Read kumam Mateo 7 Bible Online

Mateo 7 - kumam bible

Mateo 7

¹Mi'n che yoline kyi'j kyuk'ile qa mya b'a'n qe, tu'ntzun mi'n kyoke tuj xjel tu'n Dios.

²Porke ik tza'n in che yoline ti'j kyuk'ile, ax ikxtzun kb'el kysentense tu'n Dios, ex ax ju malb'il k'ajb'el tu'n Dios kyeye jatum in xi kymalo'ne te juntl.

³¿Ex tiqu'n nno'k kyke'yine aju tal tz'is tokx tuj twitz kyermaniye, ex minti' nno'k kyq'o'ne kwent ti'j ju viga tokx tuj kywitze?

⁴¿Ex tza'ntzun tten tu'n t-xi kyma'ne te kyermaniye: K'eletz qi'ne ju tal tz'is tuj twitza erman, ex lu ju viga tokx tuj kywitze?

⁵Xmletz' qeye, nej kyi'metze aju viga tokx tuj kywitze, tu'ntzun q'ancha'lxix ok kyla'ye tu'n tetz kyi'ne ju tal tz'is tokx tuj twitz kyermaniye.

⁶Mi'n txi kyq'o'ne kye tx'yan aju in ajb'en te Dios, mya yajku che ajtz meltz'aj ex jaku che b'aj tzaqune kyu'n. Ex mi'n txi kyxo'ne kyperlaye kywitz qe b'och, mya yajku b'aj kywab'an.

⁷Kyqaninxe ex ktzajel q'o'n kyeye; kyjyome ex knetel kyu'ne; kyq'ajtzan oke, ex kjaqetel ttzi ja kywitze.

⁸Ex alkye jun xjal in qanin ti'j, ok tk'ma'; ex aju in jyon ti'j, knetel tu'n; ex aju nno'k tq'ajtza'n, kjaqetel ttzi ja twitz.

⁹¿Ex alkye jun xjal kyxole, qa ma tzaj tqanin tk'wa'l jun twa pan, maj kxel tq'o'n jun ab'j?

¹⁰Ex qa ma tzaj tqanin k'wa'l jun tchi' kyiẍ, ¿maj kxel tq'o'n jun lob'aj?

¹¹Maske mya b'a'n qeye, pero in xi kyq'o'ne oyaj b'a'n kye kyk'wa'le, ¿yajtzun te Kymane aju at tuj kya'j, mlaypelo tzaj tq'o'n aju b'a'n kye qeju in che qanin te?

¹²Kyja'tzun tkyaqilju kyajb'ile tu'n kyb'inchante xjal kyeye, ax ikxtzun kyb'inchame kye; ex atzunju in tma'n tley Moisés ex in kyma'n qe t-sanjel Dios.

¹³Kyokxe ttzi ja ch'in; porke aju ttzi ja ma' ex ju b'e ma' tuj, atzunju in pon tuj najen, ex nimku xjal in che'x tuj.

¹⁴Atzunju ttzi ja ch'in ex ju b'e ch'in tuj, atzunju in pon tuj chwinqlal, ex nik'xi junjun xjal in knet ttzi ja ch'in kyu'n, ex ju b'e ch'in tuj.

¹⁵Ten kykwente kyi'je tu'n mi'n kykub' sb'u'ne kyu'n pakb'al nik'al yol che ul kyuk'ile, ex k'okel kyq'on kyib' ik tza'n ẍne'l qe, atzun tuj kyanmi ik kyten ik tza'n qe xo'j in che tzeqt tu'n t-xi kychyo'n qe ẍne'l.

¹⁶Ti'j kyb'inchb'en k'elel kynik'e kyi'j. ¿Baqa ti'j ch'i'x nne'l qi'n qlo' uva, ex baqa ti'j ch'i'x k'ul nne'l qi'n qlo' higo?

¹⁷Kyja'tzun tkyaqil tze' b'a'n, in tq'o'n twitz b'a'n; atzunju tze' mya b'a'n, in tq'o'n twitz mya b'a'n.

¹⁸Aju tze' b'a'n mlay tzaj tq'o'n twitz mya b'a'n; ex aju tze' mya b'a'n mlay tzaj tq'o'n twitz b'a'n.

¹⁹Tkyaqil tze' qa mya b'a'n twitz in tq'o'n, kjawil tx'emit ex k'okex q'ot tuj q'aq'.

²⁰Kyja'tzun k'elel kynik'e kyi'j qe xjal pakb'al nik'al yol, tu'nju kyb'inchb'en.

²¹Aqeju in kyma'n weye: Tat, Tat, mya kykyaqil che okex tuj kawb'il in tzaj tuj kya'j; noq o'kx k'okex aju in tb'incha'n tajb'il Nmane aju at tuj kya'j.

²²Nimku xjal tuj tq'ijlalil tzul ok kyma' weye: Tat, Tat, ¿minti'petzun qoklene tzaj tq'o'na tu'n qpakb'ane, ex tu'n tipumala e je'tz qe ju'ẍ tuj kyanmi xjal qu'ne, ex tu'n tipumala o qb'inchaye nimku b'inchb'en nim kyipumal?

²³Atzun weye kxel nma'ne kye: Minti' ojtzqi'n kywitze wu'ne; kypa'mil kyib'e wi'je aqeye b'inchal mya b'a'n.

²⁴Kyja'tzun, alkye jun xjal ma txi tb'i'n qe nyole lu ex ma che japun tu'n, ik tten ik tza'n jun xjal at tnab'l jaw tb'incha'n tja tib'aj pk'at.

²⁵Tzajtzun jb'al ex jaw ch'iy a', ex tzaj nim kyq'iq' ex pon tilj ti'j ja; ex minti' kub' tz'aq, porke tkub' t-simyentil ja tib'aj pk'at.

²⁶Ex alkye jun xjal in tb'i'n qe nyole lu ex minti' in che japun tu'n, ik tten ik tza'n jun xjal minti' tnab'l jaw tb'incha'n tja tib'aj ttxa tz'a'n.

²⁷Tzajtzun jb'al ex jaw ch'iy a', ex tzaj nim kyq'iq' ex pon tilj ti'j ja; ex kub' tz'aq ja ex b'i'x kub' xitj tkyaqil, chi Jesús.

²⁸Tejtzun tb'aj tma'n Jesús qe yol lu, kykyaqiltzun xjal e lab'in ti'j t-xnaq'tzb'il;

²⁹porke aju xnaq'tzb'il xi tq'o'n kye at tipumal, mya ik tza'n kye xnaq'tzal ti'j ley.