Read kumam Mateo 27 Bible Online

Mateo 27 - kumam bible

Mateo 27

¹Tejtzun qsqix, kykyaqil nejenel kye pal kyuk'ix kytijil xjal judiy e yolin ti'j kyxolx tza'n tten tu'n tkyim Jesús kyu'n.

²B'aj kyk'alo'n, xi kyi'n ex pon kyi'n twitz Poncio Pilato aju gobernador.

³Ate Judas xi q'onte Jesús tuj kyq'ab' xjal, tejtzun tlonte otoq kub' t-sentens Jesús tu'n tkyim, tzaj ta'w tuj tanmi, aj tq'o'n aju 30 saq pwaq kye nejenel kye pal ex kye kytijil xjal ex tma:

⁴—Ma chin b'inchane il, ma txi nq'o'ne tuj kyq'ab'e jun xjal minti' til, chi Judas. Atzun kye kyma: —Minti' qe qaj ti'j, malomte tib'.

⁵Kyajtzun t-xo'n Judas aju saq pwaq tuj tja Dios, etztzun, xi'tzun, jaw tyob'in tib' ex ok tk'alo'n tqul tu'n tkyim.

⁶Atzun kye nejenel kye pal jaw kyi'n aju saq pwaq ex kyma: —Mya q'o'n tu'n ley tu'n tku'x qq'o'n tuj k'ub'l te oyaj, porke aju pwaq lu chojb'il twi' jun xjal tu'n tkyim, che chi.

⁷Tejtzun kyb'aj yolin ti'j, ajb'entzun pwaq kyu'n tu'n tlaq'et jun piẍ tx'otx' tok tb'i tx'otx' te b'inchb'il ẍoq', atzun tu'n kyku'x maqut qe b'etin xjal tuj tx'otx' lu.

⁸Kyja'tzun ok q'o'n tb'i tx'otx': Tx'otx' twi' tchk'el jun xjal, ex ax tb'i tok ja'lo.

⁹Kyja'tzun japun aju q'ma'maj tu'n Jeremías aju t-sanjel Dios. Chi Jeremías: Xitzun kyi'n aju 30 saq pwaq, atzun twi' jun xjalju kyaj b'ant ti'j kyu'n aj Israel.

¹⁰Xi kyq'o'n pwaq lu twi tx'otx' te b'inchal ẍoq', ik tza'nx tzaj tma'n Qman weye.

¹¹Atzunte Jesús wa'ltoq twitz gobernador; xitzun tqanin gobernador te: —¿Apeya ju Rey kye xjal judiy? Chi gobernador. —Aqine ik tza'n ma tmaya, chi Jesús xi tma'n te.

¹²Tejtzun kyok ten qe nejenel kye pal kyuk'ix qe kytijil xjal tx'olb'alte til, minti' jun yol tma Jesús.

¹³Xitzun tma'n Pilato te: —¿Minti'pe in tb'i'na nimku in q'manjtz ti'ja kyu'n?

¹⁴Pero te Jesús mi jun yol xi ttzaq'we'n; tu'ntzunju nim o lab'in gobernador ti'j.

¹⁵Kykyaqil ab'q'i in b'ant tu'n gobernador tu'n tetz ttzoqpi'n jun pres tuj ninq'ij, noq alkye kyajb'il tnam xjal tu'n tetz tzoqpi'n.

¹⁶Attoq jun xinaq tokx tuj pres, Barrabás tb'i, b'i'maj kyu'n kykyaqil xjal.

¹⁷Tej tb'aj kychmon kyib' qe xjal, xi tma'n Pilato kye: —¿Alkye kyajb'ile tu'n tex ntzoqpi'ne? ¿Kyajpeye tu'n tex ntzoqpi'ne Barrabás ex qa a Jesús aju Crist tb'i? Chi Pilato.

¹⁸Porke b'i'ntoq tu'n Pilato, pon q'i'n Jesús kyu'n noq tu'nju at tlo'ch kyk'u'j ti'j.

¹⁹Kub'tzun qe' Pilato tuj q'uqb'il tu'n tkawin, tzaj sama'n jun xjal tu'n t-xu'jil q'malte te kyja': Mi'n tz'ok tq'on tib'a ti'j ju xjal tz'aqlxix lu, porke tuj nwitzik'e qonik'an may' nim ma tzik'x wu'ne tu'n tlaj, chi t-xu'jila, chi xjal.

²⁰Atzun qe nejenel kye pal kyuk'ix qe kytijil xjal kub' ti'j kynab'l xjal kyu'n tu'n t-xi kyqanin tu'n tetz tzoqpi'n Barrabás, atzunte Jesús tu'n tkyim.

²¹Xitzun tqanin juntl maj gobernador: —¿Alkye jun kyajb'ile tu'n tex ntzoqpi'ne? Atzun kye xjal kyma: —Ate Barrabás tu'n tetz ttzoqpi'na.

²²Xitzun tma'n Pilato kye: —¿Titzun ok nb'incha'ye ti'j Jesús aju Crist tb'i? Kymatzun kykyaqil xjal: —E tjaw twitz crus.

²³Atzunte Pilato xi tma'n kye: —¿Alkyetzun jun mya b'a'n ma tb'incha? Atzun kye xjal mas e jaw sch'in: —E tjaw twitz crus, che chi.

²⁴Tejtzun tlonte Pilato minti' tu'n tb'ant ti'j, noq mas in che jaw tilj xjal, tzaj ti'n Pilato ch'in a', el ttx'jo'n tq'ab' kywitz kykyaqil xjal ex tma: —Minti' wile ti'j ju xjal tz'aqlxix lu qa ma kyim. Kyke'yinxe ti k'okel, chi Pilato.

²⁵Xi kytzaq'we'n kykyaqil xjal: —Aqeqo' at qile kyuk'ix qk'wa'le qa ma kyim xjal lu.

²⁶Etztzun tzoqpi'n Barrabás tu'n Pilato; atzunte Jesús b'aj asyalin ex xi q'o'n tu'n Pilato tuj kyq'ab' soldad tu'n tjaw kyq'o'n twitz crus.

²⁷Xitzun q'i'n Jesús kyu'n t-soldad gobernador, okx kyi'n tuj cuartel, b'aj kytxolb'an kyib' kykyaqil soldad ti'j.

²⁸El kyi'n t-xb'alun Jesús, ok kyq'o'n jun kyaq xb'alun ti'j,

²⁹ex b'aj kyb'incha'n jun coron ch'i'x, jax kyq'o'n tuj twi', ex xi kyq'o'n jun ajlaj tuj tb'anq'ab'. E kub'tzun ẍmeje' twitz ex e xmayin ti'j: —In xi qq'olb'ene aya Rey kye xjal judiy, kukxwit tel tq'ija, che chi.

³⁰Ok kytzub'an tuj twitz, el kyi'n ju ajlaj te ex ok kyb'ju'n ti'j twi'.

³¹Tejtzun kyb'aj xmayin ti'j, el kyi'n ju kyaq xb'alun ti'j, ok kyq'o'n axju t-xb'alun, ex xi kyi'n tu'n tjaw kyq'o'n twitz crus.

³²Tejtzun kyetz, ok noj jun xjal kywitz, Simón tb'i ex aj Sirene, ok kyjwersin tu'n t-xi tiqan tcrus Jesús.

³³E pontzun tuj jun lugar Gólgota tb'i; aju yol Gólgota atzun in tma'n: Jun lugar Tb'aqil Wib'aj.

³⁴Tej kypon tuj lugar lu, xi kyq'o'n tk'a' vinagre smo'n tuk'il ta'l k'ul puro k'a; ex tej t-xi tnik'b'e'n Jesús, minti' xi tk'an.

³⁵Tej tjaw q'o'n Jesús twitz crus, b'aj kysipan soldad qe t-xb'alun kyxolx, ex e ok ten q'il swert kyi'j, alkye tu'n t-xi ti'n junjun. [B'ant jlu kyu'n, tu'ntzun tjapun aju q'ma'maj tu'n t-sanjel Dios chi kyja': Jaw kyi'n swert ti'j nxb'alune ex b'aj kysipan kyxolx, chi t-sanjel Dios.]

³⁶E kub'tzun qe' in che xq'uqin ti'j Jesús.

³⁷Kub' kytz'ib'an alkye til, jax kyq'o'n twitz crus tib'aj twi', in tma'n kyja': Atzun Jesús jlu, aju Rey kye xjal judiy.

³⁸Ax ikx jaw kyq'o'n kab'e eleq' twitz crus junx tuk'il Jesús, jun tuj tb'anq'ab' ex jun tuj tnayaj.

³⁹Atzun kye xjal in che ik' twitz crus in che xmayin ti'j Jesús, in xi kyyukun kywi',

⁴⁰ex in kyma'n: —Aya in tma'na tu'n tkub' t-xituna tja Dios ex tuj ox q'ij tu'n tjaw tb'incha'na juntl maj, klom tib'a tu'nx tib'a. Qa Tk'wa'l Diosa, tku'tza twitz crus, che chi xjal.

⁴¹Ax ikx qe nejenel kye pal, kyuk'ix qe xnaq'tzal ti'j ley, kyuk'ix qe fariseo ex kyuk'ix qe kytijil xjal, in che xmayin ti'j ex in kyma'n:

⁴²—Qe txqantl xjal e klet tu'n, atzun te minti' in b'ant tklonte tib'; qa rey jlu kye aj Israel, b'a'n tu'n tku'tz twitz crus ja'lo tu'ntzun qokslan ti'j.

⁴³O qe' tk'u'j ti'j Dios; e tklet tu'n Dios ja'lo qa axix tok taj Dios ti'j; porke o tma qa Tk'wa'l Dioste, che chi xjal.

⁴⁴Ax ikx qe eleq' e ok ten ilil ti'j, aqeju e jaw q'o'n twitz crus junx tuk'il.

⁴⁵Kub' qloljxix tkyaqil twitz tx'otx', xe't-x te chilkuq'ij, maxitzun el spik'e' te las tres te qale.

⁴⁶Ch'ixtoq tpon las tres te qale, jaw tq'ajq'ajel twi Jesús kyuwxix ex tma: —Elí, Elí, ¿lama sabactani? Atzun in tma'n ju yol lu: Nman Dios, Nman Dios, ¿tiqu'n ma chin kyaj tkolina? Chi Jesús.

⁴⁷Tej kyb'inte junjun xjal ax ate'toq, kyma kyxolx: —Ate jlu in txokon ti'j Elías, che chi.

⁴⁸Jurat naj xi qelan jun kye, tzaj ti'n jun esponja ex ku'x tmu'n tuj vinagre, ex ok tq'o'n twi' jun ajlaj, jax tq'o'n tu'n tel ttz'ub'an Jesús.

⁴⁹Atzun kye txqantl kyma: —E tten nej; qo ke'yin ti'j qa tzul Elías klol te.

⁵⁰Atzunte Jesús jaw tq'ajq'ajel twi' juntl maj kyuwxix, jawtzun b'aj t-xew.

⁵¹Atzunju xb'alun te maqb'il tkub' tuj tmij tja Dios kub' sb'it'j, kab'e piẍ ela, tzaj sb'it'j twi', kub'il t-xe'. Tzaj lu'lun tx'otx' ex qe nmaq ab'j e je'x pax;

⁵²ex qe pantyón e jaqet; ex nimku kyximlal okslal otoq che kyim e jaw anq'in,

⁵³e je'tz tuj pantyón, e ul tuj Jerusalén aju tnam xjan, ex kub' kyyek'un kyib' kywitz nimku xjal tjatzlenxi anq'in Jesús.

⁵⁴Aju capitán kyuk'ix qeju ate' tuk'il in che xq'uqin ti'j Jesús, tej kylonte kyaqnajnab' ex tkyaqilju o b'aj, tzaj nim kyxob'il, ex kyma: —Axix tok Tk'wa'l Dios te jlu, che chi.

⁵⁵Nimku xu'j axtoq ate' in che ke'yin najchaq, otoq che tzaj lpe' qe xu'j lu ti'j Jesús tej ttzaj tuj Galilea, ex otoq che ajb'en te.

⁵⁶Kyxol qeju xu'j lu attoq Mariy aj Magdala, tuk'ix Mariy kytxu' Jacobo ex José, ex tuk'ix kytxu' tky'ajal Zebedeo.

⁵⁷Tejtzun tqoqax, ul jun xinaq q'inun, José tb'i ex aj Arimatea, otoq tz'ok te t-xnaq'tzb'en Jesús.

⁵⁸Xi' José tuk'il Pilato, xi tqanin t-ximlal Jesús. Xi tq'o'n Pilato orden tu'n t-xi q'o'n t-ximlal Jesús te.

⁵⁹Xitzun ti'n José t-ximlal Jesús, okx tb'alq'i'n tuj jun saq xb'alun,

⁶⁰okx tq'o'n tuj jun pantyón ak'aj, texte José tpantyón, otoq tz'okx tlaku'n tuj pik; tzaj ttolin jun ab'j ma tij, ok tq'o'n ttzi pantyón ex ajtzun.

⁶¹Axtoqtzun ate' Mariy aj Magdala, tuk'ix juntl Mariy, q'uql qe twitz pantyón.

⁶²Tuj juntl q'ij b'aj kychmon kyib' qe nejenel kye pal twitz Pilato kyuk'ix qe fariseo, ewtoq tb'antlen kyten xjal tu'n tik'set ju q'ij te ojlab'l.

⁶³Xi kyma'n te Pilato: —Tat, ma tzul ti'j qk'u'je at jun yol o tma aju sb'ul lu tej itz'xtoq: Ok tel ox q'ij chin jawil anq'ine, chi xjal lu.

⁶⁴Kyja'tzun q'onxa orden tu'n tkyuwset ju pantyón tuj ox q'ij, mya yajku che ul qe t-xnaq'tzb'en te qonik'an, ex k'eletz kyelq'a'n t-ximlal, ex kxel kyma'n kye xjal: Ma jaw anq'in kyxol kyimni, che chilo. Tu'n jlu mas che b'ajel sb'u'n xjal ja'lo twitzju nej, che chi.

⁶⁵Xitzun tma'n Pilato kye: —Lu jun k'loj soldad lu tu'n kyxi' kyuk'ile; kyxi'ye, ex kykyuwsan oke ttzi pantyón ik tza'nx b'a'n kyu'ne.

⁶⁶E je'xtzun, b'aj kykyuwsa'n ttzi pantyón, ok kyq'o'n jun sey ti'j ab'j, ex e kyaj kyq'o'n qe soldad te xq'uqil.