Read kumam Mateo 28 Bible Online

Mateo 28 - kumam bible

Mateo 28

¹Tb'ajlenxitzun ju q'ij te ojlab'l, ch'ixtoq qsqix tuj tnejel q'ij te seman, e ul Mariy aj Magdala tuk'ix juntl Mariy ke'yilte pantyón.

²Ex tzaj jun kyaqnajnab' nimxix; porke ku'tz jun t-anjel Qman tuj kya'j; tej tkub'il el ti'n ju ab'j ttzi pantyón ex kub' qe' tib'aj.

³Ik ke'yin twitz ik tza'n tqan q'ankyoq, atzunju t-xb'alun saq ke'yin ik tza'n ttxa che'w.

⁴Atzun qe soldad in che xq'uqin e jaw lu'lun tu'n tchi anjel, mer ik tza'n kyimni e ok.

⁵Atzunte anjel xi tma'n kye xu'j: —Mi'n che xob'e, porke b'a'n wu'ne in che jyone ti'j Jesús aju jaw q'o'n twitz crus.

⁶Mi a'l tzalu, ma jaw anq'in ik tza'n o tma. Kytzaje, kyke'yinxe jatum kub' q'o'n t-ximlal.

⁷Kyxi' naje, kymanxe kye t-xnaq'tzb'en kyja': Ma jatz anq'in kyxol kyimni, ex lu kxel nej kywitze tu'n kypone tuj Galilea; atzun k'okel kyke'yine, che chikuye kye t-xnaq'tzb'en. Lu ma txi nma'ne kyeye, chi anjel kye xu'j.

⁸Atzun kye xu'j e ajtz ttzi pantyón in che xob' ex nim in che tzalaj; e je'x naj q'ol tqanil kye t-xnaq'tzb'en Jesús, in che ojqelan wen.

⁹Ex matoq kyja' kyxi', lu Jesús ok noj kywitz, e je'x tq'olb'e'n. Atzun kye xu'j e pon laq'e' ttxlaj, tzaj kychle'n tqan, ex e k'ulun twitz.

¹⁰Xitzun tma'n Jesús kye: —Mi'n che xob'e; kyxi'ye, kyq'onxe tqanil kye wermaniye tu'n kyxi' tuj Galilea, ex atzun chin okel ke'yine kyu'n.

¹¹Matoq kyja' kyxi' qe xu'j, at junjun kye xq'uqil e je'x tuj tnam ex xi kyq'o'n tqanil kye nejenel kye pal ti'j tkyaqilju otoq b'aj.

¹²B'ajtzun kychmon kyib' qe nejenel kye pal kyuk'ix qe kytijil xjal, e yolin ti'j kyxolx, xi kyq'o'n nim pwaq kye soldad,

¹³ex xi kyma'n kye: —Kymanxe kye xjal: E ul qe t-xnaq'tzb'en te qonik'an ex etz kyelq'a'n t-ximlal matoq in qo tane, che chikuye.

¹⁴Qatzun ma tb'i gobernador jlu, kb'antel ti'j qu'ne tuk'il tu'ntzun kykolpaje, che chi qe nejenel kye pal.

¹⁵Xitzun kyi'n soldad pwaq ex kyb'incha ik tza'nx tzaj q'ma'n kye. Aju yol lu ma tz'el tqanil kyxol xjal judiy, ex ax yol in kyma'n ja'lo.

¹⁶Atzun kye junlaj xnaq'tzb'en e pon tuj Galilea twi witz jatum otoq txi tma'n Jesús kye.

¹⁷Tejtzun tilwaj Jesús kyu'n, e k'ulun twitz; ex at junjun jawje' kyk'u'j.

¹⁸Pontzun laq'e' Jesús kytxlaj ex tma: —Ma tzaj q'o'n woklene ti'j tkyaqilju at tuj kya'j ex twitz tx'otx'.

¹⁹Kyja'tzun kyxi'ye, kymanxe kye xjal tu'n kyok te nxnaq'tzb'ene kyuj kykyaqil nasyon, ex tu'n kyb'yan kyu'ne tuj tb'i Dios Mamb'aj, ex tuj nb'iye aqine K'wa'lb'aj, ex tuj tb'i Xewb'aj Xjan;

²⁰kyq'onxe xnaq'tzb'il kye tu'n tjapun kyu'n tkyaqilju ma txi nma'ne kyeye. Ex lu qine chin tele kyuk'ile tkyaqil q'ij akutzun in japun b'aj mankb'il tq'ijlalil. Ikxwitju.