Read kumam Mateo 6 Bible Online

Mateo 6 - kumam bible

Mateo 6

¹Ten kykwente ti'j tza'n tten tu'n kyb'inchanteye aju in tma'n kyokslab'le, mya noq o'kx tu'n kyok ke'yine kyu'n xjal; qatzun ma kyb'inchaye noq tu'n kyok ke'yine kyu'n xjal, mlaylo tzaj q'o'n jun oyaj kyeye tu'n Kymane aju at tuj kya'j.

²Kyja'tzun ok t-xi kyq'o'ne kotzb'aj, mi'n b'aj kyyoline kye xjal ik tza'n in kyb'incha'n qe xmletz' kyuj qe ja te k'ulb'il ex tuj cay, tu'ntzun kyjaw nimsa'n kyu'n xjal. Ax tok kxel nma'ne kyeye, o'kxtzun ch'in chojb'il kyeju.

³Atzun kyeye ok t-xi kyq'o'ne kotzb'aj, minti' tu'n kyb'inte mastl ok t-xi kyq'o'ne.

⁴Kyja'tzun tuj ewaj kxel kyq'o'ne kotzb'aj; porke in ke'yin Kymane ti'j aju in xi kyq'o'ne tuj ewaj, ex ktzajel tq'o'n t-xel kyeye.

⁵Ex ok kyna'ne Dios, mi'n kyb'inchaye ik tza'n qe xmletz', tu'nju at-xix kygan tu'n kyna'n Dios wa'l qe kyuj ja te k'ulb'il ex jatum in che moje' cay, tu'ntzun kyok ke'yin kyu'n xjal. Ax tok kxel nma'ne kyeye, o'kxtzun ch'in chojb'il kyeju.

⁶Atzun kyeye, ok kyna'ne Dios kyokxe tuj kyjaye, ex kylmo'metze tlamel ja, ex che yoline tuk'il Kymane aju at tuj ewaj, ex aju Kymane in ke'yin tuj ewaj, ktzajel tq'o'n t-xel kyeye.

⁷Atzun kyeye ok kyna'ne Dios, mi'n txi kyma'ne ela' maj axju yol ik tza'n in kyb'incha'n qe txqantl xjal minti' nne'l kynik' ti'j Dios; porke tuj kynab'l qa tu'nju nimku kyyol che tzajel b'i'n.

⁸Mi'ntzun kyb'inchaye ik tza'n kye; porke ate Kymane ojtzqi'majtl tu'n alkyeju at tajb'enxix kyeye, na'nxtoq t-xi kyqanine te.

⁹Kyja'tzun che na'ne Dios kyja': A Qman ata tuj kya'j, tenwt tchiylal tb'iya qeye.

¹⁰E ttzaj ju tkawb'ila. B'ant-xwit ju tajb'ila twitz tx'otx' ik tza'n in b'ant tuj kya'j.

¹¹Q'ontza qwaye ja'lo, aju in ajb'en tkyaqil q'ij.

¹²Ex najsama aju mya b'a'n in qb'incha'ne twitza, ik tza'n qeye in kub' qnajsa'ne kypaltil qeju in kyb'incha'n mya b'a'n qi'je.

¹³Ex mi'n taq'a amb'il tu'n qoke tuj joyb'il qi'je, noq o'kx qo tkloma teju mya b'a'n. Porke teya ju kawb'il, ex ipumalj, ex ajwalil te jumajx. Ikxwitju.

¹⁴Ex qa ma kub' kynajsa'ne aju mya b'a'n in kyb'incha'n xjal kyi'je; ax ikx kb'el najsa'n kyile tu'n Kymane aju at tuj kya'j.

¹⁵Ex qa minti' xkub' kynajsa'ne aju mya b'a'n in kyb'incha'n xjal kyi'je, ax ikx te Kymane mlay kub' najsa'n kyile tu'n.

¹⁶Ex ok tkub' kyyo'ne we'yaj, mi'n txi kyyek'une kywitze miyalnix qa in che b'isune ik tza'n qe xmletz'; ex miyalnix nno'k kywitz tu'n kyyek'unte kyib' kywitz xjal qa in kub' kyyo'n we'yaj. Ax tok kxel nma'ne kyeye, o'kxtzun ch'in chojb'il kyeju.

¹⁷Atzun kyeye, ok tkub' kyyo'ne we'yaj, kyxeb'anku kywi'ye ex kytx'jo'mel kywitze,

¹⁸tu'ntzun mi'n t-xi kyyek'une kye xjal qa in kub' kyyo'ne we'yaj, noq o'kx te Kymane aju at tuj ewaj; ex aju Kymane in ke'yin tuj ewaj, ktzajel tq'o'n t-xel kyeye.

¹⁹Mi'n b'aj kychmo'ne kyq'inumab'le twitz tx'otx' jatum in naj tu'n pok' ex tu'n akom, ex nno'kx kylaku'n eleq' t-xe ja tu'n tetz kyelq'a'n.

²⁰Noq o'kx kychmome kyq'inumab'le tuj kya'j jatum minti' in naj tu'n pok' ex tu'n akom, ex minti' nno'kx kylaku'n eleq' t-xe ja tu'n tetz kyelq'an.

²¹Porke jatum ta' kyq'inumab'le, atzun tok kyanmiye ti'j.

²²Aju spik'un te qximlal, atzunju tb'aq' qwitz; kyja'tzun qa b'a'n ta' tb'aq' kywitze, tkyaqiltzun kyximlale at tuj spik'un.

²³Qatzun mya b'a'n ta' tb'aq' kywitze, tkyaqil kyximlale at tuj qlolj. Qatzun ma tz'ok te qlolj aju spik'un at kyuje, mas nimxix kchmetel ju qlolj.

²⁴Mi jun xjal jaku b'ant tu'n tajb'en te kab'e patrón: porke k'elel tik'un jun, atzun juntl ok tk'ujla', ex qa o'kx ok k'ajb'el te jun patrón, atzun juntl minti' taj ti'j. Mlayx b'ant tu'n kyajb'ene te Dios ex te q'inumab'l.

²⁵Kyja'tzun kxel nma'ne kyeye: Mi'n b'aj kyk'u'je ti'j kychwinqlale, ti kxel kywa'ne ex qa ti kxel kyk'a'ne; ex mi'n b'aj kyk'u'je ti'j kyximlale, ti k'okel kyq'o'ne kyi'je. ¿Myapetzun mas ma' t-xilen kychwinqlale twitz wab'j? ¿Ex myapetzun mas ma' t-xilen kyximlale twitz xb'alun?

²⁶Kyke'yinxe qe chyu'j; minti' in che awan ex minti' in che chmon twitz awal, ex minti' kytx'utx' te chmob'l kywa; ex ate Kymane aju at tuj kya'j nno'k k'a'chante kye. ¿Myapetzun mas ma' kyxilene kywitz qe chyu'j?

²⁷¿Ex alkye jun kyxole jaku b'ant tu'n tu'n tok tq'o'n kab'e xk'achub'tl twa'l tu'nju nimxix in b'aj tk'u'j ti'j?

²⁸¿Ex tiqu'n in b'aj kyk'u'je ti'j kyxb'alune? Che ximane kyi'j b'ech tuj k'ul tza'n tten in che ch'iy; minti' in che aq'nan, ex minti' in che chqon.

²⁹Ex kxel nma'ne kyeye ti'j rey Salomón, maske tb'anilxix t-xb'alun ok tq'o'n, pero minti' pon jun t-xb'alun ik tza'n kye tal b'ech lu.

³⁰Qatzun qa ik in t-xb'alumi'n Dios tal k'ul tuj kojb'il at ja'lo ex nchi'j tz'okx q'o'n tuj q'aq', ¿yajtzun kyeye, mlaypelo che xb'aluminjtze tu'n, aqeye xinaq ch'in kyokslab'le?

³¹Kyja'tzun mi'n b'aj kyk'u'je, ex mi'n kymaye: ¿Ti kxel qwa'ne? ex qa ¿ti kxel qk'a'ne? ex qa ¿jatum ktzajel qxb'alune?

³²Porke qe txqantl xjal in che jyon ti'j tkyaqil jlu; pero at jun Kymane aju at tuj kya'j ojtzqi'n tu'n qa at tajb'en tkyaqil jlu kyeye.

³³Kynimanxe tnejelxix aju tkawb'il Dios ex tu'n kyb'inchanteye aju tz'aqlxix twitz; tkyaqiltzun jlu ktzajel q'o'n kyeye.

³⁴Kyja'tzun, mi'n b'aj kyk'u'je ti'j ju te nchi'j, porke aju te nchi'j texte tb'is ktzajel. Aju nnik'x qu'n tuj jun q'ij, akuxju.