lu e ul junjun saduceo tuk'il Jesús, aqeju in kyma'n qa mlay jatz anq'in jun xjal kyxol kyimni, ex xi kyqanin te:

²⁴—Xnaq'tzal, che chi, at jun yol kyaj tma'n Moisés: Qa at jun xjal ma kyim ex minti' jun tk'wa'l otoq tzaj, axju titz'in kmojeb'el tuk'il t-xu'jil qtzan ttzik, tu'ntzun tkyaj jun t-xel qtzan ttzik tu'n, tu'n mi'n tnaj tiyjil.

²⁵At wuq xjal e ten qxole kyitz'in kyib'. Knettzun t-xu'jil ju tnejel, ex kyim; ex tu'nju minti' jun tk'wa'l kyaj, kyaj ten ju t-xu'jil te t-xu'jil tkab' k'wa'l.

²⁶Ax ikx o b'aj ti'j tkab' k'wa'l ex ti'j toxin, ax ikx b'aj kyi'j kywuqil, e b'aj kyim.

²⁷Kykyimlenxi kykyaqil, ax ikx te xu'j kyim.

²⁸Tuj tq'ijlalil ok kyjatz anq'in kyimni, ¿alkyetzun k'okel te tchmil xu'j kyxol qeju wuq xjal kyitz'in kyib' tu'nju kywuqil e xujlante te? Che chi Saduceo.

²⁹Xitzun ttzaq'we'n Jesús: —Ma che el tzpete ti'j porke minti' nne'l kynik'e ti'j ju in tma'n tuj Tu'jil, ex minti' nne'l kynik'e ti'j tipumal Dios.

³⁰Porke tuj tq'ijlalil ok kyjatz anq'in xjal kyxol kyimni minti' kyxu'jil xinaq knetel ex minti' kychmil xu'j knetel, ex kykyaqil ik che okel ik tza'n qe t-anjel Dios ate' tuj kya'j.

³¹Ex ti'j ju tu'n kyjatz anq'in xjal kyxol kyimni, ¿b'ajxpe jaw kysch'i'ne aju o tma Dios kyeye, chi kyja':?

³²Aqine Tdios Abraham, ex Tdios Isaac, ex Tdios Jacob, chi Dios. Ate Dios mya Kydios kyimni, noq o'kx Kydios itz', chi Jesús kye.

³³Tej kyb'inte xjal jlu, e lab'in ti'j t-xnaq'tzb'il Jesús.

³⁴Atzun kye fariseo, tej kyb'inte qa minti' e q'ajt saduceo tu'n Jesús, b'aj kychmon kyib'.

³⁵Ex at jun chik'b'al ti'j ley kyxol o tajb'e tu'n tok Jesús tuj joyb'il ti'j tu'n, xi tqanin te:

³⁶—Xnaq'tzal, ¿alkye jun mandamyent mas ma' toklen tuj ley? Chi xjal.

³⁷Xi tma'n Jesús te: —Kyk'ujlame Qman Dios tu'n tkyaqil kyanmiye ex tu'n tkyaqil kyk'u'je ex tu'n tkyaqil kynab'le.

³⁸Atzun tnejel mandamyent jlu ma'xix toklen.

³⁹Ex aju tkab'in mandamyent ikx tten ik tza'n tnejel, in tma'n: Kyk'ujlame qe kyuk'ile ik tza'nx kyeye in kyk'ujlan kyib'e.

⁴⁰Aqeju kab'e mandamyent lu, atzun ttxuylal tley Moisés ex ttxuylal kyyol qe t-sanjel Dios, chi Jesús te xjal.

⁴¹Axtoq kychmon kyib' qe fariseo, xi tqanin Jesús kye:

⁴²—¿Chi tok kyu'ne ti'j ju Crist aju at toklen tu'n Dios? ¿Al e k'wa'lb'aj? Xi kyma'n te: —Te David.

⁴³Xitzun tma'n Jesús kye: —¿Tza'ntzun tten in yolin David ti'j tu'n Xewb'aj Xjan, in tma'n qa a Crist Tajaw? Porke chi David:

⁴⁴Xi tma'n Qman te Wajawe: Qekuya tuj nb'anq'ab'e akutzun in kub' kyi'j qe aj q'oj ti'ja wu'ne, chi tuj Tu'jil.

⁴⁵[Qa in tma'n David qa a Crist Tajaw, ¿tza'ntzun tten tu'n tok Crist te tk'wa'l David?] Chi Jesús kye.

⁴⁶Ex mi jun kye knet yol tu'n tu'n t-xi ttzaq'we'n; ya minti'tl ok kynimarin kyib' tu'n t-xi kyqanin juntl yol te.