Read kumam Mateo 24 Bible Online

Mateo 24 - kumam bible

Mateo 24

¹Tej tetz Jesús tuj tja Dios kyja' t-xi' tuj juntl lugar, e pon laq'e' qe t-xnaq'tzb'en ttxlaj, xi kyyek'un tja Dios te, tza'n tten b'inchb'en te.

²Ex xi ttzaq'we'n Jesús: —¿Mape kyile tkyaqil jlu? Ax tok kxel nma'ne kyeye, mlay kyaj ten ab'j tib'aj juntl ab'j, tkyaqil kb'el tilj.

³E je'xtzun twi witz Olivos, ex tejtzun tkub' qe' Jesús e pon laq'e' qe t-xnaq'tzb'en ttxlaj junx kye, ex xi kyma'n te: —Q'mantza qeye, ¿jtoj b'an tjapun tkyaqil jlu ex alkye señ tzul ch'ixtoq tula ex ch'ixtoq tjapun b'aj tq'ijlalil? Che chi.

⁴Xi ttzaq'we'n Jesús: —Ten kykwente kyi'je tu'n mi'n kykub' sb'u'ne kyu'n xjal.

⁵Porke nimku xjal che ul ex k'okel kyq'on kyib' ik tza'n weye ex ok kyma': Aqine ju Crist at woklene tu'n Dios, che chilo; ex nimku xjal che b'el kysb'u'n.

⁶Ok kyb'i'ye ok tok q'oj ex ok kyb'i'ye tqanil ti'j q'oj, kykwentin ok kyib'e tu'n mi'n kyjaw sek'paje, ex il ti'j tu'n tjapun tkyaqil jlu; ex myatzun a mankb'il tq'ijlalil tu'n tjapun b'aj tkyaqil.

⁷Porke qe xjal tuj jun nasyon che q'ojlel ti'j juntl nasyon, ex che q'ojlel qe tnam kyi'j txqantl tnam; ex noq jachaq tzul tx'u'j yab'il ex we'yaj ex kyaqnajnab'.

⁸Tkyaqil jlu atzun tnejel k'ixb'isab'l.

⁹Ex che xel q'o'ne tuj kyq'ab' xjal tu'n kyb'aj k'ixb'isa'ne, ex che b'el b'yo'ne kyu'n, ex che elel ik'une kyu'n kykyaqil xjal tu'n tlaj okslal qeye wi'je.

¹⁰Tu'ntzun jlu nimku xjal kyjel kykolin kyokslab'l; ax qe kyuk'il che okel te aj q'oj kyi'j ex k'elel kyik'un kyib' kyxolx.

¹¹Ex nimku xjal che ul, k'okel kyq'on kyib' te t-sanjel Dios ex mya ax tok kyu'n, ex nimku xjal che b'el kysb'u'n.

¹²Ex tu'nju otoq chmet il, nimku xjal mi'n tentl kyk'ujlalil kyxolx.

¹³Ex alkye kukx ma tzik'x tu'n ex minti' ma kub' numj, atzunju ok kletel.

¹⁴Aju tqanil b'a'n lu ti'j tkawb'il Dios kxel pakb'et tuj tkyaqil twitz tx'otx' tu'ntzun tchik'b'anjtz ju yol lu kye kykyaqil nasyon; maxitzun tzul mankb'il tq'ijlalil.

¹⁵At jun yol kyaj ttz'ib'an Daniel aju t-sanjel Dios; k'okex kyq'o'n xjal jun tilb'ilal ik'b'ilxix ax tuj tja Dios, chi Daniel. Alkye ma jaw sch'inte jlu, tz'elx tnik' ti'j. Kyja'tzun ok kylonteye tokx tilb'ilal lu tuj lugar xjan,

¹⁶ex qe xjal ate' tuj tx'otx' Judea, kyxi oq twi witz.

¹⁷Alkye jun xjal tjax twi ja, ok tku'tz mi'n tz'okx tuj tja tu'n tetz ti'n jun ti'xti;

¹⁸ex alkye jun xjal at tuj kojb'il, mi'n tz'ajtz meltz'aj q'ilte ttxo'w.

¹⁹Ex b'ek'b'il kywitz qe xu'j ch'ixtoq tul itz'j kyal tuj tq'ijlalil tzul, ex b'ek'b'il kywitz qe xu'j kukx kych'u'n kyal.

²⁰Kyja'tzun, che na'ne Dios tu'ntzun mi'n kyel oqe tuj jb'alil ex tuj q'ij te ojlab'l;

²¹porke tzul jun k'ixb'isab'l ma'xix, b'ajx tzaj jun maj ikju atxix tej tb'ant twitz tx'otx', ex mlay tzaj juntl maj ik tza'n jlu.

²²Noqwit minti' tu'n tajtz laq'e' ti'j tq'ijlalil k'ixb'isab'l, miwtlo jun xjal tu'n tkyaj klet; ex tu'n kylaj qeju sk'o'maj tu'n Dios, k'ajetz laq'e' ti'j tq'ijlalil k'ixb'isab'l.

²³Qa at jun xjal ma q'mante kyeye: Lu Crist lu aju at tulel, qa chi, ex qa lu at ma chixin, qa chi, mi'n txi kyoksla'ne tyol.

²⁴Ok che ul xjal k'okel kyq'on kyib' ik tza'n Crist qe, ex mya ax tok kyu'n, ex che ul xjal k'okel kyq'on kyib' te t-sanjel Dios, ex mya ax tok kyu'n; ex ok kyb'incha' qe señ ma'xix ex qe b'inchb'en nim kyipumal tu'n kysb'un kyi'j xjal, ax ikx ok kyajb'e tu'n kysb'un kyi'j qeju sk'o'maj qe tu'n Dios, noqwit at tumel.

²⁵Ya ma txi nma'ne tkyaqil kyeye na'nxtoq tul kanun tkyaqil jlu.

²⁶Kyja'tzun, qa ma kyma xjal: Lu Crist at tuj lugar minti' kynajb'il xjal tuj, qa che chi, mi'n che'xe ke'yilte te; ex qa ma kyma: Lu Crist tokx tuja, qa che chi, mi'n txi kyoksla'ne kyyol.

²⁷Porke ik tza'n xle'laj kya'j in jaw tuj tjawitz q'ij ex in pon qoptz'aj tuj telex q'ij, iktzun tten chin ule, aqine sk'o'maj qine tu'n Dios tu'n ntene kyuk'il xjal.

²⁸Porke jatum ta' t-ximlal kyimni, atzun che chmetel qe k'utz.

²⁹Tb'ajlenxitzun yajb'il tuj tq'ijlalil tzul, k'okel qlolj twitz q'ij, ex aju xjaw mlay k'ant t-spik'umal, qe che'w twitz kya'j che tzajel tz'aq, ex qe tipumal kya'j che yukchtel.

³⁰Oktzun ktzajel yek'un jun techal tuj kya'j tu'n wule, aqine sk'o'maj qine tu'n Dios tu'n ntene kyuk'il xjal, oktzun che jawil oq' kykyaqil xjal tuj junjun tnam twitz tx'otx', ex ok kyila' ok ntzaje tib'aj muj twitz kya'j tuk'il wipumale nim ex in qoptz'aj wi'je tu'n nspik'umale.

³¹Che tzajel nsama'ne qe n-anjele, k'okel q'ajtza'n chun kyuw, ex qeju sk'o'maj wu'ne che okel chmo'n kyu'n anjel, che tzajel chmo'n tuj tkyaqil twitz tx'otx' ex max ttxa'npun tx'otx'.

³²Kyi'mele techal ti'j tqan higo: Ok in tzaj t-xul, nne'l kynik'e ti'j ch'ix tul ttzi jb'alil.

³³Ax ikxtzun kyeye, ok kylonteye tkyaqil jlu, tz'elx kynik'e ti'j, niqayin ta' tq'ijlalil tu'n wule, mer ik tza'n otoq chin pone ttzi ja.

³⁴Ax tok kxel nma'ne kyeye, na'nxtoq kykyim qe xjal ate' tuj tq'ijlalil ja'lo ok tjapun tkyaqil jlu.

³⁵Ate kya'j knajel tuk'ix tx'otx', atzun we nyol mlay naj.

³⁶Ex alkye q'ij ex alkye or tu'n wule, mi a'l jun xjal b'ilte, mi qe anjel tuj kya'j minti' b'i'n kyu'n, ax ikx weye minti' b'i'n wu'ne, aqine Tk'wa'l Dios. O'kx Nmane b'a'n tu'n.

³⁷Aju tq'ijlalil ok wule, aqine sk'o'maj qine tu'n Dios tu'n ntene kyuk'il xjal, ik tten ik tza'n tuj tq'ijlalil tej tten Noé.

³⁸Porke tuj tq'ijlalil tej na'nxtoq ttzaj q'eqab', in che wa'n xjal ex in che k'an, in che moje' xinaq tuk'il kyxu'jil ex qe xu'j tuk'il kychmil, kukxtoq kyb'inchante jlu tuj q'ij tej tokx Noé tuj matij barc;

³⁹ex minti'toq tok kykwent ti'j tej ttzaj q'eqab' kyib'aj; kykyaqiltzun e je'x q'i'n tu'n a'. Ikxtzun kb'ajelju ok wule aqine sk'o'maj qine tu'n Dios tu'n ntene kyuk'il xjal.

⁴⁰Qa at kab'e xjal tuj kojb'il, jun kxel q'i'n ex juntl kyjel q'o'n.

⁴¹Qa at kab'e xu'j in che che'n ti'j kya', jun kxel q'i'n ex juntl kyjel q'o'n.

⁴²Kyja'tzun che xq'uqine, porke minti' b'i'n kyu'ne alkye or tzul Kyajawe.

⁴³Ex tz'elx kynik'e ti'j yol lu, noqwit b'i'n tu'n tajaw ja alkye or tzul eleq', jakulo kub' ten xq'uqil ex mlay txi tq'o'n amb'il tu'n tokx tjaqo'n eleq' tja.

⁴⁴Kyja'tzun ikx kyeye kyb'incham kytene; ok chin ule tuj or aju mya ximan kyu'ne, aqine sk'o'maj qine tu'n Dios tu'n ntene kyuk'il xjal.

⁴⁵Aju majen in b'ant taq'un tu'n ex at tnab'l, k'okel q'o'n tu'n tpatrón te kwentil kye qeju ate' tuj tja, tu'n t-xi q'ot kywa ok tpon or.

⁴⁶At tzalajb'il teju majen lu qa in tb'incha'n alkye taq'un ok tul tpatrón.

⁴⁷Ax tok kxel nma'ne kyeye, k'okel q'o'n majen lu tu'n tpatrón te kwentil te tkyaqilju at te patrón.

⁴⁸Ex qa mya b'a'n ju majen lu, ex qa ma tma tuj tanmi: Yaj tzul we npatrón, qa chi,

⁴⁹ex qa ma tz'ok ten k'ixb'isal kye txqantl majen, ex qa ma tz'ok ten wa'l ex k'al kyuk'il qe k'al q'e'n,

⁵⁰tzultzun tpatrón majen lu tuj q'ij minti' in ayon ti'j, ex tuj or minti' b'i'n tu'n;

⁵¹ex kb'el q'o'n nim tcastiw majen lu tu'n tpatrón, ex atzun kxel q'o'n kyxol qe xmletz'; atzun ktzajel oq'el ex atzun kqitx'itx'il t-xe kye' xjal.